نریندر مودی کی قیادت والی حکومت کے قومی سلامتی کے تئیں اقدمات قابل ستائش ۔ ست شرما

جموں، 06 مارچ (ہ س)۔ بی جے پی جموں و کشمیر کے صدر اور راجیہ سبھا کے رکن پارلیمان ست شرمانے کہا ہے کہ 5083 کروڑ روپے کے مقامی سمندری دفاعی پروگرام کی منظوری وزیر اعظم نریندر مودی کی قیادت والی حکومت کے قومی سلامتی کے تئیں مضبوط عزم کی عکاسی کرتی ہے۔ یہ بات انہوں نے جموں کے تریکوٹہ نگر میں واقع پارٹی ہیڈکوارٹر میں سینئر پارٹی رہنماؤں کی ایک اہم تنظیمی میٹنگ کی صدارت کرتے ہوئے کہی۔ میٹنگ میں پارٹی تنظیم کو مزید مضبوط بنانے، زمینی سطح پر عوام سے رابطہ بڑھانے اور مودی حکومت کی کامیابیوں کو مؤثر انداز میں عوام تک پہنچانے پر زور دیا گیا۔

میٹنگ سے خطاب کرتے ہوئے ست شرما نے کہا کہ پارٹی رہنماؤں اور کارکنان کو عوام کے ساتھ اپنے رابطے کو مزید مضبوط کرنا چاہیے اور نچلی سطح پر تنظیم کو مستحکم بنانے کے لیے نئے عزم کے ساتھ کام کرنا چاہیے۔ انہوں نے کہا کہ جاری تربیتی مہم اور ورکشاپس کارکنان کو نظریاتی وضاحت، سیاسی شعور اور تنظیمی نظم و ضبط سے آراستہ کرنے کی ایک اہم پہل ہیں۔

انہوں نے کہا کہ ہر بی جے پی کارکن کو خود کو ایک ادارہ بنانے کی کوشش کرنی چاہیے جو عوامی زندگی میں پارٹی کی نظریاتی وابستگی، نظم و ضبط اور خدمت کے جذبے کی عکاسی کرے۔ ان کے مطابق کارکنان کو سیاسی طور پر باشعور، نظریاتی طور پر مضبوط اور سماجی طور پر حساس ہونا چاہیے تاکہ وہ معاشرے کی مؤثر خدمت کر سکیں۔ست شرما نے مزید کہا کہ پارٹی کا بنیادی مقصد معاشرے کے ان طبقات تک پہنچنا ہے جو دہائیوں سے نظر انداز یا الگ تھلگ رہے ہیں، اور یہ یقینی بنانا ہے کہ سرکاری پالیسیاں اور فلاحی اسکیمیں مؤثر طریقے سے ان تک پہنچیں۔

انہوں نے مودی حکومت کی جانب سے قومی سلامتی اور خود انحصاری کو مضبوط بنانے کے حالیہ اقدامات کا ذکر کرتے ہوئے کہا کہ 5083 کروڑ روپے کے مقامی سمندری دفاعی پروگرام سے ہندوستان کی بحری صلاحیتوں میں نمایاں اضافہ ہوگا۔ اس پروگرام کے تحت جدید نظام جیسے اے ایل ایچ ایم کے۔تین ہیلی کاپٹر اور شتِل میزائل سسٹم کو فروغ دیا جائے گا۔

انہوں نے بتایا کہ اس منصوبے سے 75 لاکھ سے زائد انسانی اوقاتِ کار کے روزگار کے مواقع پیدا ہوں گے اور دو سو سے زیادہ ہندوستانی چھوٹے اور درمیانے درجے کے اداروں کو دفاعی سپلائی چین میں شامل کیا جائے گا۔

ست شرما نے کہا کہ وزیر اعظم نریندر مودی کی قیادت میں ہندوستان ایک مضبوط اور خود کفیل دفاعی نظام کی تعمیر کی جانب مسلسل آگے بڑھ رہا ہے۔ انہوں نے کہا کہ تقریباً 7500 کلومیٹر طویل ساحلی پٹی کے تحفظ سے لے کر قومی سلامتی کو مضبوط بنانے اور مقامی صنعت کو فروغ دینے تک ملک اعتماد کے ساتھ ترقی کی راہ پر گامزن ہے۔انہوں نے مزید کہا کہ 2019 کے بعد جموں و کشمیر میں بے مثال ترقی اور استحکام دیکھنے کو ملا ہے اور پارٹی رہنماؤں کی ذمہ داری ہے کہ وہ ان کامیابیوں اور تبدیلی لانے والے اقدامات کو عوام تک پہنچائیں۔

ہندوستھان سماچار

--------------

ہندوستان سماچار / محمد اصغر