تہران، 27 مارچ (ہ س)۔

مغربی ایشیا میں 28 روزہ جنگ کے درمیان، ایران کے وزیر خارجہ سید عباس عراقچی نے کہا کہ ایران کو یہ قانونی حق حاصل ہے کہ وہ امریکہ، اسرائیل اور ان کے اتحادیوں کے جہازوں کو آبنائے ہرمز سے گزرنے سے روکے۔

عراقچی نے یہ باتیں اقوام متحدہ کے سیکرٹری جنرل انتونیو گوتیرس کے ساتھ فون پر بات چیت کے دوران کہیں۔ دونوں رہنماو¿ں نے ایران پر امریکی اور اسرائیلی حملوں کے سیکورٹی اور انسانی ہمدردی کے نتائج پر تبادلہ خیال کیا۔

چین کی سرکاری خبر رساں ایجنسی زنہوا نے جمعے کے روز ایک بیان میں ایران کی وزارت خارجہ کے حوالے سے اطلاع دی ہے کہ ایرانی وزیر خارجہ نے گوتیرس کو تنازع کی تازہ ترین پیش رفت اور امریکہ اور اسرائیل کے جرائم سے آگاہ کیا۔ انہوں نے اپنی قومی سلامتی، خودمختاری اور علاقائی سالمیت کے جائز دفاع کو جاری رکھنے کے ایران کے عزم پر زور دیا۔

انہوں نے امریکہ اور اسرائیل کی طرف سے سویلین اہداف پر وحشیانہ حملوں کی مذمت کی، جن میں اسکول، اسپتال، ثقافتی اور تاریخی عمارتیں، عوامی مقامات اور رہائشی علاقوں شامل ہیں۔ انہوں نے اقوام متحدہ کی ذمہ داری کو اجاگر کیا کہ وہ اقوام متحدہ کے چارٹر اور بین الاقوامی قانون (بشمول انسانی حقوق اور بین الاقوامی انسانی قانون) کی جارحیت پسندوں کی جانب سے کی جانے والی سنگین خلاف ورزیوں کے خلاف کارروائی کرے۔

عراقچی نے بعض فریقوں کے موقف اور یکطرفہ درخواستوں پر تنقید کی جس میں ایران پر زور دیا گیا کہ وہ تحمل سے کام لے اور جنگ بند کرے۔ انہوں نے زور دے کر کہا کہ اس واضح حقیقت کو نظر انداز نہیں کیا جانا چاہیے کہ امریکہ نے اسرائیل کے ساتھ مل کر ایران کے خلاف فوجی جارحیت کا آغاز کیا اور سفارت کاری سے بار بار غداری کرتے ہوئے اور تمام علاقائی ممالک کی سلامتی اور مفادات کو خطرے میں ڈال کر خطے اور دنیا پر جنگ مسلط کی۔

انہوں نے کہا کہ آبنائے ہرمز میں عدم تحفظ امریکہ اور اسرائیل کی لاقانونیت اور جارحیت کا براہ راست نتیجہ ہے۔ انہوں نے ایک ساحلی ملک کے طور پر ایران کے اس حق کو قرار دیا کہ وہ امریکہ، اسرائیل اور ان کے اتحادیوں سے تعلق رکھنے والے یا ان سے منسلک بحری جہازوں کو آبی گزرگاہ سے گزرنے سے روکے۔

عراقچی نے کہا کہ متعلقہ ایرانی حکام نے اس آبی گزرگاہ پر جہاز رانی کی حفاظت اور سیکورٹی کو یقینی بنانے کے لیے اپنی ذمہ داری سے پوری طرح آگاہ ہوتے ہوئے ضروری اقدامات کیے ہیں۔ دوسری جانب گوتریس نے اقوام متحدہ کے اصولی موقف پر زور دیا کہ ممالک کی قومی خودمختاری اور علاقائی سالمیت کا احترام کیا جائے اور علاقائی تنازع پر گہری تشویش کا اظہار کیا۔

ہندوستھان سماچار

ہندوستان سماچار / عطاءاللہ