پٹنہ، 25 مارچ (ہ س)۔ داناپور کے شاہ پور تھانہ علاقہ کے تحت ڈھبرا گاؤں میں وجے سنگھ پتھ-ڈھیبرا روڈ پروجیکٹ کے تحت زیر تعمیر پل کی دیوار کا گرنا انتہائی افسوسناک اور تشویشناک ہے۔ اس واقعہ پر گہری تشویش کا اظہار کرتے ہوئے بہار پردیش کانگریس کمیٹی کے صدر راجیش رام نے کہا کہ یہ حادثہ بہار حکومت کی سنگین لاپروائی، بدعنوانی اور ناقص تعمیراتی کام کا براہ راست نتیجہ ہے۔

انہوں نے الزام لگایا کہ ترقی کے نام پر ریاست میں صرف کاغذی اسکیمیں لاگو کی جارہی ہیں جبکہ معیار اور حفاظت کو زمینی طور پر نظر انداز کیا جارہا ہے۔

ریاستی صدر نے سوال کیا، کون جوابدہ ہوگا؟ کیا حکومت بتائے گی کہ تعمیراتی کام معیار کے بغیر کیسے چل رہا تھا؟ مزدوروں کی حفاظت کے لیے کیا انتظامات کیے گئے تھے؟ یہ صاف ہے کہ حکومت ٹھیکیداروں کو کھلی چھٹی دے کر عوام کی زندگیوں سے کھیل رہی ہے۔

راجیش رام نے ریاستی حکومت سے مطالبہ کیا کہ پورے معاملے کی اعلیٰ سطحی انکوائری کرائی جائے، قصوروار افسران اور ٹھیکیداروں کے خلاف سخت کارروائی کی جائے اور زخمی مزدوروں کا مناسب علاج یقینی بنایا جائے اور انہیں مناسب معاوضہ دیا جائے۔

ہندوستھان سماچار

ہندوستان سماچار / Mohammad Afzal Hassan