پٹنہ، 24 مارچ (ہ س)۔بہار کے شیوہر ضلع کے ڈپٹی ڈیولپمنٹ کمشنر برجیش کمار کے پٹنہ سمیت شیوہر، بیتیا، مشرقی چمپارن اور سیتامڑھی میںکے کئی ٹھکانوں پر منگل کے روز خصوصی ویجیلنس یونٹ (ایس وی یو)نے چھاپہ ماری کی۔ ایس وی یو نے غیر متناسب اثاثوں کو جمع کرنے کے الزام میں شیوہر میں تعینات ڈپٹی ڈیولپمنٹ کمشنر-کم-چیف ایگزیکٹو افسر برجیش کمار کے خلاف مقدمہ نمبر 11/2026 درج کیا ہے۔ تحقیقاتی ایجنسی کے مطابق برجیش کمار نے اپنی سروس کی مدت کے دوران تقریباً1,84,32,900 کے غیر قانونی اثاثے جمع کیے، جب کہ مختلف عہدوں پر فائز رہے اور بطور سرکاری ملازم اپنے عہدے کا غلط استعمال کیا۔یہ دولت اس کے معلوم جائز ذرائع آمدنی سے نمایاں طور پر غیر متناسب پائی گئی۔ اس معاملے کی مزید تفتیش اسپیشل ویجیلنس جج، پٹنہ نے شروع کی، جس نے سرچ وارنٹ جاری کیا۔ اس بنیاد پر سرویلنس ٹیموں نے ملزم کے متعدد مقامات پر بیک وقت چھاپہ ماری کی ہے جن میں سرکاری دفاتر اور رہائشی احاطے بھی شامل ہیں۔ اسپیشل ویجیلنس یونٹ ( ایس وی یو ) نے سیتامڑھی میں برجیش کمار کے سسرال میںبھی چھاپہ ماری کی۔ ان کے خلاف غیر متناسب اثاثے رکھنے کی تحقیقات جاری ہیں۔ خصوصی ٹیم پٹنہ سے سیتامڑھی تک ان کے تمام مقامات پر دستاویزات کی سرگرمی سے جانچ کر رہی ہے۔ ٹیم نے پرتاپ نگر، سیتامڑھی کے ساتھ ساتھ پٹنہ اور شیوہر میں ان کے سسرال میں بھی چھاپہ ماری کی ، جس سے انتظامی حلقوں میں ہلچل مچ گئی۔ شیوہر ضلع ہیڈکوارٹر میں ڈی ڈی سی برجیش کمار کی سرکاری رہائش گاہ اور کلکٹریٹ واقع ان کے دفتر کی مکمل تلاشی لی جارہی ہے۔ دونوں مقامات پر دو گھنٹے کی تلاشی کے دوران ٹیم نے زیورات اور جائیداد کے کاغذات کی جانچ کی۔ بتایا جاتا ہے کہ غیر متناسب اثاثہ جات کے معاملے میں پٹنہ کے خصوصی ویجیلنس یونٹ نے ضلع مشرقی چمپارن کے ضلع گووند گنج تھانہ علاقہ کے جیتوار پور میں ڈی ڈی سی کی رہائش گاہ، سیتامڑھی ضلع کے مہسولہ گمٹی میں سسرال کی رہائش گاہ، بیتیامیں ایک جائیداد، مغربی چمپارن کے علاوہ ضلع پٹنہ میں ایک جائیداد پر چھاپہ ماری کی ہے۔چھاپہ ماری کے دوران دستاویزات، بینک ریکارڈ، جائیداد سے متعلق کاغذات اور الیکٹرانک آلات کی مکمل جانچ پڑتال کی جا رہی ہے۔ حکام کے مطابق تلاشی مکمل ہونے کے بعد ضبط کیے گئے اثاثوں کا تفصیلی جائزہ لیا جائے گا تاکہ غیر قانونی اثاثوں کی حد کو مزید معلوم کیا جا سکے۔ ویجیلنس یونٹ کے حکام کا کہنا ہے کہ تفتیش جاری ہے اور شواہد کی بنیاد پر مزید کارروائی کی جائے گی۔ ضرورت پڑنے پر دیگر متعلقہ افراد سے بھی پوچھ گچھ کی جا سکتی ہے۔ہندوستھان سماچار

ہندوستان سماچار / Mohammad Afzal Hassan