تہران/دوحہ، 22 مارچ (ہ س)۔ اسرائیل نے ایران کے حملے کے بعد آج صبح تہران پر میزائلوں کی بوچھاڑ کر دی۔ ایران کے جنوبی اسرائیل کے دو قصبوں پر میزائل حملے کیے جانے کے بعد اسرائیل کی فوج نے تہران پر نئے حملے شروع کیے ہیں۔ ادھر، قطر کا ایک فوجی ہیلی کاپٹر آج حادثے کا شکار ہو گیا۔

سی بی ایس نیوز کی رپورٹ کے مطابق، اسرائیل ڈیفنس فورسز (آئی ڈی ایف) نے اتوار کی صبح (مقامی وقت کے مطابق) بتایا کہ اس نے تہران میں موجود ایرانی حکومت کے بنیادی ڈھانچے کو نشانہ بناتے ہوئے حملوں کی ایک نئی لہر ابھی ابھی شروع کی ہے۔

ادھر، قطر کے حکام کے مطابق، تکنیکی خرابی کی وجہ سے قطر کا فوجی ہیلی کاپٹر سمندر میں کریش ہو گیا۔ حکام نے تسلیم کیا کہ یہ حادثہ خلیج فارس میں ہوا ہے۔ قطر کی وزارتِ دفاع نے سوشل میڈیا پر بتایا کہ ایک معمول کی پرواز کے دوران ہیلی کاپٹر میں تکنیکی خرابی آ گئی۔ اس کے سبب وہ قطر کے ساحل کے پاس کریش ہو گیا۔ موقع پر تلاشی اور بچاو کی مہم جاری ہے۔ وزارتِ دفاع نے یہ نہیں بتایا کہ کریش کے وقت ہیلی کاپٹر میں کتنے لوگ سوار تھے۔

ادھر، ایران کی فارس نیوز ایجنسی کی رپورٹ کے مطابق، ایران کی فوج نے امریکہ کے صدر ڈونالڈ ٹرمپ کو براہِ راست چیلنج کیا ہے۔ فوج نے کہا ہے کہ اگر امریکہ ملک کے ایٹمی بجلی گھروں (پاور پلانٹ) پر حملہ کرتا ہے تو وہ مشرقِ وسطیٰ میں توانائی اور پانی کی صفائی (واٹر پیوریفیکیشن) کے بنیادی ڈھانچے کو نشانہ بنائے گی۔ ایران کی فوج کا یہ بیان صدر ڈونالڈ ٹرمپ کی دھمکی کے جواب میں آیا ہے۔ ڈونالڈ ٹرمپ نے دھمکی دی ہے کہ اگر آبنائے ہرمز کو 48 گھنٹے کے اندر نہیں کھولا گیا تو وہ ایران کے پاور پلانٹ کو مکمل طور پر تباہ کر دیں گے۔

ہندوستھان سماچار

---------------

ہندوستان سماچار / انظر حسن