تہران، 22 مارچ (ہ س)۔ ایران کی فوج نے امریکہ کے صدر ڈونالڈ ٹرمپ کو براہِ راست چیلنج کیا ہے۔ فوج نے کہا ہے کہ اگر امریکہ ملک کے ایٹمی بجلی گھروں (پاور پلانٹ) پر حملہ کرتا ہے تو وہ مشرقِ وسطیٰ میں توانائی اور پانی کی صفائی (واٹر پیوریفیکیشن) کے بنیادی ڈھانچے کو نشانہ بنائے گی۔ ایران کی فوج کا یہ بیان صدر ڈونالڈ ٹرمپ کی دھمکی کے جواب میں آیا ہے۔ ڈونالڈ ٹرمپ نے دھمکی دی ہے کہ اگر آبنائے ہرمز کو 48 گھنٹے کے اندر نہیں کھولا گیا تو وہ ایران کے پاور پلانٹ کو مکمل طور پر تباہ کر دیں گے۔
ایران کی فارس نیوز ایجنسی کی رپورٹ کے مطابق، اس کے بعد ایران کی فوج نے کہا، ’’ہماری گزشتہ وارننگ کے بعد اگر دشمن (امریکہ) نے ایران کے ایندھن اور توانائی کے بنیادی ڈھانچے کو نقصان پہنچایا، تو مشرقِ وسطیٰ میں امریکہ اور اس کی حامی حکومتوں سے وابستہ تمام توانائی، انفارمیشن ٹیکنالوجی اور پانی کی صفائی کے بنیادی ڈھانچے کو نشانہ بنایا جائے گا۔‘‘
اس دوران سپاہ پاسداران انقلاب اسلامی کی ایرواسپیس فورس کے کمانڈر بریگیڈیئر جنرل سید ماجد موسوی نے کہا کہ اسرائیل کے آسمان پر ایرانی میزائلوں کا کنٹرول ہے۔ انہوں نے کہا کہ ایران نے بین الاقوامی ایٹمی توانائی ایجنسی کو نتنز میں اپنی ایٹمی تنصیبات پر امریکہ اور اسرائیل کے حملے کے بارے میں مطلع کر دیا ہے۔
سپاہ پاسداران انقلاب اسلامی کی بحریہ کے کمانڈر، ریئر ایڈمرل علی رضا تنگسیری نے امریکہ کو سخت وارننگ دیتے ہوئے کہا کہ اگر حملہ ہوا، تو خلیج فارس میں موجود ایرانی جزیرے امریکی فوجیوں کے لیے قبرستان بن جائیں گے۔ تنگسیری نے کہا کہ متحدہ عرب امارات کے المہند ایئر بیس اور کویت کے علی السالم ایئر بیس پر موجود ٹھکانوں کو تباہ کیا جا چکا ہے۔
ہندوستھان سماچار
---------------
ہندوستان سماچار / انظر حسن
