نئی دہلی، 22 مارچ (ہ س)۔

مرکزی کوئلہ اور کان کنی کے وزیر جی کشن ریڈی 23 مارچ کو اہم اور اسٹریٹجک معدنیات بلاکس کی نیلامی کے ساتویں مرحلے کا آغاز کریں گے۔ ان کے ساتھ ریاستی وزیر ستیش چندر دوبے بھی ہوں گے۔

مرکزی کان کنی کی وزارت کے مطابق، ان معدنیات کی اہمیت کو دیکھتے ہوئے، حکومت نے 17 اگست 2023 کو مائنز اینڈ منرلز (ڈیولپمنٹ اینڈ ریگولیشن) ایکٹ، 1957 میں ترمیم کی تھی۔ اس ترمیم کے تحت 24 معدنیات کو اہم اور اسٹریٹجک زمرے میں شامل کیا گیا ہے۔ یہ ترمیم مرکزی حکومت کو ان معدنیات کے لیے کان کنی کے لیز اور کمپوزٹ لائسنسوں کو نیلام کرنے کا اختیار دیتی ہے۔ نیلامی سے حاصل ہونے والی رقم متعلقہ ریاستی حکومتوں کو جائے گی۔

وزارت نے اب تک چھ نیلامی کے مراحل کے ذریعے 46 بلاکس کو کامیابی سے نوازا ہے۔ ساتویں مرحلے میں مختلف ریاستوں میں 19 بلاکس کی نیلامی ہوگی۔ یہ بلاکس صاف توانائی، جدید ٹیکنالوجی، کھاد اور اسٹریٹجک صنعتوں کے لیے ضروری معدنیات سے متعلق ہیں۔

حکومت نے نیلامی کے عمل کو مزید شفاف اور تیز تر بنانے کے لیے اصلاحات بھی کی ہیں۔ معدنیات (نیلامی) کے دوسرے ترمیمی قواعد، 2025، اور معدنیات (نیلامی) ترمیمی قواعد، 2026، نیلامی کے بعد کے طریقہ کار کو آسان بناتے ہیں۔ بینک گارنٹی کے متبادل کے طور پر انشورنس سیکیورٹی بانڈز بھی متعارف کرائے گئے ہیں۔

نیلامی مکمل طور پر آن لائن اور دو مراحل پر مشتمل شفاف عمل کے ذریعے کی جائے گی جس میں سب سے زیادہ بولی لگانے والے کو بلاکس مختص کیے جائیں گے۔

وزارت نے کہا کہ صاف توانائی اور جدید ٹیکنالوجی کی طرف عالمی تبدیلی نے معدنیات جیسے لیتھیم، گریفائٹ، نایاب زمینی عناصر، ٹنگسٹن، وینیڈیم اور ٹائٹینیم کی مانگ میں تیزی سے اضافہ کیا ہے۔

ہندوستھان سماچار

ہندوستان سماچار / عطاءاللہ