جموں, 17 مارچ (ہ س)شیو سینا کی جموں و کشمیر اکائی نے مجوزہ پنچایتی انتخابات پر سخت اعتراض ظاہر کرتے ہوئے خبردار کیا ہے کہ اگر نئی مردم شماری اور شفاف حلقہ بندی کے بغیر انتخابات کرائے گئے تو اس کے خلاف عوامی تحریک شروع کی جائے گی۔

پارٹی کے ریاستی صدر منیش ساہنی نے جموں میں ایک پریس کانفرنس سے خطاب کرتے ہوئے کہا کہ انتظامیہ 2011 کی مردم شماری کے اعداد و شمار کی بنیاد پر انتخابات کی تیاری کر رہی ہے، جو ناقابل قبول ہے۔ انہوں نے کہا کہ پسماندہ طبقات کو منصفانہ ریزرویشن دینے کے لیے تازہ اور درست مردم شماری ناگزیر ہے۔

انہوں نے واضح کیا کہ پنچایت اور بلدیاتی انتخابات میں غیر مقامی افراد کو ووٹر یا امیدوار بنانے کی کسی بھی کوشش کو برداشت نہیں کیا جائے گا۔ ان کے مطابق صرف جائز ڈومیسائل رکھنے والے افراد کو ہی ووٹ دینے اور انتخاب لڑنے کا حق ہونا چاہیے کیونکہ مقامی اداروں پر پہلا حق مقامی باشندوں کا ہے۔

منیش ساہنی نے مزید کہا کہ جموں کے عوام نے قومی مفاد میں آرٹیکل 370 کی منسوخی کی حمایت کی تھی، لیکن اب خود کو نظر انداز محسوس کر رہے ہیں۔ انہوں نے مطالبہ کیا کہ پہلے نئی مردم شماری کرائی جائے، پھر حلقہ بندی کی جائے اور اس کے بعد ہی پنچایتی انتخابات منعقد کیے جائیں۔

ہندوستھان سماچار

---------------

ہندوستان سماچار / محمد اصغر