لاتور، 13 مارچ (ہ س)۔ مہاراشٹر کے ضلع لاتور کے نلنگا بس اسٹیشن میں پیش آنے والی آتشزدگی کے حادثے میں شدید زخمی ہونے والے ایس ٹی کارپوریشن کے آپریٹر بسوراج مٹھپتی کا دوران علاج انتقال ہو گیا ہے۔ یہ حادثہ 13 مارچ کی رات اس وقت پیش آیا جب ڈیزل پمپ پر ایک بس میں ایندھن بھرا جا رہا تھا۔اطلاعات کے مطابق جمعرات کی رات تقریباً 8 بجے ڈیزل بھرنے کے دوران اچانک تکنیکی خرابی کے باعث چنگاری پیدا ہوئی جس کے بعد اچانک آگ کا بڑا شعلہ بھڑک اٹھا۔ آگ تیزی سے پھیل گئی اور وہاں موجود آپریٹر بسوراج مٹھپتی اس کی لپیٹ میں آ کر شدید زخمی ہو گئے۔ حادثے کے بعد انہیں فوری طور پر نلنگا کے سب ڈسٹرکٹ اسپتال پہنچایا گیا اور بعد میں بہتر علاج کے لیے لاتور منتقل کیا گیا، لیکن شدید جھلسنے کے باعث وہ جانبر نہ ہو سکے اور ان کا انتقال ہو گیا۔اس دوران آگ کی شدت اتنی زیادہ تھی کہ تقریباً آدھے گھنٹے تک علاقے میں آگ کے شعلے اور دھواں دکھائی دیتے رہے ۔ اس حادثے میں متعلقہ ایس ٹی بس مکمل طور پر جل گئی اور مہاراشٹر اسٹیٹ ٹرانسپورٹ کارپوریشن کو لاکھوں روپے کا مالی نقصان اٹھانا پڑا۔ واقعہ کی اطلاع ملنے پر نلنگا میونسپلٹی کے کونسلر ایشور پاٹل نے فوری طور پر فائر بریگیڈ کو طلب کیا۔ چونکہ ڈیزل پمپ کے نزدیک ایندھن کا بڑا ذخیرہ موجود تھا اس لیے کسی بڑے دھماکے کا خطرہ پیدا ہو گیا تھا، تاہم فائر بریگیڈ کے اہلکاروں نے بروقت کارروائی کرتے ہوئے آگ پر قابو پا لیا اور بڑے نقصان کو ٹال دیا۔پولیس اور انتظامیہ کی جانب سے اس واقعہ کی تفصیلی تحقیقات جاری ہیں۔ اس حادثے کے بعد نلنگا شہر میں غم و افسوس کی لہر پھیل گئی ہے اور بس ڈپو میں حفاظتی انتظامات کے بارے میں ایک بار پھر سوالات اٹھائے جا رہے ہیں۔

ہندوستھان سماچار

--------------------

ہندوستان سماچار / جاوید این اے