بھوپال، یکم مارچ (ہ س)۔ اس بار مارچ میں مدھیہ پردیش میں گرمی تیور دکھائے گی۔ کئی شہروں میں درجہ حرارت 40 ڈگری سیلسیس سے اوپر جانے کا امکان ہے۔ مہینے کی شروعات ہلکی بارش سے ہو سکتی ہے، لیکن دوسرے ہفتے سے گرمی کا اثر تیزی سے بڑھے گا۔ دن کے ساتھ ساتھ رات کا درجہ حرارت بھی بڑھنے لگے گا۔

محکمہ موسمیات کے مطابق، مارچ سے مئی کے درمیان ریاست میں معمول سے زیادہ درجہ حرارت رہنے کا امکان ہے۔ گرمی کا اثر مارچ سے ہی دکھنے لگے گا، جبکہ لو (ہیٹ ویو) کا زیادہ اثر اپریل اور مئی میں رہنے کا خدشہ ہے۔ اس دوران دن اور رات دونوں کے درجہ حرارت میں اضافہ درج کیا جائے گا۔ 4 مارچ کی رات سے مغربی ہمالیائی خطے میں فعال ہو رہے نئے ویسٹرن ڈسٹربنس کا اثر دو دن بعد مدھیہ پردیش میں بھی دکھ سکتا ہے۔ کچھ علاقوں میں ہلکی بارش کا امکان ہے۔ اس کے بعد درجہ حرارت میں 2 سے 3 ڈگری سیلسیس تک اضافے کے آثار ہیں۔ اگلے چار دنوں میں زیادہ سے زیادہ درجہ حرارت مسلسل اوپر جائے گا۔

ہفتہ کو ریاست کے 30 شہروں میں زیادہ سے زیادہ درجہ حرارت 30 ڈگری یا اس سے زیادہ درج کیا گیا۔ بھوپال میں 32.4 ڈگری، اندور میں 31.1 ڈگری، گوالیار میں 32.5 ڈگری، اجین میں 30.5 ڈگری اور جبل پور میں 33.4 ڈگری درجہ حرارت درج کیا گیا۔ سب سے زیادہ 35 ڈگری درجہ حرارت کھرگون میں ریکارڈ کیا گیا۔

گزشتہ 10 سالوں کے اعداد و شمار کے مطابق، مارچ میں ریاست میں دن گرم، راتیں ٹھنڈی اور بیچ بیچ میں بارش کا رجحان رہا ہے۔ اس بار بھی ایسا ہی مزاج رہنے کے اشارے ہیں۔ بھوپال، اندور اور اجین میں زیادہ سے زیادہ درجہ حرارت 40 ڈگری کے پار جا سکتا ہے، جبکہ رات کا درجہ حرارت 10 سے 17 ڈگری کے درمیان رہنے کا اندازہ ہے۔ گوالیار میں مارچ کے دوران موسم میں سب سے زیادہ اتار چڑھاؤ دیکھنے کو ملتا ہے۔ یہاں رات کا درجہ حرارت 8 ڈگری تک پہنچ چکا ہے۔ وہیں جبل پور میں دن میں تیز گرمی اور رات میں ٹھنڈ کا اثر رہتا ہے۔

محکمہ موسمیات کے مطابق، اس سال اپریل اور مئی سب سے زیادہ گرم رہنے والے ہیں۔ گوالیار، چمبل، جبل پور، ریوا، شہڈول اور ساگر ڈویژن کے اضلاع میں درجہ حرارت 45 ڈگری کے پار جا سکتا ہے۔ بھوپال، اندور، اجین اور نرمداپورم ڈویژن میں بھی تیز گرمی کے آثار ہیں۔

ہندوستھان سماچار

---------------

ہندوستان سماچار / انظر حسن