نئی دہلی، 4 فروری (ہ س): نیشنل ٹیسٹنگ سینٹر (این ٹی ایچ) نے الیکٹرانکس اور انفارمیشن ٹیکنالوجی کی وزارت (میئی ٹی وائی) کے تحت اسٹینڈرڈائزیشن ٹیسٹنگ اینڈ کوالٹی سرٹیفکیشن (ایس ٹی کیو سی) ڈائریکٹوریٹ کی الیکٹرانکس ریجنل ٹیسٹنگ لیبارٹری (نارتھ) — ای آر ٹی ایل (نارتھ) کے ساتھ تعاون کا معاہدہ کیا ہے۔

صارفین کے امور، خوراک اور عوامی تقسیم کی وزارت نے بدھ کے روز جاری ایک بیان میں کہا کہ اس نئی شراکت داری سے بھارت کے ڈرون سرٹیفکیشن نظام کو مضبوطی ملے گی، جبکہ یہ تعاون سلامتی، صلاحیت اور عالمی سطح پر قبولیت کو فروغ دے گا۔ اس معاہدے کے تحت ڈرونز کی برقی مقناطیسی مداخلت اور برقی مقناطیسی مطابقت کی جانچ ممکن ہو سکے گی، جس سے بھارت کے ڈرون ٹیسٹنگ اور سرٹیفکیشن کے ڈھانچے کو مزید تقویت حاصل ہوگی۔

وزارت کے مطابق یہ تعاون ڈرون قوانین 2021 اور بغیر پائلٹ فضائی نظاموں کے لیے سرٹیفکیشن اسکیم 2022 کے تحت ایک اہم ریگولیٹری ضرورت کو پورا کرتا ہے۔ اس کے ساتھ ہی یہ بھارت کی محفوظ، قابلِ اعتماد اور بین الاقوامی معیارات پر پورا اترنے والے بغیر پائلٹ فضائی نظاموں کی سرٹیفکیشن صلاحیت میں نمایاں اضافہ کرے گا۔

صارفین کے امور، خوراک اور عوامی تقسیم کی وزارت کے مطابق، این ٹی ایچ نے مرکزی حکومت کے ’میک اِن انڈیا‘، ’آتم نربھر بھارت‘ اور ’وژن 2047‘ کے عزم کو مضبوط کرتے ہوئے بھارت کو محفوظ، قابلِ اعتماد اور مصدقہ ڈرون ٹیکنالوجیز کے لیے عالمی سطح پر ایک مسابقتی مرکز بنانے کی سمت ایک اہم قدم اٹھایا ہے۔

قابلِ ذکر ہے کہ این ٹی ایچ حکومتِ ہند کا ایک اہم سائنسی اور ٹیسٹنگ ادارہ ہے۔ اس کی بنیاد 1912 میں رکھی گئی تھی۔ یہ صارفین کے امور کے محکمے، وزارتِ صارفین کے امور، خوراک اور عوامی تقسیم کے تحت کام کرتا ہے۔ این اے بی ایل سے منظور شدہ لیبارٹریوں کے ملک گیر نیٹ ورک کے ساتھ، قومی ٹیسٹنگ مرکز مختلف شعبوں میں جانچ، معائنہ، معیار کی یقین دہانی اور سرٹیفکیشن کی خدمات فراہم کرتا ہے۔

ہندوستھان سماچار

---------------

ہندوستان سماچار / عبدالواحد