نئی دہلی، 8 نومبر (ہ س)۔ دیوالی کے موقع پر روایتی طور پر منعقد ہونے والے مہورت ٹریڈنگ سیشن کے دوران گھریلو شیئر بازار معمولی گراوٹ کے ساتھ بند ہوا۔ آج ایک گھنٹے کے خصوصی کاروبار کے دوران مسلسل اتار چڑھاؤ کا ماحول بنا رہا، جس میں آخرکار مندی کا پلڑا بھاری رہا۔ حالانکہ آج کاروبار کا آغاز مضبوطی کے ساتھ ہوا تھا، لیکن فروخت کے دباؤ کی وجہ سے یہ برتری آخر تک برقرار نہیں رہ سکی۔
بینکنگ اور آئی ٹی سیکٹر کی بڑی کمپنیوں کے شیئرز میں اونچی سطح پر منافع وصول کرنے اور فروخت کے شدید دباؤ کے باعث گھریلو بازار اپنی ابتدائی برتری برقرار رکھنے میں ناکام رہا۔ تاہم، سینسیکس اور نفٹی دونوں انڈیکس میں معمولی گراوٹ کے باوجود وسیع بازار میں چھوٹے اور درمیانے درجے کے شیئرز کے تئیں خریداروں کا جوش برقرار رہا۔ اس کاروباری سال کے پہلے خصوصی ایک گھنٹے کی ٹریڈنگ کے بعد بمبئی اسٹاک ایکسچینج (بی ایس ای) کا سینسیکس 0.04 فیصد اور نیشنل اسٹاک ایکسچینج (این ایس ای) کا نفٹی 0.18 فیصد کی کمزوری کے ساتھ بند ہوا۔
آج دوپہر مہورت ٹریڈنگ کے خصوصی سیشن کے لیے کھلے بی ایس ای کے سینسیکس نے 271.32 پوائنٹس یعنی 0.33 فیصد کی مضبوطی کے ساتھ 81,299.34 پوائنٹس کی سطح سے کاروبار کا آغاز کیا۔ بازار کھلتے ہی فارما اور میٹل سیکٹر کی منتخب بڑی کمپنیوں میں زبردست خریداری کے تعاون سے یہ انڈیکس 414.09 پوائنٹس یعنی 0.51 فیصد اضافہ کے ساتھ 81,442.11 پوائنٹس کی بلند ترین سطح پر پہنچ گیا۔ تاہم یہ تیزی زیادہ دیر تک برقرار نہیں رہ سکی۔
سینسیکس کے بلند ترین سطح پر پہنچنے کے بعد ادارہ جاتی سرمایہ کاروں اور ٹریڈرز نے بینکنگ اور آئی ٹی اسٹاکس میں منافع وصول کرنا شروع کر دیا، جس سے یہ انڈیکس اپنی بلند سطح سے نیچے گر گیا۔ مسلسل فروخت کے دباؤ میں سینسیکس دن کی بلند ترین سطح سے 509.69 پوائنٹس پھسل کر 95.60 پوائنٹس یعنی 0.12 فیصد کی گراوٹ کے ساتھ 80,932.42 پوائنٹس کی نچلی سطح تک پہنچ گیا۔ آخر میں کلوزنگ آکشن کے بعد سینسیکس دن کی نچلی سطح سے 66.98 پوائنٹس کی معمولی بحالی کرتے ہوئے 28.62 پوائنٹس یعنی 0.04 فیصد کی کمزوری کے ساتھ 80,999.40 پوائنٹس پر بند ہوا۔
سینسیکس کی طرح نیشنل اسٹاک ایکسچینج کے نفٹی نے بھی آج خصوصی مہورت سیشن کا آغاز 40.10 پوائنٹس یعنی 0.16 فیصد کی تیزی کے ساتھ 25,070.45 پوائنٹس کی سطح سے کیا۔ بازار کھلتے ہی فارما اور میڈیا شیئرز کی زبردست خریداری کے باعث نفٹی 101.50 پوائنٹس یعنی 0.41 فیصد کی مضبوطی کے ساتھ 25,131.85 پوائنٹس کی بلند ترین سطح تک پہنچ گیا۔ اس کے بعد بازار میں فروخت کا دباؤ بڑھ گیا، جس کی وجہ سے یہ انڈیکس نیچے گرنے لگا۔
دن کے سودوں کے تصفیے اور بھاری فروخت کا سلسلہ شروع ہونے کے باعث نفٹی اپنی تمام برتری گنوا کر دن کی بلند ترین سطح سے 145.45 پوائنٹس پھسل گیا اور 45.05 پوائنٹس یعنی 0.178 فیصد کی کمزوری کے ساتھ 24,985.30 پوائنٹس کی سطح تک گر گیا۔ پورے سیشن کے کاروبار کے بعد نفٹی 43.95 پوائنٹس یعنی 0.18 فیصد کی گراوٹ کے ساتھ 24,986.40 پوائنٹس پر بند ہوا۔
آج ایک گھنٹے کے اس خصوصی کاروبار کے دوران مختلف سیکٹروں میں ملا جلا رجحان دیکھنے کو ملا۔ نفٹی میڈیا انڈیکس 1.79 فیصد کی چھلانگ لگا کر سب سے آگے رہا۔ اس کے علاوہ ہیلتھ کیئر سیکٹر بھی خریداروں کی توجہ کا مرکز بنا رہا، جس کے باعث نفٹی فارما انڈیکس 1.74 فیصد اور نفٹی میٹل انڈیکس 1.15 فیصد کی اچھی مضبوطی درج کرنے میں کامیاب رہے۔ دوسری جانب نفٹی آئی ٹی انڈیکس 0.33 فیصد اور سرکاری بینکوں کا پی ایس یو بینک انڈیکس 0.32 فیصد کی کمزوری کے ساتھ سرخ نشان میں بند ہوئے۔
شیئر بازار کے ان اہم اشاریوں کی گراوٹ کے برخلاف آج وسیع بازار نے شاندار مضبوطی دکھائی۔ نفٹی اسمال کیپ 100 انڈیکس 0.94 فیصد کی مضبوطی کے ساتھ بند ہوا، جبکہ نفٹی مڈ کیپ 100 انڈیکس بھی 0.13 فیصد کی تیزی درج کرنے میں کامیاب رہا۔ وسیع بازار کی اس تیزی کے باعث چھوٹے سرمایہ کاروں کے پورٹ فولیو کی رونق ماند پڑنے کے بجائے عام طور پر برقرار رہی۔
آج مہورت سیشن کے دوران بی ایس ای کے ایڈوانس-ڈیکلائن اعداد و شمار پر نظر ڈالیں تو اہم انڈیکس میں مندی کے باوجود بازار میں تیزی کا رجحان پوری طرح غالب نظر آیا۔ آج کے کاروبار کے دوران بی ایس ای میں 4,237 شیئرز میں فعال ٹریڈنگ ہوئی۔ ان میں 3,136 شیئرز اضافہ کے ساتھ بند ہوئے، جبکہ 913 شیئرز میں گراوٹ درج کی گئی اور 188 شیئرز بغیر کسی اتار چڑھاؤ کے بند ہوئے۔
این ایس ای میں آج 3,228 شیئرز میں فعال ٹریڈنگ ہوئی۔ ان میں سے 2,597 شیئرز منافع کے ساتھ سبز نشان میں اور 631 شیئرز نقصان کے ساتھ سرخ نشان میں بند ہوئے۔ اسی طرح سینسیکس میں شامل 30 شیئرز میں سے 14 شیئرز اضافہ کے ساتھ، 14 شیئرز گراوٹ کے ساتھ اور دو شیئرز بغیر کسی اتار چڑھاؤ کے بند ہوئے۔ جبکہ نفٹی میں شامل 50 شیئرز میں سے 17 شیئرز سبز نشان میں، 32 شیئرز سرخ نشان میں اور ایک شیئر بغیر کسی اتار چڑھاؤ کے بند ہوا۔
آج دیوالی کے اس خصوصی سیشن کے بعد نیشنل اسٹاک ایکسچینج پر سن فارماسیوٹیکلز کے شیئرز 2.96 فیصد کی زبردست تیزی کے ساتھ 1,915 روپے پر بند ہو کر ٹاپ گینر رہے۔ اس کے بعد ٹاٹا اسٹیل 2.09 فیصد کی چھلانگ لگا کر 190.20 روپے، آئل اینڈ نیچرل گیس کارپوریشن (او این جی سی) 1.31 فیصد اضافہ کے ساتھ 234.80 روپے، ٹی ایم پی وی 1.13 فیصد کے اضافے کے ساتھ 295.30 روپے اور اڈانی پورٹس 0.66 فیصد کی مضبوطی کے ساتھ 1,949.30 روپے پر بند ہوئے۔ یہ آج کے پانچ بڑے فائدہ اٹھانے والے شیئرز رہے۔
دوسری جانب مندی کی زد میں رہنے والی بڑی کمپنیوں میں ایس بی آئی لائف انشورنس 1.11 فیصد کی گراوٹ کے ساتھ 1,764.20 روپے پر بند ہو کر ٹاپ لوزر رہی۔ اس کے علاوہ انٹرگلوب ایوی ایشن (انڈیگو) 1.07 فیصد کی کمزوری کے ساتھ 5,417.30 روپے، بھارتی ایئرٹیل 1.03 فیصد کی گراوٹ کے ساتھ 2,085.50 روپے، میکس ہیلتھ کیئر 0.86 فیصد کی مندی کے ساتھ 926 روپے اور ٹرینٹ لمیٹڈ 0.70 فیصد کی گراوٹ کے ساتھ 3,057.50 روپے پر بند ہوا۔ یہ آج کے پانچ بڑے نقصان اٹھانے والے شیئرز میں شامل رہے۔
ہندوستھان سماچار
---------------
ہندوستھان سماچار / عبدالسلام صدیقی
