نئی دہلی، 8 نومبر (ہ س)۔ جنوبی افریقہ کے آئندہ دورے سے قبل بنگلہ دیش کرکٹ ٹیم کے سلامی بلے باز شادمان اسلام ٹخنے کی چوٹ کے باعث پورے دورے سے باہر ہو گئے ہیں۔ بنگلہ دیش کی ٹیم اس ماہ جنوبی افریقہ میں دو ٹیسٹ میچ کھیلے گی، جس کے بعد تین ون ڈے اور تین ٹی20 بین الاقوامی میچوں کی سیریز ہوگی۔

کرک بز کی رپورٹ کے مطابق، بنگلہ دیش کے شہر سلہٹ میں ویسٹ انڈیز کے خلاف دوسرے ٹیسٹ میچ کے دوسرے دن بلے بازی کے دوران شادمان کا ٹخنہ مڑ گیا تھا۔ چوٹ سنگین ہونے کے باعث انہیں جنوبی افریقہ کے دورے سے باہر ہونا پڑا ہے۔ سلیکشن پینل کے ایک رکن نے کرک بز کو بتایا کہ شادمان جنوبی افریقہ کے دورے کے لیے دستیاب نہیں ہوں گے۔ ان کے مطابق سلامی بلے باز کے ٹخنے میں ٹشوز پھٹ گئے ہیں اور ساتھ ہی فریکچر ہونے کا بھی خدشہ ہے۔

مانا جا رہا ہے کہ سلہٹ میں ویسٹ انڈیز کے خلاف جاری دوسرے ٹیسٹ میچ میں بنگلہ دیش کی ٹیم ایک کھلاڑی کم کے ساتھ بلے بازی کرے گی۔

کرک بز کے مطابق، سلامی بلے باز محفوظ الاسلام رابن کو جنوبی افریقہ کے دورے کے لیے ٹیسٹ ٹیم میں شامل کیا جا سکتا ہے۔ محفوظ اس وقت سلہٹ میں ٹیسٹ ٹیم کے ساتھ موجود ہیں۔

بنگلہ دیش کی ٹیم 10 نومبر کو ڈھاکہ سے جنوبی افریقہ کے لیے روانہ ہوگی۔ وہاں ٹیم دو میچوں کی ٹیسٹ سیریز کھیلے گی، جس کے بعد تین ون ڈے اور تین ٹی20 میچ کھیلے جائیں گے۔ پہلا ٹیسٹ 15 سے 19 نومبر تک جبکہ دوسرا ٹیسٹ 23 سے 27 نومبر تک کھیلا جائے گا۔

ہندوستھان سماچار

---------------

ہندوستھان سماچار / عبدالواحد