ٹويوٹا انووا کرسٹا کا لیمو ایڈیشن متعارف، کمرشل مسافر برداری کے لیے خصوصی سہولتیں، ابتدائی قیمت 19 لاکھ 95 ہزار روپے
ممبئی ، 7 نومبر (ہ س)۔ گاڑیاں بنانے والی کمپنی ٹویوٹا کرلوسکر موٹر نے ہندوستانی بازار میں اپنی مقبول انووا کرسٹا کا لیمو ایڈیشن متعارف کرایا ہے۔ یہ خصوصی ایڈیشن گاڑیاں کرائے پر چلانے والے کاروباری افراد اور مسافر برداری کی خدمات فراہم کرنے والے صارفین کے لیے پیش کیا گیا ہے۔ کمپنی کے مطابق یہ ایڈیشن صرف جی ایکس ایس ایل ایف زمرے میں دستیاب ہے۔ اس میں 2.4 لیٹر ڈیزل انجن اور آرام دہ کیپٹن سیٹیں فراہم کی گئی ہیں۔ طویل مسافت کے سفر میں مسافروں کو زیادہ آرام اور کشادہ جگہ فراہم کرنے پر توجہ دی گئی ہے۔
کمپنی نے واضح کیا کہ لیمو ایڈیشن کے انجن یا تکنیکی ساخت میں کوئی تبدیلی نہیں کی گئی ہے۔ یہ پہلے سے فروخت ہونے والے فلیٹ ماڈل کی نئی شناخت ہے، نہ کہ مکمل طور پر نئی گاڑی۔ جی ایکس فلیٹ کے 7 نشستوں والے ماڈل کی ابتدائی شوروم قیمت 19.95 لاکھ روپے اور 8 نشستوں والے ماڈل کی 19.99 لاکھ روپے مقرر کی گئی ہے۔ یہ قیمتیں ممبئی سمیت ملک بھر کے شورومز کے لیے بتائی گئی ہیں۔
گاڑی میں کشادہ کیبن، ضرورت کے مطابق تبدیل کی جاسکنے والی نشستوں کی ترتیب، تمام قطاروں کے لیے ایئرکنڈیشننگ اور سر و ٹانگوں کے لیے مناسب جگہ موجود ہے۔ اس کے علاوہ اسمارٹ فون کنیکٹیویٹی کے ساتھ ٹچ اسکرین انفوٹینمنٹ سسٹم اور اسٹیئرنگ پر کنٹرولز دیے گئے ہیں۔ حفاظتی سہولتوں میں 7 ایئربیگز، اینٹی لاک بریکنگ سسٹم، وہیکل اسٹیبلٹی کنٹرول، ہل اسٹارٹ اسسٹ، الیکٹرانک بریک فورس ڈسٹری بیوشن اور بریک اسسٹ شامل ہیں۔ کمپنی کی فراہم کردہ معلومات کے مطابق گاڑی ایک لیٹر ایندھن میں 15 کلومیٹر تک چل سکتی ہے اور اس میں مینوئل گیئرباکس دیا گیا ہے۔
ٹویوٹا کرلوسکر موٹر کے سیلز، سروس اور استعمال شدہ گاڑیوں کے کاروبار کے ایگزیکٹو نائب صدر سبری منوہر نے کہا کہ انووا نے 2 دہائیوں سے زیادہ عرصے میں اعتماد، آرام اور معیاری سفر کے ذریعے صارفین میں اپنی شناخت قائم کی ہے۔ ان کے مطابق کمپنی انووا کرسٹا لیمو کے ذریعے کمرشل مسافر برداری کے شعبے میں اسی روایت کو نئی شناخت کے ساتھ آگے بڑھانا چاہتی ہے۔
ہندوستھان سماچار
ہندوستھان سماچار / جاوید این اے
