نئی دہلی، 06 نومبر (ہ س)۔ تیل اور گیس کی صنعت کے درمیانی اور زیریں شعبوں میں کام کرنے والی معروف تعمیراتی اور منصوبہ جاتی کمپنی ویکٹراس اینپروکون لمیٹڈ کے حصص نے آج حصص بازار میں معمولی اضافے کے ساتھ قدم رکھا۔ ابتدائی عوامی پیشکش کے تحت کمپنی کے حصص 105 روپے فی حصص کی قیمت پر جاری کیے گئے تھے۔ آج بمبئی حصص بازار کے چھوٹے اور درمیانے درجے کے اداروں کے مخصوص پلیٹ فارم پر اس کی لسٹنگ 0.95 فیصد اضافے کے ساتھ 106 روپے کی سطح پر ہوئی۔

لسٹنگ کے بعد خریداری کے باعث یہ حصص 107 روپے کی سطح تک پہنچ گئے، لیکن کچھ ہی دیر بعد فروخت کا دباو بڑھنے سے ان کی قیمت میں گراوٹ آگئی۔ بازار میں مسلسل خرید و فروخت کے درمیان تجارت کے بعد یہ حصص 108 روپے کی سطح پر کاروبار کررہے تھے۔ اس طرح اب تک کی تجارت میں کمپنی کے ابتدائی عوامی پیشکش کے سرمایہ کاروں کو فی حصص 3 روپے یعنی2.86 فیصد کا فائدہ ہوا۔

کمپنی کی 53.05 کروڑ روپے کی ابتدائی عوامی پیشکش 30 اکتوبر سے 3 نومبر کے درمیان سرمایہ کاری کے لیے کھلی تھی۔ اس پیشکش کو سرمایہ کاروں کی جانب سے اوسط درجے کا ردعمل ملا، جس کے باعث یہ مجموعی طور پر 3.28 گنا سبسکرائب کیا گیا۔

اس میں اہل ادارہ جاتی سرمایہ کاروں کے لیے مختص حصہ 1.41 گنا سبسکرائب کیا گیا۔ اسی طرح غیر ادارہ جاتی سرمایہ کاروں کے لیے مختص حصے کو 6.82 گنا سبسکرائب کیا گیا۔

اس کے علاوہ عام انفرادی سرمایہ کاروں کے لیے مختص حصہ 4.43 گنا سبسکرائب کیا گیا۔ اس ابتدائی عوامی پیشکش کے تحت 10 روپے کی بنیادی قیمت والے مجموعی طور پر 50.52 لاکھ حصص جاری کیے گئے ہیں۔ ان میں 42.59 کروڑ روپے مالیت کے 40.56 لاکھ نئے حصص شامل ہیں، جبکہ بانی سرمایہ کار نینیش کنوبھائی پٹیل اور مہیش کمار گوپال بھائی پٹیل کی جانب سے 10.46 کروڑ روپے مالیت کے 9.96 لاکھ حصص فروخت کیے گئے ہیں۔

اس ابتدائی عوامی پیشکش میں نئے حصص کی فروخت سے حاصل ہونے والی رقم میں سے 20 کروڑ روپے کمپنی کی روزمرہ کاروباری ضروریات اور جاری اخراجات پورے کرنے کے لیے استعمال کیے جائیں گے۔ اس کے علاوہ 14 کروڑ روپے کمپنی کے کچھ بقایا قرضوں کی مکمل یا جزوی ادائیگی کے لیے خرچ کیے جائیں گے۔ باقی رقم عمومی کاروباری مقاصد کے لیے استعمال ہوگی۔

کمپنی کی مالی حالت

ویکٹراس اینپروکون لمیٹڈ کی مالی حالت کا جائزہ لیا جائے تو بھارتی حصص و مبادلہ بورڈ میں جمع کرائے گئے ابتدائی معلوماتی دستاویز کے مطابق گزشتہ مالی برسوں کے دوران کمپنی کی مالی حالت میں مسلسل بہتری آئی ہے۔

مالی سال 2023تا2024 میں کمپنی کو 5.81 کروڑ روپے کا خالص منافع حاصل ہوا تھا، جو مالی سال 2024تا2025 میں بڑھ کر 10.17 کروڑ روپے ہوگیا۔ اس کے بعد مالی سال 2025تا2026 میں تقریباً 52 فیصد کے مزید زبردست اضافے کے ساتھ یہ 15.43 کروڑ روپے کی سطح پر پہنچ گیا۔ موجودہ مالی سال کے ابتدائی چھ ماہ یعنی 30 ستمبر 2026 تک ہی کمپنی 9.10 کروڑ روپے کا خالص منافع حاصل کرچکی تھی۔

ہندوستھان سماچار

---------------

ہندوستھان سماچار / عبدالسلام صدیقی