- بی ایس ای میں لسٹڈ کمپنیوں کا مارکیٹ کیپ 501 لاکھ کروڑ سے زیادہ ہوا
نئی دہلی، 05 نومبر (ہ س)۔
ہندوستانی شیئر بازار آج مسلسل چھٹے کاروباری دن مضبوطی کے ساتھ بند ہوا۔ امریکی وسط مدتی انتخابات میں اپوزیشن پارٹی ڈیموکریٹ کی شاندار کامیابی کے بعد عالمی بازاروں سے آئے مثبت اشاروں کے دم پر گھریلو بازار میں آج چہار طرفہ مضبوطی کا ماحول بنا رہا، جس کے سبب سرکردہ کمپنیوں کے شیئروں کے ساتھ ساتھ مڈ کیپ اور اسمال کیپ کمپنیوں کے شیئروں میں بھی جم کر خریداری ہوئی۔ چہار طرفہ خریداری کی حمایت سے اہم انڈیکس سینسیکس اور نفٹی دن کی بالائی سطح یعنی ڈے-ہائی کے بے حد قریب بند ہونے میں کامیاب رہے۔ دھنتیرس کے تہوار سے ٹھیک ایک دن پہلے آنے والی بازار کی اس تاریخی تیزی سے آج سرمایہ کاروں کی دولت میں 7 لاکھ کروڑ روپے سے زائد کا زبردست اضافہ ہو گیا۔
آج کے کاروبار کے دوران ابتدائی بیس منٹ کے بعد سے ہی بازار میں مسلسل زبردست تیزی کا رجحان بنا رہا۔ گلوبل مارکیٹ کے مثبت اشاروں کے درمیان خریدار پوری طرح حاوی نظر آئے۔ آج دن بھر کے کاروبار کے دوران سینسیکس اور نفٹی دونوں انڈیکسوں نے مسلسل اپنی برتری کو برقرار رکھا۔ آخری سیشن میں بازار میں خریداری اور زیادہ تیز ہو گئی، جس کی وجہ سے دونوں انڈیکس میں 2.5 فیصد سے بھی زیادہ کی تیزی آگئی ہے۔ تاہم، آخر میں ہوئی معمولی منافع وصولی کے سبب دونوں انڈیکس ڈے-ہائی سے تھوڑا نیچے پھسل گئے۔ دن بھر کے کاروبار کے بعد سینسیکس 2.60 فیصد اور نفٹی 2.40 فیصد کی زبردست مضبوطی کے ساتھ بند ہوئے۔
بی ایس ای کا سینسیکس آج 1,609.54 پوائنٹس یعنی 2.08 فیصد کے زبردست اضافے کے ساتھ 78,910.94 پوائنٹس کی سطح پر کھلا۔ کاروبار کی شروعات ہوتے ہی منافع وصولی شروع ہونے کے سبب یہ انڈیکس پہلے بیس منٹ میں ہی پھسل کر 78,520.56 پوائنٹس کی سطح تک گر گیا۔ اس کے بعد خریداروں نے خریداری کا زبردست زور بنا دیا، جس کے باعث یہ انڈیکس مسلسل اوپر کی جانب بڑھتا چلا گیا۔
دن کے کاروبار کے دوران بازار میں بینکنگ اور آٹوموبائل سیکٹر کے ہیوی ویٹ شیئروں میں جم کر خریداری ہوتی رہی۔ خاص کر، دن کے آخری سیشن میں ہوئی بمپر خریداری کی حمایت سے یہ انڈیکس 2,168.86 پوائنٹس یعنی 2.81 فیصد کی تیزی کے ساتھ 79,470.03 پوائنٹس کی سطح پر آ گیا۔ آخر میں انٹرا-ڈے سیٹلمنٹ کی وجہ سے آخری مرحلے میں ہوئی معمولی فروخت کے سبب سینسیکس دن کی بالائی سطح سے تھوڑا پھسل کر 2,008.61 پوائنٹس یعنی 2.60 فیصد کے شاندار اضافے کے ساتھ 79,310.01 پوائنٹس کی سطح پر پہنچ کر مسلسل چھٹے دن مضبوطی کے ساتھ بند ہوا۔
سینسیکس ہی کی طرح نیشنل اسٹاک ایکسچینج کے نفٹی نے بھی آج 417.45 پوائنٹس یعنی 1.74 فیصد کے زبردست اضافے کے ساتھ 24,378.05 پوائنٹس کی سطح سے اپنے کاروبار کی شروعات کی۔ بازار کھلتے ہی فروخت کا دباؤ بن جانے کی وجہ سے یہ انڈیکس ٹوٹ کر 24,296.30 پوائنٹس کی سطح پر آ گیا۔ پہلے بیس منٹ تک منافع وصولی کا دباؤ جھیلنے کے بعد بازار میں آٹو، فائنانس اور بینکنگ جیسی سرکردہ کمپنیوں کے شیئروں میں شروع ہوئی زبردست خریداری کے چلتے اس انڈیکس کی چال نے بھی طوفانی رفتار پکڑ لی۔
کاروبار کے دوران زیادہ تر وقت بازار میں خریداری کا زور بنا رہا، جس کے سبب نفٹی کی رفتار مسلسل بنی رہی۔ بازار میں مسلسل ہو رہی اس چہار طرفہ خریداری کی حمایت سے یہ انڈیکس تیزی سے آگے بڑھا اور کلوزنگ بنیاد پر طویل عرصے بعد 24,500 پوائنٹس کی نفسیاتی سطح کو پار کرنے میں کامیاب رہا۔ مسلسل ہو رہی خریداری کے دم پر نفٹی 619.30 پوائنٹس یعنی 2.58 فیصد کی مضبوطی کے ساتھ دن کی بالائی سطح 24,579.90 پوائنٹس کی سطح تک پہنچ گیا۔ تاہم، آخر میں دن کے سودوں کے نپٹارے کی وجہ سے یہ انڈیکس بالائی سطح سے 43.30 پوائنٹس کھسک کر 576 پوائنٹس یعنی 2.40 فیصد کی زبردست مضبوطی کے ساتھ 24,536.60 پوائنٹس کی سطح پر بند ہوا۔
آج دن بھر کے کاروبار کے دوران آٹوموبائل سیکٹر کے شیئروں میں سب سے زیادہ چمک نظر آئی، جہاں نفٹی آٹو انڈیکس 4 فیصد سے زیادہ کے اضافے کے ساتھ بند ہوا۔ اس کے علاوہ رئیلٹی انڈیکس میں 3.5 فیصد سے زیادہ کی تیزی درج کی گئی، جبکہ سرکاری اور پرائیویٹ دونوں بینکنگ انڈیکس نے بھی 3-3 فیصد سے زیادہ کی تیزی دکھائی۔ اس کے ساتھ ہی نفٹی آئی ٹی انڈیکس بھی آج تقریباً ڈھائی فیصد کے اضافے کے ساتھ سبز نشان میں بند ہوا۔ دوسری طرف، فارما سیکٹر کے شیئروں میں ابتدائی کاروبار کے دوران تقریباً نصف فیصد کی سستی دیکھی گئی، لیکن بعد میں وہ بھی ریکور کر کے ایک فیصد کی مضبوطی کے ساتھ بند ہونے میں کامیاب رہا۔
براڈر مارکیٹ اور سیکٹورل محاذ پر آج زیادہ تر انڈیکس دباؤ سے پوری طرح ابھر کر اضافہ درج کرنے میں کامیاب رہے۔ مڈ کیپ اور اسمال کیپ انڈیکس میں آج مسلسل مضبوطی بنی رہی۔ نفٹی کا مڈ کیپ 100 انڈیکس آج کے کاروبار کے اختتام پر 1.87 فیصد کے اضافے کے ساتھ بند ہوا۔ اسی طرح اسمال کیپ شیئروں میں بھی خریداروں کا زبردست اثر نظر آ رہا تھا، جس کی وجہ سے نفٹی کے اسمال کیپ 100 انڈیکس نے بھی 0.57 فیصد کی شاندار تیزی کے ساتھ آج کے کاروبار کا اختتام کیا۔
بازار کے دونوں اہم انڈیکسوں سینسیکس اور نفٹی میں آنے والی زبردست تیزی اور براڈر مارکیٹ میں ہوئی چہار طرفہ خریداری کے سبب آج سرمایہ کاروں کی دولت میں تقریباً 7.15 لاکھ کروڑ روپے کا اضافہ درج کیا گیا۔ بی ایس ای پر لسٹڈ کمپنیوں کا کل مارکیٹ کیپٹلائزیشن آج کے کاروبار کے بعد بڑھ کر 5,01,57,379.28 کروڑ روپے پر پہنچ گیا، جبکہ پچھلے کاروباری دن یہ 4,94,42,140.62 کروڑ روپے تھا۔ اس طرح بازار کی اس تیز چھلانگ کی بدولت سرمایہ کاروں کے سرمائے میں آج 7,15,238.66 کروڑ روپے کا بڑا اضافہ ہو گیا۔
آج دن بھر کے کاروبار کے دوران بی ایس ای کے ایڈوانس-ڈیکلائن اعداد و شمار پر نظر ڈالیں، تو بازار میں برتری کا رجحان پوری طرح حاوی تھا۔ آج پورے دن 4,647 شیئروں میں سرگرم کاروبار ہوا۔ ان میں سے 2,994 شیئر اضافے کے ساتھ سبز نشان میں بند ہونے میں کامیاب رہے، جبکہ 1,453 شیئروں کو نقصان جھیلنا پڑا اور وہ سرخ نشان میں بند ہوئے۔ 200 شیئر بغیر کسی اتار چڑھاؤ کے بند ہوئے۔
این ایس ای میں آج 3,329 شیئروں میں سرگرم کاروبار ہوا۔ ان میں سے 2,373 شیئر منافع کما کر سبز نشان میں اور 956 شیئر نقصان اٹھا کر سرخ نشان میں بند ہوئے۔ اسی طرح سینسیکس میں شامل 30 شیئروں میں سے 24 شیئر اضافے کے ساتھ اور 6 شیئر گراوٹ کے ساتھ بند ہوئے۔ نفٹی میں شامل 50 شیئروں میں سے 40 شیئر سبز نشان میں اور 10 شیئر سرخ نشان میں بند ہوئے۔ آج کے کاروبار میں 133 شیئر ایک سال کی بالائی سطح پر پہنچے، تو 69 شیئر ایک سال کی نچلی سطح پر آ گئے۔ اس کے ساتھ ہی آج 9 شیئروں میں اپر سرکٹ لگا، جبکہ 41 شیئر لوئر سرکٹ پر بند ہوئے۔
آج دن بھر کے کاروبار کے بعد نیشنل اسٹاک ایکسچینج پر بجاج فائنانس کے شیئر 7.65 فیصد کی طوفانی تیزی کے ساتھ 1,070 روپے کی قیمت پر بند ہو کر ٹاپ گینر رہے۔ اس کے بعد شری رام فائنانس 6.08 فیصد کی چھلانگ لگا کر 964 روپے، مہندرا اینڈ مہندرا 5.59 فیصد کے اضافے کے ساتھ 3,127.50 روپے، ماروتی سوزوکی 5.48 فیصد کی تیزی کے ساتھ 12,652 روپے اور ٹی ایم پی وی 5.46 فیصد کی مضبوطی کے ساتھ 293.70 روپے کی سطح پر آج کے ٹاپ 5 گینرز کی فہرست میں بند ہوئے۔
دوسری طرف، بازار کی اس بھاری تیزی کے باوجود فروخت کے دباؤ میں پھنسا اپولو ہاسپٹل 2.66 فیصد کی کمزوری دکھاتے ہوئے 8,371 روپے پر بند ہو کر ٹاپ لوزر رہا۔ اس کے علاوہ آئل اینڈ نیچرل گیس کارپوریشن (او این جی سی) 2.13 فیصد کی گراوٹ کے ساتھ 230 روپے، نیشنل تھرمل پاور کارپوریشن (این ٹی پی سی) 1.63 فیصد ٹوٹ کر 316.70 روپے، کول انڈیا 1.34 فیصد کی گراوٹ کے ساتھ 394.30 روپے اور بھارت الیکٹرانکس 0.73 فیصد کی گراوٹ کے ساتھ 395.10 روپے کی قیمت پر آج کے ٹاپ 5 لوزرز کی فہرست میں شامل ہوئے۔
---------------
ہندوستھان سماچار / انظر حسن
