نئی دہلی، 5 نومبر (ہ س)۔ جنوبی افریقہ کی مشہور ٹی 20 کرکٹ لیگ ایس اے 20 کا ہر سیزن کرکٹ کے جوش اور معیار کو نئی بلندیوں تک پہنچا رہا ہے۔ لیگ کے کمشنر اور سابق کپتان گریم اسمتھ کو یقین ہے کہ پانچواں سیزن بھی کرکٹ شائقین کے لیے ایک خاص تجربہ ثابت ہوگا۔ ان کا کہنا ہے کہ پانچواں ایڈیشن گزشتہ چار سیزنز میں کرکٹ کے معیار میں ہونے والی بہتری کے سلسلے کو آگے بڑھائے گا۔

گریم اسمتھ نے یہ بات جمعرات کو ایس اے 20 کے پانچویں سیزن کی مہم کے آغاز کے موقع پر کہی۔ یہ سیزن 17 جنوری سے 21 فروری 2027 تک منعقد ہوگا۔

انہوں نے کہا کہ ایس اے 20 کا پانچواں سیزن شروع کرتے ہوئے یہ بات واضح ہے کہ یہ لیگ آج بھی مکمل طور پر شائقین کی ہے۔ شائقین نے اسٹیڈیم کو کھچا کھچ بھر کر اپنے جوش و خروش سے ماحول کو خاص بنایا ہے۔ پانچواں سیزن ان کے تئیں اظہارِ تشکر کا ہمارا طریقہ ہے۔

انہوں نے مزید کہا کہ ہم ایک بار پھر دنیا کے بہترین ٹی 20 کھلاڑیوں کا جنوبی افریقہ میں استقبال کرنے کے لیے پرجوش ہیں۔ یہ کھلاڑی ہمارے پروٹیز ستاروں کے ساتھ میدان میں اتریں گے۔ اس کے علاوہ جنوبی افریقہ کے نوجوان اور ابھرتے ہوئے کھلاڑیوں کی صلاحیتیں دیکھنے کا موقع بھی ملے گا۔

گریم اسمتھ کے مطابق ہر سیزن کے ساتھ کرکٹ کا معیار بہتر ہو رہا ہے اور پانچویں سیزن میں بھی یہی سلسلہ جاری رہے گا۔ یہ لیگ ہر عمر اور ہر طبقے کے کرکٹ شائقین کے لیے ہے۔

سیزن کا پہلا مقابلہ 17 جنوری کو گکیبیرہا میں کھیلا جائے گا، جہاں تین مرتبہ کی چیمپئن سن رائزرز ایسٹرن کیپ کا مقابلہ پریٹوریا کیپٹلز سے ہوگا۔

لیگ کے مقابلے جنوبی افریقہ کے چھ بڑے شہروں پارل، پریٹوریا، ڈربن، کیپ ٹاؤن، جوہانسبرگ اور گکیبیرہا میں منعقد ہوں گے۔ ابتدائی ہفتے میں مسلسل دلچسپ مقابلے دیکھنے کو ملیں گے، جبکہ ہفتے کے آخر میں ایک ہی دن دو دو میچ کھیلے جائیں گے، جس سے شائقین کو دو مقابلوں سے لطف اندوز ہونے کا موقع ملے گا۔

ہندوستھان سماچار

---------------

ہندوستھان سماچار / عبدالواحد