نئی دہلی، 3 نومبر (ہ س): بھارتی خواتین کرکٹ ٹیم کے عالمی چیمپئن بننے کا کئی دہائیوں پرانا انتظار بالآخر 2 نومبر 2025 کو ختم ہوا تھا۔ اس دن بھارتی خواتین ٹیم نے پہلی مرتبہ ون ڈے ورلڈ کپ کا خطاب اپنے نام کیا تھا۔ اس تاریخی کامیابی کے ایک سال مکمل ہونے پر جیو اسٹار کے خصوصی پروگرام ’’سیلیبریٹنگ دی چیمپئنز‘‘ میں بھارتی ٹیم کی کھلاڑی پرتیکا راول اور شیفالی ورما نے ورلڈ کپ سے جڑی اپنی یادگار باتیں اور تجربات شیئر کیے۔ پرتیکا راول نے زمبابوے کے خلاف حال ہی میں اسی تاریخ کو سنچری بنانے کی دلچسپ کہانی سنائی، جس تاریخ کو انہوں نے 2025 کے ورلڈ کپ میں بھی سنچری بنائی تھی۔ اس کے علاوہ انہوں نے بنگلہ دیش کے خلاف میچ کے دوران زخمی ہونے اور ورلڈ کپ سے باہر ہونے کے مشکل وقت کو بھی یاد کیا۔ وہیں شیفالی ورما نے ٹورنامنٹ کے درمیان اچانک ٹیم میں شامل کیے جانے کے تجربے کے بارے میں بتایا۔

بھارتی بلے باز پرتیکا راول نے گزشتہ 23 اکتوبر کو زمبابوے کے خلاف ون ڈے سیریز کے پہلے میچ میں سنچری بنانے کے پیچھے کی دلچسپ کہانی بیان کی۔ انہوں نے بتایا کہ جب وہ بلے بازی کے لیے میدان میں اترنے والی تھیں، اس وقت ٹی وی پر 2025 ویمنز ورلڈ کپ میں بھارت اور نیوزی لینڈ کے درمیان کھیلے گئے میچ کی جھلکیاں دکھائی جا رہی تھیں۔ پرتیکا کے مطابق، ٹی وی پر ایک تاریخ کا ذکر دیکھ کر انہیں یاد آیا کہ اسی دن انہوں نے ورلڈ کپ میں بھی سنچری بنائی تھی۔

پرتیکا نے بتایا کہ ’’میں اس بارے میں اسمرتی دیدی اور امول سر (کوچ) کے ساتھ بات کر رہی تھی۔ ہم نے اسی لمحے اس کارنامے کو دوبارہ دہرانے کا فیصلہ کیا۔ اس کے بعد میں نے زمبابوے کے خلاف میچ میں سنچری بنائی۔ ایک ہی تاریخ پر دوبارہ سنچری بنانا میرے لیے انتہائی خاص تجربہ تھا۔‘‘

پرتیکا راول نے بنگلہ دیش کے خلاف میچ کے دوران لگی چوٹ اور اس کے نتیجے میں ورلڈ کپ سے باہر ہونے کے مشکل وقت کو بھی یاد کیا۔ انہوں نے کہا کہ ’’جب میں بنگلہ دیش کے خلاف میچ کے دوران گری، اسی وقت مجھے احساس ہو گیا تھا کہ کچھ گڑبڑ ہے۔ میں اپنے جسم کو اچھی طرح سمجھتی ہوں اور چوٹ کا اثر معمول کے مطابق نہیں لگ رہا تھا۔ ایکسرے میں فریکچر کی تصدیق ہوئی، جس کے بعد میرا ورلڈ کپ کا سفر ختم ہو گیا۔‘‘

انہوں نے کہا کہ ’’ورلڈ کپ کے دوران زخمی ہونا انتہائی افسوسناک تھا۔ تاہم، سیمی فائنل اور فائنل میں بھارتی ٹیم کو کھیلتے دیکھنا میرے لیے شاندار تجربہ رہا۔ میں نے اپنے والد کے ساتھ ہوٹل کے کمرے میں بیٹھ کر سیمی فائنل کا مقابلہ دیکھا اور ٹیم کی جیت کے لیے دعا کی۔ یہ میرے لیے جذبات سے بھرا وقت تھا، لیکن آس پاس موجود لوگوں کے تعاون نے مجھے ہمت دی۔‘‘

وہیں، شیفالی ورما نے بتایا کہ انہیں ویمنز ورلڈ کپ 2025 کے دوران بھارتی ٹیم میں شامل کیے جانے کی خبر ملی تھی۔ اس وقت وہ ہریانہ کی جانب سے ریاستی سطح کا میچ کھیل رہی تھیں۔ شیفالی نے بتایا کہ ’’میں ہریانہ کے لیے میچ کھیل رہی تھی، اسی دوران اچانک قومی ٹیم کے منیجر کا فون آیا۔ انہوں نے بتایا کہ ورلڈ کپ کے باقی میچوں کے لیے میرا انتخاب ہو گیا ہے۔ مجھے اس بات پر یقین ہی نہیں ہو رہا تھا۔‘‘

انہوں نے بتایا کہ اس دوران وہ سوشل میڈیا سے دور تھیں اور ورلڈ کپ کے میچوں پر بھی زیادہ توجہ نہیں دے رہی تھیں۔ وہ پوری طرح اپنے کھیل پر توجہ مرکوز کیے ہوئے تھیں۔

شیفالی کے مطابق، گزشتہ ایک سال کے دوران کی گئی محنت کا صلہ ملنے جیسا یہ تجربہ تھا۔ ٹیم کے کھلاڑیوں نے ان کا گرم جوشی سے استقبال کیا۔ اس کے بعد نیٹ سیشن میں پریکٹس کرکے انہوں نے خود کو حالات کے مطابق ڈھالا اور اپنی فارم حاصل کی۔ انہوں نے کہا کہ ڈومیسٹک کرکٹ میں مسلسل اچھی کارکردگی دکھانے سے ان کے اعتماد میں بھی اضافہ ہوا تھا۔

واضح رہے کہ بھارتی خواتین کرکٹ ٹیم نے 2 نومبر 2025 کو جنوبی افریقہ کو 52 رنز سے شکست دے کر پہلی مرتبہ آئی سی سی ویمنز ون ڈے ورلڈ کپ کا خطاب جیتا تھا۔

ہندوستھان سماچار

---------------

ہندوستھان سماچار / عبدالواحد