ناقابل تسخیر سائبر حفاظتی حصار سے محفوظ ہوگا اتر پردیش، ڈیٹا سے لے کر ڈیجیٹل بنیادی ڈھانچے تک کی جائے گی نگرانی
۔ 25 نومبر کو لکھنؤ میں حکومت، پولیس، ٹیکنالوجی اور صنعت سے وابستہ اہم شخصیات جمع ہوں گی ۔ اے آئی اور کوانٹم ٹیکنالوجی کے دور کے خطرات سے نمٹنے پر غور و خوض ہوگا لکھنؤ، 21 نومبر (ہ س)۔ مصنوعی ذہانت (اے آئی)، کوانٹم ٹیکنالوجی اور تیزی سے بدلتے ڈ
UP-WILL-BE-SECURED-BY-AN-IMPENETRABLE-CYBER-SHIELD


۔ 25 نومبر کو لکھنؤ میں حکومت، پولیس، ٹیکنالوجی اور صنعت سے وابستہ اہم شخصیات جمع ہوں گی

۔ اے آئی اور کوانٹم ٹیکنالوجی کے دور کے خطرات سے نمٹنے پر غور و خوض ہوگا

لکھنؤ، 21 نومبر (ہ س)۔ مصنوعی ذہانت (اے آئی)، کوانٹم ٹیکنالوجی اور تیزی سے بدلتے ڈیجیٹل منظرنامے میں سائبر حملوں کے بڑھتے ہوئے خطرات سے نمٹنے کے لیے اتر پردیش کو مستقبل کے تقاضوں کے مطابق تیار کرنے کی سمت میں ایک اہم پہل کی جا رہی ہے۔ ریاست کے ڈیجیٹل بنیادی ڈھانچے، سرکاری ڈیٹا اور اہم اطلاعاتی نظاموں کو محفوظ بنانے کے لیے ایک جامع سائبر سکیورٹی حکمت عملی تیار کرنے پر غور و خوض ہوگا۔ اس کے تحت ابھرتی ہوئی ٹیکنالوجی سے پیدا ہونے والے خطرات کی شناخت، سائبر حملوں سے بچاؤ، ادارہ جاتی صلاحیتوں کی ترقی اور مختلف محکموں کے درمیان بہتر تال میل پر خصوصی توجہ دی جائے گی۔

وزیر اعلیٰ یوگی آدتیہ ناتھ کے ویڑن کے مطابق اتر پردیش اسٹیٹ انسٹی ٹیوٹ آف فارنسک سائنس کی جانب سے 25 نومبر کو لکھنؤ میں ایک خصوصی ورکشاپ کا انعقاد کیا جائے گا۔ اس میں ریاست کے محکمہ اطلاعاتی ٹیکنالوجی و الیکٹرانکس، ڈیٹا سکیورٹی کونسل آف انڈیا (ڈی ایس سی آئی) اور عالمی ٹیکنالوجی کمپنی سسکو کی مشترکہ شرکت ہوگی۔ ورکشاپ میں اعلیٰ انتظامی اور پولیس افسران، سائبر سکیورٹی ماہرین، تکنیکی اداروں کے نمائندے، صنعت سے وابستہ اہم شخصیات اور ماہرین تعلیم ایک پلیٹ فارم پر جمع ہو کر ڈیجیٹل اتر پردیش کو محفوظ بنانے کی حکمت عملی پر تبادلہ خیال کریں گے۔

گومتی نگر ایکسٹینشن میں واقع یوپی-112 ہیڈکوارٹر کے پرگیہ کانفرنس ہال میں صبح 10 بجے سے دوپہر دو بجے تک مجوزہ اس ورکشاپ کا بنیادی مقصد ریاست کے سائبر سکیورٹی نظام کو مزید مضبوط، فعال اور مستقبل کے چیلنجوں سے نمٹنے کے قابل بنانا ہے۔ خاص طور پر سرکاری محکموں اور اہم ڈیجیٹل نظاموں کی حفاظتی تیاریوں کا جائزہ لینے کے ساتھ اے آئی پر مبنی سائبر حملوں، ڈیٹا کی چوری، ڈیجیٹل پلیٹ فارم کی خامیوں اور کوانٹم ٹیکنالوجی کے باعث مستقبل میں پیدا ہونے والے حفاظتی خطرات پر تبادلہ خیال کیا جائے گا۔

پانچ اہم مقاصد پر مرکوز ہوگا تبادلہ خیال

یو پی ایس آئی ایف ایس کے ڈائریکٹر ڈاکٹر جی کے گوسوامی نے بتایا کہ ورکشاپ میں پانچ اہم مقاصد کو مرکز میں رکھ کر حکمت عملی پر مبنی گفتگو ہوگی۔ پہلے مقصد کے تحت اے آئی، کوانٹم اور دیگر ابھرتی ہوئی ٹیکنالوجی سے پیدا ہونے والے سائبر خطرات کے حوالے سے حکومتی اور انتظامی سطح پر بیداری اور حکمت عملی سے متعلق سمجھ بوجھ پیدا کی جائے گی۔ دوسرے مقصد کے تحت سرکاری محکموں، ڈیجیٹل بنیادی ڈھانچے اور اہم اطلاعاتی نظاموں کی موجودہ سائبر سکیورٹی تیاریوں کا جائزہ لیا جائے گا۔

تیسرے مقصد کے تحت سائبر گورننس، سائبر واقعات کے انتظام اور مختلف محکموں کے درمیان تال میل کو مضبوط بنانے کے طریقوں پر غور کیا جائے گا۔ چوتھے مقصد میں اے آئی پر مبنی خطرات اور کوانٹم دور کے چیلنجوں کو مدنظر رکھتے ہوئے مستقبل کے حفاظتی نظام اور تکنیکی حل پر تبادلہ خیال ہوگا۔ وہیں، پانچویں مقصد کے تحت حکومت، صنعت اور تعلیمی اداروں کے درمیان شراکت داری کو فروغ دے کر سائبر سکیورٹی کے شعبے میں اختراع، تحقیق اور صلاحیت سازی کی حوصلہ افزائی کی جائے گی۔

ڈیجیٹل خدمات کے تحفظ اور جواب دہی پر بھی زور

ورکشاپ میں سرکاری خدمات کی فراہمی میں اے آئی، کلاوڈ کمپیوٹنگ اور ڈیجیٹل پلیٹ فارم کے بڑھتے ہوئے استعمال سے متعلق حفاظتی پہلووں پر بھی گفتگو ہوگی۔ ڈیجیٹل خدمات کو زیادہ مؤثر اور آسان بنانے کے ساتھ شہریوں کے ڈیٹا کی رازداری، تحفظ اور جواب دہی کو یقینی بنانے کے درمیان توازن قائم کرنے پر خصوصی زور دیا جائے گا۔ اس کے علاوہ سائبر واقعات کی بروقت شناخت، فوری کارروائی اور نقصانات کو کم سے کم کرنے کے لیے ادارہ جاتی نظام تیار کرنے پر بھی غور کیا جائے گا۔

حکومت، صنعت اور ایم ایس ایم ای کی شراکت داری پر فائر سائیڈ چیٹ

ورکشاپ کی ایک اہم کشش ’ڈیجیٹل ترقی کو فروغ دینا: حکومت، صنعت اور ایم ایس ایم ای‘ کے موضوع پر منعقد ہونے والی فائر سائیڈ چیٹ ہوگی۔ اس میں سرکاری پالیسیوں کو مؤثر انداز میں زمینی سطح پر نافذ کرنے، صنعت کی شراکت داری بڑھانے،بہت چھوٹی، چھوٹی اور درمیانی درجے کی صنعتوں (ایم ایس ایم ای) میں تکنیکی اختراع کی حوصلہ افزائی کرنے اور محفوظ عوامی خدمات کے دائرے کو وسعت دینے جیسے موضوعات پر تبادلہ خیال ہوگا۔ اس کا مقصد ڈیجیٹل ترقی کے عمل میں حکومت، نجی شعبے اور ایم ایس ایم ای کے درمیان تعاون کے نئے امکانات تلاش کرنا ہے۔

مربوط سائبر سکیورٹی نظام تیار کرنے کی پہل: ڈاکٹر جی کے گوسوامی

ورکشاپ میں حکومت، پولیس، تکنیکی ماہرین اور صنعت سے وابستہ نمائندوں کے تجربات کے تبادلے کے ذریعے ریاست کے لیے ایک فعال اور مربوط سائبر سکیورٹی نظام تیار کرنے سے متعلق اہم تجاویز سامنے آئیں گی۔ ڈیجیٹل گورننس کے دائرے میں توسیع کے ساتھ شہریوں کا سرکاری ڈیجیٹل خدمات پر اعتماد برقرار رکھنا بھی اس پہل کا ایک اہم پہلو ہوگا۔ ڈیٹا کے تحفظ، محفوظ ڈیجیٹل خدمات اور تکنیکی صلاحیتوں کی ترقی کے ذریعے اتر پردیش کو اے آئی اور کوانٹم ٹیکنالوجی کے دور کے چیلنجوں سے نمٹنے کے لیے تیار کرنے کی سمت میں اس ورکشاپ کو اہم قرار دیا جا رہا ہے۔

یو پی ایس آئی ایف ایس کے ڈائریکٹر ڈاکٹر جی کے گوسوامی نے بتایا کہ اس ورکشاپ کے ذریعے سائبر سکیورٹی کے شعبے میں حکومت، تکنیکی اداروں اور صنعت سے وابستہ افراد کو ایک مشترکہ پلیٹ فارم پر لانے کی کوشش کی جا رہی ہے۔ اس کا مقصد ابھرتی ہوئی ٹیکنالوجی سے متعلق چیلنجوں کو سمجھنا اور ریاست کے ڈیجیٹل نظام کو مزید محفوظ اور باصلاحیت بنانے کے لیے ٹھوس حکمت عملی سے متعلق تجاویز حاصل کرنا ہے۔

ہندوستھان سماچار

ہندوستھان سماچار / محمد شہزاد


 rajesh pande