شارجہ میں منعقدہ بین الاقوامی کراٹے چیمپئن شپ میں ترون شرما نے سونے کا تمغہ جیتا
احمد آباد، 21 نومبر (ہ س)۔ بچپن میں مکمل طور پر فالج کا شکار ہونے والے ترون شرما نے جدوجہد اور مضبوط عزم و حوصلے کی بدولت بین الاقوامی سطح پر اپنی شناخت قائم کی ہے۔ اڈانی اسپورٹس لائن کی ’گَرو ہے‘ (فخر ہے) مہم سے وابستہ پیرا کراٹے کھلاڑی ترون نے مت
Sports-Karate-Tarun-Gold-BuDokan-International-Cha


احمد آباد، 21 نومبر (ہ س)۔ بچپن میں مکمل طور پر فالج کا شکار ہونے والے ترون شرما نے جدوجہد اور مضبوط عزم و حوصلے کی بدولت بین الاقوامی سطح پر اپنی شناخت قائم کی ہے۔ اڈانی اسپورٹس لائن کی ’گَرو ہے‘ (فخر ہے) مہم سے وابستہ پیرا کراٹے کھلاڑی ترون نے متحدہ عرب امارات کے شارجہ میں منعقدہ بوڈوکان کراٹے کپ بین الاقوامی چیمپئن شپ میں سونے کا تمغہ جیتا ہے۔ انہوں نے 15 نومبر کو منعقدہ اس مقابلے کے کے-21 زمرے میں یہ کامیابی حاصل کی۔ اس چیمپئن شپ میں 28 ممالک کے کھلاڑیوں نے حصہ لیا۔

چھ سال کی عمر میں ترون مکمل طور پر فالج کا شکار ہو گئے تھے۔ اس وقت وہ نہ تو خود بیٹھ سکتے تھے اور نہ ہی چلنے پھرنے یا کھانا کھانے کے قابل تھے۔ آج 35 سال کی عمر میں وہ عالمی درجہ بندی میں چھٹے مقام پر ہیں، جبکہ ایشیائی، دولت مشترکہ اور قومی درجہ بندی میں پہلے مقام پر فائز ہیں۔

ترون کا بین الاقوامی ریکارڈ بھی شاندار رہا ہے۔ انہوں نے 2019 میں عالمی کراٹے چیمپئن شپ میں کانسے کا تمغہ جیتا تھا۔ اس کے بعد 2022 میں ایشیائی پیرا کراٹے چیمپئن شپ میں چاندی اور 2023 میں کانسے کا تمغہ حاصل کیا۔ سال 2024 میں انہوں نے دولت مشترکہ کراٹے چیمپئن شپ میں دو سونے کے تمغے جیتے۔ 2025 میں ایشیائی پیرا کراٹے چیمپئن شپ میں سونے اور 2026 میں چاندی کا تمغہ اپنے نام کیا۔ اسی سال انہوں نے قومی کراٹے چیمپئن شپ کے علاوہ پنجاب ریاستی اور کے آئی او قومی کراٹے چیمپئن شپ میں بھی سونے کے تمغے جیتے۔

ترون نے کہا کہ ’گرو ہے‘ کی جرسی پہن کر شارجہ میں سونے کا تمغہ جیتنا ان کے لیے ایک خاص لمحہ ہے۔ بچپن میں کراٹے نے انہیں نئی زندگی دی اور اب وہ چاہتے ہیں کہ دوسرے بچے بھی اس کھیل کے ذریعے خود اعتمادی حاصل کریں اور آگے بڑھنے کے مواقع سے فائدہ اٹھائیں۔ اڈانی اسپورٹس لائن کے تعاون سے مقابلوں میں شرکت کے لیے سفر اور ضروری کھیلوں کا سامان حاصل کرنے جیسی مشکلات کم ہوئی ہیں۔ اس سے انہیں ہندوستان کی نمائندگی پر توجہ مرکوز کرنے میں مدد ملی ہے۔

پنجاب سے تعلق رکھنے والے ترون اب اپنی کامیابیوں کے ساتھ سماجی ذمہ داری بھی نبھا رہے ہیں۔ وہ لدھیانہ میں 1400 سے زائد محروم طبقے کی لڑکیوں کو مفت میں خود دفاع کی تربیت دے رہے ہیں۔ ان کا مقصد لڑکیوں میں خود اعتمادی پیدا کرنا اور انہیں اپنی حفاظت کرنے کے قابل بنانا ہے۔

ترون اب ایک ایسی کراٹے اکیڈمی قائم کرنا چاہتے ہیں، جہاں معاشی اور سماجی حالات سے قطع نظر بچوں کو معیاری تربیت فراہم کی جا سکے۔ ان کا ماننا ہے کہ کسی بھی بچے کے حالات اس کی صلاحیتوں اور خوابوں کی راہ میں رکاوٹ نہیں بننے چاہئیں۔

ہندوستھان سماچار

ہندوستھان سماچار / محمد شہزاد


 rajesh pande