نئی دہلی، 2 نومبر(ہ س)۔ فارمولا-1 کے صدر اور چیف ایگزیکٹیو آفیسر اسٹیفانو ڈومینکلی نے کِمی اینٹونیلی کو پہلی بار ڈرائیورز کا عالمی چمپئن بننے پر مبارک باد دی ہے۔ انہوں نے اینٹونیلی کی اس کامیابی کو تاریخی قرار دیتے ہوئے کہا کہ اتنی کم عمر میں عالمی چمپئن بننا ان کی غیر معمولی صلاحیت، حوصلے اور عزم کا نتیجہ ہے۔

ڈومینکلی نے پیر کو ایک سرکاری بیان میں کہا کہ اینٹونیلی کو عالمی چمپئن بنتے دیکھنا ان کے لیے فخر کا لمحہ ہے۔ وہ 1953 میں البرٹو آسکاری کے بعد فارمولا-1 کا عالمی چمپئن بننے والے پہلے اطالوی کھلاڑی ہیں۔ اٹلی کو اس کامیابی کے لیے 73 سال تک انتظار کرنا پڑا ہے اور اب پورا ملک اپنے اس کھلاڑی کی کامیابی کا جشن منائے گا۔

انہوں نے کہا کہ عظمت کا تعین صرف ریکارڈ قائم کرنے سے نہیں ہوتا، بلکہ آنے والی نسلوں کو متاثر کرنے سے بھی ہوتا ہے۔ اینٹونیلی نے دنیا بھر کے لاکھوں مداحوں کی توجہ اپنی جانب مبذول کی ہے۔ انہوں نے نوجوان کھلاڑیوں کو یہ دکھایا ہے کہ لگن، خود اعتمادی اور سخت محنت کے ذریعے کسی بھی بڑے خواب کو حقیقت میں بدلا جا سکتا ہے۔

ڈومینکلی نے کہا کہ آج اینٹونیلی کا نام اس کھیل کے عظیم کھلاڑیوں کی فہرست میں شامل ہو گیا ہے۔ فارمولا-1 کی تاریخ میں ایک نیا باب رقم ہوا ہے اور انہیں یقین ہے کہ یہ اینٹونیلی کے شاندار کیریئر کی محض شروعات ہے۔انہوں نے اس تاریخی کامیابی کے لیے اینٹونیلی، مرسڈیز ٹیم اور ان کے اہل خانہ کو مبارک باد دی۔ ساتھ ہی کہا کہ فارمولا-1 کی پوری برادری اس خاص کامیابی کا جشن منانے میں ان کے ساتھ ہے۔

ہندوستھان سماچار

ہندوستھان سماچار / Mohammad Khan