ممبئی، 2 نومبر (ہ س): مرکزی وزیر خزانہ نرملا سیتارمن نے پیر کے روز ملک کے شہریوں اور کاروباری رہنماؤں سے اپیل کی کہ وہ ملک کی اقتصادی ترقی کے بارے میں پورے اعتماد اور مثبت سوچ کے ساتھ بات کریں۔ انہوں نے کہا کہ ہندوستانی معیشت کے بنیادی ستونوں کے کمزور ہونے کے کوئی آثار نہیں ہیں۔ ممبئی کے ایک روزہ دورے پر پہنچی سیتارمن نے ایچ ایس بی سی کے ایک پروگرام میں یہ بات کہی۔ انہوں نے واضح کیا کہ ہندوستانی معیشت کی حالت پوری طرح مضبوط ہے اور اس کے بنیادی ستونوں میں کسی بھی طرح کی کمزوری یا نازک صورت حال نہیں ہے۔
وزیر خزانہ نے ملک کے شہریوں، کارپوریٹ رہنماؤں اور دانشوروں سے اپیل کی کہ وہ ملک کی اقتصادی خوشحالی اور ترقی کے بارے میں پورے اعتماد اور مثبت انداز میں اظہار خیال کریں۔ انہوں نے کہا کہ ہندوستانی معیشت کے بنیادی اقتصادی ستون انتہائی مضبوط ہیں اور ان میں کسی بھی طرح کی کوئی کمزوری نہیں ہے۔
سیتارمن نے کہا کہ حکومت کے مالیاتی شمولیت کے ایجنڈے میں ’سب کے لیے بیمہ‘ ایک اہم ترجیح ہوگی۔ مرکزی حکومت خاص طور پر سماج کے غریب ترین طبقوں کے درمیان بیمہ اور پنشن اسکیموں تک رسائی بڑھانے پر غور کر رہی ہے۔
حکومت قرض کی سہولت تک زیادہ سے زیادہ لوگوں کی رسائی کو بھی ترجیح دے رہی ہے۔ اس کے علاوہ صنعت کی ضروریات اور نوجوانوں کی مہارت کے درمیان فرق کو ختم کرنے کے لیے ہر ضلع میں اے آئی (مصنوعی ذہانت) تربیتی مراکز قائم کرنے کا منصوبہ بنایا جا رہا ہے۔
وزیر خزانہ نے جی ایس ٹی کی مضبوط وصولی اور ملک کے بینکوں کی بہتر صورت حال کا حوالہ دیتے ہوئے کہا کہ اقتصادی خوشحالی کے بنیادی ستون صحیح طریقے سے کام کر رہے ہیں۔ انہوں نے شہریوں سے اپیل کی کہ وہ ملک کی اقتصادی ترقی کے بارے میں پورے اعتماد کے ساتھ بات کریں۔
ہندوستھان سماچار
---------------
ہندوستھان سماچار / عبدالواحد
