
نئی دہلی، 18 نومبر (ہ س)۔ مرکزی وزیر تجارت و صنعت پیوش گوئل نے روم میں اٹلی کی اہم کمپنیوں کے چیف ایگزیکٹو افسران (سی ای اوز) کے ساتھ ملاقاتیں کیں۔ ان ملاقاتوں میں توانائی کے آلات، تعمیرات، ہوا بازی، صاف توانائی اور صحت کی دیکھ بھال کے شعبوں میں سرمایہ کاری، ٹیکنالوجی شراکت داری اور مشترکہ منصوبوں پر تبادلہ خیال کیا گیا۔
وزارت تجارت و صنعت نے بدھ کو جاری بیان میں بتایا کہ گوئل نے اٹلی کے روم کے اپنے سرکاری دورے کے دوران 17 نومبر کو اٹلی کی اہم کمپنیوں کے سی ای اوز اور سینئر نمائندوں کے ساتھ ملاقاتیں کیں۔
مرکزی وزیر تجارت نے والٹر ٹوسٹو ایس پی اے کے منیجنگ ڈائریکٹر لوکا ٹوسٹو، نورڈ امپیانٹی سسٹمز ایس آر ایل کے چیف ایگزیکٹو افسر جیان پییرو گالیارڈی، ایٹٹیک کے صدر جیانی لیٹیری، مگالڈی گرین انرجی کی منیجنگ ڈائریکٹر محترمہ لیٹیزیا مگالڈی اور براکو امیجنگ ایس پی اے کے چیف ایگزیکٹو افسر فلوویو رینولڈی براکو کے ساتھ ملاقاتیں کیں۔
پیوش گوئل کے ساتھ ان ملاقاتوں میں ہندوستان میں اطالوی سرمایہ کاری بڑھانے، ٹیکنالوجی کی منتقلی اور ہندوستانی شراکت داروں کے ساتھ مشترکہ منصوبے قائم کرنے پر خصوصی طور پر تبادلہ خیال ہوا۔
اطالوی کمپنیوں نے اپنی ٹیکنالوجی ہندوستان لانے اور مینوفیکچرنگ، طیاروں کی دیکھ بھال، تھرمل توانائی کے ذخیرے اور ادویات جیسے شعبوں میں ہندوستانی صنعتوں کے ساتھ تعاون کرنے میں دلچسپی ظاہر کی۔
پیوش گوئل نے کمپنیوں کی جانب سے ظاہر کی گئی دلچسپی کا خیرمقدم کیا اور انہیں ہندوستان کے بنیادی ڈھانچے، ہوا بازی اور صحت کی دیکھ بھال سمیت مختلف شعبوں میں ہندوستانی صنعتوں کے ساتھ شراکت داری کرنے کی ترغیب دی۔
وزارت نے کہا کہ مستقبل کے لائحہ عمل کے تحت مناسب ہندوستانی مشترکہ منصوبوں کے شراکت داروں کی شناخت، پائلٹ پروجیکٹس پر کام، لاگت کے تقابلی مطالعات اور ہندوستانی اداروں کے ساتھ مشترکہ تحقیق کرنے کی ضرورت پر اتفاق کیا گیا۔
وزارت تجارت و صنعت نے کہا کہ یہ ملاقاتیں ایسے وقت میں ہوئی ہیں جب ہندوستان اور اٹلی اپنی خصوصی اسٹریٹجک شراکت داری کو آگے بڑھا رہے ہیں اور سال 2029 تک دوطرفہ تجارت کو سالانہ 20 ارب یورو تک پہنچانے کے ہدف کی سمت میں کام کر رہے ہیں۔
گوئل نے سوشل میڈیا پلیٹ فارم ’ایکس‘ پر اپنی پوسٹ میں لکھا، ”روم میں مگالڈی گرین انرجی کی منیجنگ ڈائریکٹر محترمہ لیٹیزیا مگالڈی کے ساتھ اچھی ملاقات ہوئی۔ ہم نے صاف توانائی کے حل کے شعبے میں ہندوستان اور اٹلی کے درمیان تعاون کے امکانات پر تبادلہ خیال کیا۔ اس میں خاص طور پر جدید تھرمل توانائی کے ذخیرے، صنعتی توانائی کی کارکردگی بہتر بنانے اور پائیدار ٹیکنالوجیز کو اپنانے کے عمل میں تیزی لانے پر توجہ مرکوز کی گئی۔“
ہندوستھان سماچار
---------------
ہندوستھان سماچار / عبدالسلام صدیقی