
نئی دہلی، 17 نومبر (ہ س)۔ سڑک ٹرانسپورٹ اور شاہراہوں کے امور کے مرکزی وزیر نتن گڈکری نے کہا کہ بائیو انرجی اور متبادل ایندھن کا دائرہ وسیع کرنا بھارت کو خود کفیل بنانے اور سالانہ 22 لاکھ کروڑ روپے کے فوسل فیول کی درآمد پر انحصار ختم کرنے کا مؤثر ذریعہ ہے۔ انہوں نے کہا کہ کسانوں کو روایتی فصلوں کے ساتھ توانائی، ایندھن، بائیو بٹومین اور گرین ہائیڈروجن کا پیدا کنندہ بھی بنانا ہوگا۔ اس سے دیہی معیشت کو مضبوطی ملے گی۔
گڈکری نے منگل کو یہاں کنفیڈریشن آف انڈین انڈسٹری (سی آئی آئی) کی جانب سے منعقدہ قومی بائیو انرجی سربراہی اجلاس سے خطاب کرتے ہوئے کہا کہ ملک میں فضائی آلودگی کا تقریباً 40 فیصد حصہ ٹرانسپورٹ کے شعبے سے آتا ہے۔ اس مسئلے سے نمٹنے کے لیے حکومت ایتھنول، آئسو بیوٹانول، کمپریسڈ نیچرل گیس (سی این جی)، لیکویفائیڈ نیچرل گیس (ایل این جی)، بائیو ایوی ایشن فیول اور گرین ہائیڈروجن کو فروغ دے رہی ہے۔
مرکزی وزیر نے بتایا کہ مکئی سے ایتھنول تیار کرنے کی اجازت دیے جانے کے بعد مکئی کی مارکیٹ قیمت 1200 روپے فی کوئنٹل سے بڑھ کر 2600 روپے فی کوئنٹل تک پہنچ گئی۔ اس سے اتر پردیش اور بہار کے مکئی پیدا کرنے والے کسانوں کو 45 ہزار کروڑ روپے کا براہ راست فائدہ ہوا ہے۔
دھان کی پرالی سے بائیو بٹومین تیار کرنے کی ٹیکنالوجی بھی تیار کی گئی ہے۔ سینٹرل روڈ ریسرچ انسٹی ٹیوٹ نے اسے پیٹرولیم پر مبنی بٹومین سے بہتر قرار دیا ہے۔ اب تک 25 صنعت کار اس کے لیے لائسنس حاصل کر چکے ہیں۔ ناگپور-جبل پور شاہراہ پر بائیو بٹومین سے ایک کلومیٹر سڑک بھی تعمیر کی جا چکی ہے۔
گڈکری نے کہا کہ نیپئر گھاس سے بائیو سی این جی اور گرین ہائیڈروجن تیار کرنے کے بھی وسیع امکانات موجود ہیں۔ اس سے بنجر اور زرعی زمین کا بہتر استعمال کیا جا سکتا ہے۔
انہوں نے بتایا کہ بھارتی آٹوموبائل صنعت کا حجم 14 لاکھ کروڑ روپے سے بڑھ کر 22 لاکھ کروڑ روپے ہو گیا ہے۔ بھارت جاپان کو پیچھے چھوڑ کر دنیا کی تیسری سب سے بڑی آٹوموبائل مارکیٹ بن گیا ہے۔ اس شعبے میں ساڑھے چار کروڑ سے زیادہ روزگار کے مواقع پیدا ہوئے ہیں اور مجموعی پیداوار کا 50 فیصد برآمد کیا جا رہا ہے۔
ہندوستھان سماچار
---------------
ہندوستھان سماچار / عبدالواحد