
نئی دہلی، 16 نومبر(ہ س)۔ مرکزی وزیر تجارت و صنعت پیوش گوئل نے کہا ہے کہ بھارت اور مصر کے درمیان مجوزہ تجارتی معاہدے کے تحت دونوں ممالک کے اسٹارٹ اپس کو ایک دوسرے کے بازاروں میں داخلے کے مواقع فراہم کرنے پر تفصیلی بات چیت کی جائے گی۔مصر کے سرکاری دورے پر موجود پیوش گوئل نے پیر کو قاہرہ میں بھارت۔مصر اسٹارٹ اپ فورم سے خطاب کرتے ہوئے کہا کہ ہندوستان نے اپنے اسٹارٹ اپس کو متعدد مواقع فراہم کیے ہیں اور ان میں سے کئی کمپنیاں براہ راست صارفین کے ساتھ کام کر رہی ہیں۔
انہوں نے کہا کہ دونوں ممالک کے افسران کو مل کر یہ طے کرنا ہوگا کہ اسٹارٹ اپس کو ایک دوسرے کی منڈیوں میں کاروبار کرنے اور باہمی تعاون کے کیا مواقع دیے جا سکتے ہیں۔ اس کے علاوہ سرکاری خریداری میں انہیں موقع دینے اور مختلف پلیٹ فارمز پر اپنے خیالات پیش کرنے کی سہولت فراہم کرنے پر بھی غور کیا جا سکتا ہے۔
گوئل نے بتایا کہ بھارت اور مصر کے درمیان مستقبل میں ترجیحی تجارتی معاہدے یا آزاد تجارتی معاہدے کے امکانات پر بھی غور کیا جا رہا ہے۔ انہوں نے کہا کہ جدت اور اختراع تنہا فروغ نہیں پا سکتی، اس کے لیے باہمی تعاون اور خیالات کا تبادلہ ضروری ہے۔انہوں نے کہا کہ نیل سے گنگا تک بھارت اور مصر کی تجارتی شراکت داری ایک نئے باب میں داخل ہو رہی ہے۔
قابل ذکر ہے کہ دونوں ممالک نے ممکنہ تجارتی معاہدے پر باضابطہ مذاکرات شروع کرنے کے لیے شرائط کو حتمی شکل دینے کی غرض سے ایک مشترکہ ورکنگ گروپ تشکیل دینے کا فیصلہ کیا ہے۔
ہندوستھان سماچار
ہندوستھان سماچار / Mohammad Khan