
نئی دہلی، 15 نومبر (ہ س)۔ بھارتی کرکٹ کنٹرول بورڈ (بی سی سی آئی) نے اتوار کو خواتین پریمیئر لیگ (ڈبلیو پی ایل) 2027 کے ممبئی مرحلے کے مقام میں تبدیلی کا اعلان کیا ہے۔ اب ممبئی مرحلے کے میچز بریبورن اسٹیڈیم کے بجائے وانکھیڑے اسٹیڈیم میں کھیلے جائیں گے۔ تاہم، میچوں کی تاریخوں اور شیڈول میں کوئی تبدیلی نہیں کی گئی ہے۔
ڈبلیو پی ایل گورننگ کونسل نے 15 ستمبر کو ہونے والی میٹنگ میں ٹورنامنٹ کے پانچویں ایڈیشن کے اصل مقامات اور تاریخوں کی منظوری دی تھی۔ اس شیڈول کے مطابق ممبئی مرحلے کے تحت 12ویں سے 20ویں میچ، ایلیمینیٹر اور فائنل 26 جنوری سے 7 فروری 2027 تک بریبورن اسٹیڈیم میں منعقد ہونے تھے۔
کرکٹ کلب آف انڈیا (سی سی آئی) کو 14 فروری 2027 سے پہلی خواتین چیمپئنز ٹرافی کی میزبانی بھی کرنی ہے۔ اسی بات کو مدنظر رکھتے ہوئے انٹرنیشنل کرکٹ کونسل (آئی سی سی) نے تشویش ظاہر کی تھی کہ ڈبلیو پی ایل کے اختتام اور کثیر ملکی ٹورنامنٹ کے آغاز کے درمیان وقفہ پچوں کو دوبارہ تیار کرنے اور ان کی حالت بہتر بنانے کے لیے کافی نہیں ہوگا۔ اس کے بعد ممبئی مرحلے کا مقام تبدیل کرنے کا فیصلہ کیا گیا۔
ڈبلیو پی ایل 2027 کا آغاز 14 جنوری کو وڈودرا میں ہوگا۔ ٹورنامنٹ کے پہلے 11 میچ 24 جنوری تک وڈودرا میں کھیلے جائیں گے۔ اس کے بعد مقابلے ممبئی منتقل ہو جائیں گے، جہاں 7 فروری کو فائنل کے ساتھ ٹورنامنٹ کا اختتام ہوگا۔
دونوں مقامات پر تمام میچ بھارتی وقت کے مطابق شام 7:30 بجے شروع ہوں گے۔
ہندوستھان سماچار
--------
ہندوستھان سماچار / عبدالواحد