۔ دوسرے دن 24 میں سے 13 مقابلوں کے نتائج فیصلہ کن رہے، علی رضا فیروزجا گروپ اے اور فابیانو کارووآنا گروپ بی میں سرفہرست

بڈاپیسٹ، 13 نومبر (ہ س)۔ امریکہ کے فابیانو کارووآنا اور ہانس موکے نیمن نے بڈاپیسٹ میں جاری ٹوٹل چیس ورلڈ چیمپئن شپ ٹور پائلٹ کے فاسٹ کلاسک گروپ مرحلے کے دوسرے دن اپنی دونوں بازیاں جیت کر شاندار کارکردگی کا مظاہرہ کیا۔ وہیں ازبکستان کی ببیسارا اسوبائیوا نے ہندوستان کے ارجن ایریگیسی کو شکست دے کر دن کا بڑا اپ سیٹ کیا۔

دوسرے دن تیسرے اور چوتھے راونڈ میں مجموعی طور پر 24 میں سے 13 مقابلوں کے نتائج فیصلہ کن رہے۔ پہلے دن کے مقابلے میں یہ تعداد تین زیادہ رہی ۔ اس مقابلے کے فارمیٹ میں ہر کھلاڑی کو ایک ہی حریف کے خلاف دو بازیاں کھیلنی ہوتی ہیں، جن میں سفید اور سیاہ مہروں کی باری تبدیل ہو جاتی ہے۔ جیت پر تین پوائنٹس اور ڈرا پر ایک پوائنٹ دیا جاتا ہے۔ دونوں بازیاں جیتنے کے باعث کارووآنا اور نیمن نے چھ چھ پوائنٹس حاصل کیے۔

گروپ اے میں علی رضا فیروزجا آٹھ پوائنٹس کے ساتھ تنہا سرفہرست مقام پر پہنچ گئے ہیں۔ گروپ بی میں کارووآنا 10 پوائنٹس کے ساتھ پہلے مقام پر ہیں۔ گروپ سی میں ایان نیپومنیاچی اور ہائک مارتیروسیان چھ چھ پوائنٹس کے ساتھ مشترکہ طور پر سرفہرست ہیں۔ گروپ ڈی میں نیمن نے میکسم ویشیئر لاگراو کے ساتھ آٹھ پوائنٹس پر برابری کر لی ہے۔

گروپ اے: فیروزجانے برتری حاصل کی

گروپ اے میں علی رضا فیروزجا نے جورڈن وان فاریسٹ کے خلاف سفید مہروں سے طویل مقابلے میں کامیابی حاصل کی، جبکہ دوسری بازی ڈرا رہی۔ اس کارکردگی سے فیروزجا کو چار پوائنٹس ملے اور وہ مجموعی طور پر آٹھ پوائنٹس کے ساتھ سرفہرست مقام پر پہنچ گئے۔ جان کرسٹوف ڈوڈا ان سے ایک پوائنٹ پیچھے ہیں۔

ڈوڈا اور نادربیک عبد الستاروف کے درمیان دونوں بازیوں میں جیت کا تبادلہ ہوا۔ ڈوڈا نے پہلی بازی جیتی، جو دن کا سب سے طویل مقابلہ تھا۔ اس کے بعد عبد الستاروف نے دوسری بازی جیت کر حساب برابر کر دیا۔ دونوں کو تین تین پوائنٹس ملے۔ ڈوڈا کے سات جبکہ عبد الستاروف کے چار پوائنٹس ہیں۔

لیوون آرونین اور اینڈریو ہونگ کے درمیان دونوں بازیاں ڈرا رہیں۔ آرونین کے پانچ اور ہونگ کے تین پوائنٹس ہو گئے ہیں۔ وان فاریسٹ کے کھاتے میں چار پوائنٹس ہیں۔

گروپ بی: کارووآنا کی دوہری کامیابی

گروپ بی میں فابیانو کارووآنا نے آر پرگیانند کے خلاف شاندار کھیل کا مظاہرہ کیا۔ سفید مہروں سے کھیلتے ہوئے کارووآنا نے ایک مہرے کی قربانی دے کر سیاہ مہروں سے کھیل رہے اپنے حریف کے دفاع کو کمزور کر دیا اور آسانی سے کامیابی حاصل کی۔ اس کے بعد انہوں نے سیاہ مہروں سے بھی دوسری بازی جیت لی۔

دونوں کامیابیوں کے ساتھ کارووآنا کے مجموعی پوائنٹس کی تعداد 10 ہو گئی ہے اور انہوں نے دوسرے مقام پر موجود لیئم لی پر دو پوائنٹس کی برتری حاصل کر لی ہے۔

لیئم لی نے ونسنٹ کیمر کے خلاف ایک جیت اور ایک ڈرا کے ساتھ چار پوائنٹس حاصل کیے۔ انہوں نے سفید مہروں سے سخت مقابلے میں کامیابی درج کی۔ لی کے آٹھ جبکہ کیمر کے تین پوائنٹس ہیں۔

رچرڈ ریپورٹ اور ولادیسلاو آرٹیمیئف کے درمیان دونوں بازیاں ڈرا رہیں۔ دونوں کے تین تین پوائنٹس ہیں۔ پرگیانند دو پوائنٹس پر برقرار ہیں۔

گروپ سی: مارٹیروسیان کی واپسی، کارلسن کی چوتھی بازی بھی ڈرا

گروپ سی میں ہائک مارٹیروسیان نے انیش گیری کے خلاف پہلی بازی ہارنے کے بعد شاندار واپسی کی۔ گیری نے سفید مہروں سے کھیلتے ہوئے محض 26 چالوں میں کامیابی حاصل کی، لیکن مارٹیروسیان نے واپسی کی بازی سفید مہروں سے جیت لی۔ اس طرح مارتیروسیان کے چھ پوائنٹس ہو گئے اور وہ ایان نیپومنیاچی کے ساتھ مشترکہ طور پر سرفہرست پہنچ گئے۔ گیری کے پانچ پوائنٹس ہیں۔

نیپومنیاچی اور شخریار مامیدیاروف کے درمیان دونوں بازیاں ڈرا رہیں۔ دونوں کھلاڑیوں کو دو دو پوائنٹس ملے، جبکہ مامیدیاروف کے مجموعی پوائنٹس کی تعداد پانچ ہو گئی۔

میگنس کارلسن اور ابھیمنیو مشرا کے درمیان بھی دونوں بازیاں ڈرا رہیں۔ دوسری بازی میں طویل اینڈ گیم دیکھنے کو ملا، جس میں سفید مہروں سے کھیل رہے مشرا جیت کے لیے دباؤ بنا رہے تھے۔ فاسٹ کلاسک میں کارلسن کی یہ مسلسل چوتھی ڈرا بازی تھی۔ ان کے چار اور مشرا کے تین پوائنٹس ہیں۔

گروپ ڈی: نیمن کی چھ پوائنٹس کی چھلانگ، اسوبائیوا نے ایریگیسی کو ہرایا

گروپ ڈی میں ہانس موکے نیمن نے آر ویشالی کے خلاف دونوں بازیاں جیت کر پورے چھ پوائنٹس حاصل کیے۔ انہوں نے پہلی بازی سیاہ اور دوسری سفید مہروں سے جیتی۔ اس کامیابی کے ساتھ نیمن کے پوائنٹس دو سے بڑھ کر آٹھ ہو گئے، جبکہ ویشالی کے کھاتے میں ایک پوائنٹ ہے۔

میکسم ویشیئر لاگراو نے ویسلی سو کے خلاف پہلی بازی سفید مہروں سے جیتی اور دوسری ڈرا کھیلی۔ انہیں چار پوائنٹس ملے اور وہ بھی آٹھ پوائنٹس پر پہنچ گئے۔ ویسلی سو کے تین پوائنٹس ہیں۔

دن کے سب سے زیادہ زیر بحث نتائج میں سے ایک ببیسارا اسوبائیوا کی ارجن ایریگیسی کے خلاف جیت رہی۔ اسوبائیوا نے پہلی بازی سیاہ مہروں سے جیتی۔ اس مقابلے میں ان کے آگے بڑھتے ہوئے پیادوں نے اہم کردار ادا کیا۔ تاہم چوتھے راؤنڈ میں ایریگیسی نے سیاہ مہروں سے کامیابی حاصل کرکے واپسی کی۔ دونوں کھلاڑی پانچ پانچ پوائنٹس کے ساتھ دن کا اختتام کرنے میں کامیاب رہے۔

بڈاپیسٹ میں فاسٹ کلاسک کا راؤنڈ رابن مرحلہ جاری رہے گا۔ کھلاڑی ناک آؤٹ مرحلے میں جگہ بنانے کے لیے اپنی پوزیشن مضبوط کرنے کے ارادے سے میدان میں اتریں گے۔

ہندوستھان سماچار

ہندوستھان سماچار / محمد شہزاد