نئی دہلی، 13 نومبر(ہ س)۔ ٹاٹا گروپ کی زیر قیادت فضائی کمپنی ایئر انڈیا اور ایئر انڈیا ایکسپریس نے سعودی عرب کے شہر ریاض اور دمام کے لیے اپنی پروازیں 30 نومبر تک معطل کر دی ہیں، جبکہ جدہ کے لیے فضائی خدمات 21 نومبر تک ملتوی رہیں گی۔

ایئر لائن کے مطابق خطے میں موجودہ کشیدگی اور سکیورٹی کی صورت حال کے پیش نظر سعودی عرب کے لیے بعض پروازیں عارضی طور پر معطل کی گئی ہیں۔ کمپنی نے بتایا کہ حالات کا جائزہ لینے کے بعد ریاض اور دمام سے آنے جانے والی ایئر انڈیا اور ایئر انڈیا ایکسپریس کی پروازیں 30 نومبر تک بند رکھنے کا فیصلہ کیا گیا ہے۔ وہیں جدہ کے لیے آنے جانے والی پروازیں 21 نومبر تک معطل رہیں گی۔

ایئر انڈیا نے کہا کہ جن مسافروں کے پاس 10 نومبر یا اس سے پہلے کی کنفرم بکنگ ہے، وہ دستیابی کے مطابق بغیر کسی اضافی فیس کے اپنے سفر کی تاریخ تبدیل کروا سکتے ہیں یا ٹکٹ منسوخ کرا کے پوری رقم واپس لے سکتے ہیں۔

ایئر لائن کے مطابق ایئر انڈیا کے مسافر سعودی عرب میں ایئر انڈیا کے کسی بھی فعال اسٹیشن سے اپنی پرواز کی نئی تاریخ طے کروا سکتے ہیں۔ اسی طرح ایئر انڈیا ایکسپریس کے مسافر سعودی عرب یا بحرین میں اس کے کسی بھی فعال اسٹیشن سے سفر کی تاریخ تبدیل کروا سکتے ہیں۔ریاض اور دمام کے لیے کی گئی بکنگ کی صورت میں نئی تاریخ پر سفر 14 دسمبر تک مکمل کرنا ہوگا، جبکہ جدہ کے ٹکٹوں کے لیے نئی تاریخ پر سفر کی آخری مدت 5 دسمبر مقرر کی گئی ہے۔

ایئر انڈیا نے بتایا کہ سفر کی تاریخ تبدیل کرانے یا رقم کی واپسی کے لیے مسافر اس کی معاونت ٹیم سے رابطہ کر سکتے ہیں۔ اس کے علاوہ ایئر انڈیا کے ہیلپ لائن نمبر +91 11 69329333 اور +91 11 69329999 پر، جبکہ ایئر انڈیا ایکسپریس کے نمبر +91 124 6935600 پر بھی رابطہ کیا جا سکتا ہے۔ مسافر اپنے شہر کے بکنگ دفتر کے ذریعے بھی معلومات حاصل کر سکتے ہیں۔

ہندوستھان سماچار

ہندوستھان سماچار / Mohammad Khan