مسقط، 12 نومبر (ہ س)۔ بھارتی ٹیم نے جمعرات کو انڈر 19 ایشیا کپ کے سیمی فائنل میں افغانستان کو 8 وکٹوں سے شکست دے کر فائنل میں جگہ بنا لی۔ لکشیہ رائے چندانی کی قیادت میں بھارتی ٹیم اب ہفتہ کو خطاب کے لیے روایتی حریف پاکستان سے مقابلہ کرے گی۔
بھارتی ٹیم نے کھیل کے تینوں شعبوں میں شاندار کارکردگی کا مظاہرہ کرتے ہوئے افغانستان کو پوری طرح پچھاڑ دیا۔ پہلے بلے بازی کرتے ہوئے افغانستان نے مقررہ 50 اوورز میں 8 وکٹوں کے نقصان پر 227 رنز بنائے۔ افغانستان کی جانب سے نعمان سالارزئی نے 78 گیندوں پر 51 رنز جبکہ شاہ فیصل رحیمی نے 72 گیندوں پر 51 رنز کی اننگز کھیلی۔
بھارت کی جانب سے ایشان سود نے شاندار گیند بازی کرتے ہوئے 43 رنز دے کر 3 وکٹیں حاصل کیں۔ بھارتی گیند بازوں نے درست لائن اور لینتھ کے ساتھ گیند بازی کی اور افغان بلے بازوں کو کھل کر رنز بنانے کا موقع نہیں دیا۔
ہدف کا تعاقب کرنے اتری بھارتی ٹیم نے آغاز سے ہی میچ پر اپنی گرفت مضبوط کر لی۔ اوپننگ بلے بازوں کے درمیان 100 سے زائد رنز کی شراکت نے جیت کی راہ آسان بنا دی۔ گزشتہ دو مقابلوں میں کم رنز پر آؤٹ ہونے والے کپتان لکشے رائے چندانی نے شاندار واپسی کرتے ہوئے 90 گیندوں پر 93 رنز بنائے۔
دوسری جانب آریہ ویر سہواگ نے بھی اپنی شاندار فارم برقرار رکھی۔ گزشتہ میچ میں 160 رنز کی فیصلہ کن اننگز کھیلنے والے سہواگ نے اس مقابلے میں 57 گیندوں پر 51 رنز بنائے۔
دونوں سلامی بلے بازوں کے آؤٹ ہونے کے بعد وی کے ونیت نے 62 گیندوں پر ناٹ آؤٹ 57 رنز اور یش وردھن سنگھ چوہان نے 14 گیندوں پر 16 رنز بنا کر بھارت کو کامیابی دلائی۔
اس طرح بھارتی ٹیم نے 36.5 اوورز میں 2 وکٹوں کے نقصان پر 228 رنز بنا کر ہدف حاصل کر لیا۔ بھارت نے 13.1 اوورز باقی رہتے ہی مقابلہ اپنے نام کر لیا۔
ہندوستھان سماچار
---------------
ہندوستھان سماچار / عبدالواحد
