کوماموٹو، 12 نومبر (ہ س)۔ جاپان ماسٹرز-2026 بیڈمنٹن ٹورنامنٹ میں جمعرات کو ہندوستانی کھلاڑیوں کی کارکردگی مایوس کن رہی۔ خواتین کے ڈبلز میں تریشا جولی اور گایتری گوپی چند، جبکہ مردوں کے ڈبلز میں ہری ہرن امسکرونن اور ایم آر ارجن کو پری کوارٹر فائنل میں شکست کا سامنا کرنا پڑا۔

عالمی چیمپئن شپ کی کانسہ کا تمغہ جیتنے والی تریشا اور گایتری کی جوڑی کو جاپان کی رِن ایواناگا اور کی ناکانیشی نے 21-14، 21-14 سے شکست دی۔ اس سے قبل ہندوستانی جوڑی نے راؤنڈ آف 32 کے مقابلے میں جاپان کی ہیناتا سوزوکی اور ناؤ یاماکیتا کو 42 منٹ میں 21-17، 21-14 سے شکست دے کر پری کوارٹر فائنل میں جگہ بنائی تھی۔

پری کوارٹر فائنل مقابلے میں پہلے گیم سے ہی جاپانی جوڑی نے اپنا دبدبہ برقرار رکھا۔ ایواناگا اور ناکانیشی نے مسلسل چھ پوائنٹس حاصل کرکے پہلا گیم اپنے نام کر لیا۔

دوسرے گیم میں تریشا اور گایتری نے شاندار واپسی کی کوشش کی۔ ہندوستانی جوڑی نے مسلسل چار پوائنٹس حاصل کرکے ابتدائی مرحلے میں 5-1 کی برتری بنا لی۔ مقابلہ 14-14 تک برابر رہا، لیکن اس کے بعد جاپانی کھلاڑیوں نے مسلسل سات پوائنٹس حاصل کرکے میچ جیت لیا۔ یہ مقابلہ تقریباً 40 منٹ تک جاری رہا۔

اس سے قبل مردوں کے ڈبلز میں ہری ہرن امسکرونن اور ایم آر ارجن کی جوڑی بھی شکست کے بعد ٹورنامنٹ سے باہر ہو گئی۔ ہندوستانی جوڑی کا مقابلہ جاپان کے تاکورو ہوکی اور یوگو کوبایاشی سے تھا۔ ہوکی اور کوبایاشی 2021 کی عالمی چیمپئن شپ کے فاتح ہیں۔

ہری ہرن اور ارجن نے گزشتہ دور میں سابق عالمی چیمپئن ملائیشیا کے آرون چیا اور سوہ وُئی یِک کو شکست دے کر بڑا الٹ پھیر کیا تھا، لیکن اس بار جاپانی جوڑی نے انہیں 21-14، 21-14 سے مات دے دی۔ یہ مقابلہ 35 منٹ سے کچھ زیادہ وقت تک جاری رہا۔

ہندوستھان سماچار

---------------

ہندوستھان سماچار / عبدالواحد