ایم سی ایکس پر ابتدائی کاروبار میں دباؤ برقرار، سونا، چاندی اور خام تیل کے ساتھ بیس میٹل میں بھی گراوٹ
نئی دہلی، 12 نومبر (ہ س)۔ اجناس کے گھریلو بازار (ملٹی کموڈیٹی ایکسچینج- ایم سی ایکس) میں آج جمعرات، 12 نومبر کو صبح ابتدائی کاروبار کے دوران کمزوری کا رجحان برقرار نظر آ رہا ہے۔ امریکہ میں مہنگائی کے بلند اعداد و شمار اور ڈالر انڈیکس میں آئی مضبوطی کا براہ راست اثر قیمتی دھاتوں پر دکھائی دے رہا ہے۔ اس کے باعث ملٹی کموڈیٹی ایکسچینج میں سونا اور چاندی دونوں گراوٹ کے ساتھ منفی نشان میں کھلے۔ اینرجی مارکیٹ میں بھی خام تیل کی قیمتوں میں نرمی برقرار ہے، جبکہ انڈسٹریل بیس میٹل (صنعتی بنیادی دھاتوں) میں ملا جلا کاروبار ہو رہا ہے۔
صرافہ بازار کی بات کریں تو آج صبح بین الاقوامی مارکیٹ میں سونے کی قیمت پھسل کر 3,971.75 ڈالر فی اونس کی سطح پر آ گئی۔ اسی طرح کومیکس میں چاندی بھی تقریباً 1 فیصد ٹوٹ کر 51.47 ڈالر فی اونس کی قیمت پر کاروبار کر رہی ہے۔ گھریلو سطح پر ملٹی کموڈیٹی ایکسچینج میں سونے کا فیوچر 0.34 فیصد کی گراوٹ کے ساتھ 1,39,245 روپے فی 10 گرام کی سطح پر کھلا۔ وہیں چاندی کے فیوچر میں بھی 0.94 فیصد کی کمزوری آئی اور یہ 1,82,794 روپے فی کلوگرام کی قیمت پر آ گئی۔
اینرجی مارکیٹ میں خام تیل کی قیمتوں پر آج بھی فروخت کا دباؤ حاوی ہے۔ امریکہ اور ایران کے درمیان جوہری مذاکرات میں تعطل برقرار رہنے کے باوجود فوجی کشیدگی ٹلنے کے اشاروں سے تیل سستا ہوا ہے۔ بین الاقوامی معیار کا برینٹ خام تیل آج 1.53 فیصد کی گراوٹ کے ساتھ 91.24 ڈالر فی بیرل کی سطح پر آ گیا۔ اسی طرح امریکی خام تیل یعنی ویسٹ ٹیکساس انٹرمیڈیٹ (ڈبلیو ٹی آئی) کی قیمت بھی نرمی کے ساتھ پھسل کر 85.20 ڈالر فی بیرل کی نچلی سطح پر آ گئی۔
صنعتی دھاتوں یعنی بنیادی دھاتوں میں آج الگ الگ رجحانات دیکھنے کو مل رہے ہیں۔ گھریلو مارکیٹ میں ایلومینیم کی قیمتوں میں گراوٹ کا سلسلہ جاری ہے۔ اس گراوٹ کے باعث ایلومینیم 0.78 فیصد کی کمزوری کے ساتھ 334 روپے فی کلوگرام کے آس پاس بنا ہوا ہے۔ دوسری جانب تانبے کی قیمت میں بھی ہلکی سستی کا رجحان برقرار ہے۔ فی الحال یہ دھات 0.55 فیصد کی کمزوری کے ساتھ 1,334.50 روپے فی کلوگرام کی سطح پر ہے۔
کموڈیٹی مارکیٹ کے ماہرین کا کہنا ہے کہ امریکہ میں مہنگائی کی شرح توقع سے زیادہ رہنے کے باعث فیڈرل ریزرو کی جانب سے شرح سود کے معاملے میں سخت موقف اختیار کیے جانے کا خدشہ بڑھ گیا ہے۔ اس سے امریکی ڈالر کو مضبوطی ملی ہے، جو سونے اور چاندی جیسی ایسی اثاثوں پر دباؤ ڈال رہا ہے جن پر سود نہیں ملتا۔ تجزیہ کاروں کے مطابق، قلیل مدت میں قیمتی دھاتوں اور خام تیل کی قیمتوں میں اتار چڑھاؤ کا یہ سلسلہ جاری رہ سکتا ہے۔
ہندوستھان سماچار
---------------
ہندوستھان سماچار / انظر حسن
