فوریکس مارکیٹ میں ہندوستانی روپے کی مضبوطی برقرار، ابتدائی کاروبار میں ڈالر سمیت دیگر اہم کرنسیوں کے مقابلے روپیہ مضبوط ہوا
نئی دہلی، 11 نومبر (ہ س)۔ گھریلو غیر ملکی زرمبادلہ بازار
(فوریکس مارکیٹ) میں آج ابتدائی کاروبار کے دوران ہندوستانی روپے نے امریکی ڈالر
کے مقابلے نمایاں مضبوطی درج کی۔ گھریلو شیئر بازار میں زبردست تیزی اور غیر ملکی
ادارہ جاتی سرمایہ کاروں کی جانب سے ملنے والی بھرپور حمایت کے باعث روپے کی قیمت
میں یہ اضافہ دیکھا جا رہا ہے۔ صبح 11 بجے تک کاروبار کے دوران ہندوستانی روپیہ
گزشتہ کاروباری سیشن کی بند قیمت 93.9400 روپے کے مقابلے 0.2525 روپے یعنی
0.27 فیصد مضبوط ہوکر 93.6875 روپے فی ڈالر کی سطح پر پہنچ گیا۔
آج صبح انٹربینک فارن ایکسچینج مارکیٹ میں روپیہ 21 پیسے کے
اضافے کے ساتھ 93.73 روپے فی ڈالر کی سطح پر کھلا۔ کاروبار شروع ہوتے ہی درآمد
کنندگان کی جانب سے معمول کی ڈالر مانگ کے باعث روپیہ ایک وقت پھسل کر 93.8825 کی
کم ترین سطح تک پہنچ گیا۔ تاہم، اس کے فوراً بعد غیر ملکی فنڈز کی جانب سے شیئر
بازار میں مسلسل ڈالر کی آمد کے باعث روپے نے زبردست واپسی کی اور مضبوط ہوکر دن
کی بلند ترین سطح 93.67 روپے تک پہنچ گیا۔
امریکی ڈالر کے ساتھ ساتھ آج صبح دنیا کی دیگر اہم بین الاقوامی
کرنسیوں کے مقابلے میں بھی ہندوستانی روپیہ مضبوط ہونے میں کامیاب رہا۔ برطانوی
پاونڈ کے مقابلے روپے میں نمایاں مضبوطی دیکھی گئی۔ گزشتہ کاروباری سیشن کی
اختتامی قیمت 126.1124 روپے کے مقابلے برطانوی پاؤنڈ کی قیمت 0.9116 روپے یعنی
0.72 فیصد کم ہوکر 125.2008 روپے رہ گئی۔
اسی طرح یورو کے مقابلے میں بھی روپیہ مضبوط رہا۔ گزشتہ
کاروباری سیشن میں 105.1401 روپے پر بند ہونے والا یورو آج صبح ہندوستانی کرنسی کے
مقابلے 0.4191 روپے یعنی 0.40 فیصد کم ہوکر 104.7210 روپے کی سطح پر آگیا۔ اس کے
علاوہ جاپانی ین کی قیمت میں 0.66 فیصد کی کمی ہوئی اور یہ 0.5906 روپے کی سطح پر
آگیا، جبکہ چینی یوآن کی قیمت 0.17 فیصد گر کر 14.0551 روپے رہ گئی۔
غیر ملکی زرمبادلہ بازار کے ماہرین کا کہنا ہے کہ دنیا کی 6 اہم
کرنسیوں کے مقابلے میں ڈالر کی مضبوطی ظاہر کرنے والا ڈالر انڈیکس آج صبح 0.01
فیصد کے معمولی اضافے کے ساتھ 102.23 کی سطح پر برقرار ہے۔ اس کے باوجود گھریلو
شیئر بازار میں زبردست تیزی اور خام تیل کی قیمتوں میں حالیہ نرمی سے روپے کو نچلی
سطح پر مسلسل مضبوط سہارا مل رہا ہے۔ اسی وجہ سے روپیہ آج دیگر اہم بین الاقوامی
کرنسیوں کے مقابلے میں بھی مضبوطی حاصل کرنے میں کامیاب رہا۔
ماہرین کا خیال ہے کہ امریکہ میں مہنگائی کے تازہ اعداد و شمار
جاری ہونے اور عالمی بانڈ ییلڈ میں اتار چڑھاؤ کے بعد بازار میں احتیاط کا ماحول
ہے۔ تاہم، گھریلو شیئر بازار میں غیر ملکی سرمایہ کاروں کی مسلسل خریداری کے باعث
روپے کا رجحان مثبت بنا ہوا ہے۔ بازار کے تجزیہ کاروں کے مطابق آج کے پورے
کاروباری سیشن کے دوران اسپاٹ ڈالر-روپیہ تبادلے میں نچلی سطح پر 93.50 روپے پر
مضبوط سہارا اور بالائی سطح پر 94.30 روپے پر سخت مزاحمت برقرار رہ سکتی ہے۔
ہندوستھان سماچار
---------------
ہندوستھان سماچار / انظر حسن
