ہانگ کانگ، یکم نومبر (ہ س)۔
افغانستان نے ہانگ کانگ سکسز 2026 ٹورنامنٹ کا خطاب اپنے نام کر لیا ہے۔ اتوار کو مونگ کوک کے مشن روڈ گراو¿نڈ میں کھیلے گئے فائنل (کپ) مقابلے میں افغانستان نے آسٹریلیا کو چار وکٹوں سے شکست دی۔
فائنل میں آسٹریلیا نے چھ اوورز میں افغانستان کے سامنے 116 رنوں کا ہدف رکھا تھا، جسے افغان ٹیم نے محض 5.1 اوور میں دو وکٹوں کے نقصان پر حاصل کر لیا۔ اس جیت کے ساتھ افغانستان نے پہلی بار اس ٹورنامنٹ کا خطاب اپنے نام کیا۔
گلبدین نائب کی کپتانی میں افغانستان ہانگ کانگ سکسز کا خطاب جیتنے والا آٹھواں ملک بن گیا ہے۔ اس سے پہلے پاکستان، انگلینڈ، جنوبی افریقہ، سری لنکا، ہندوستان، آسٹریلیا اور ویسٹ انڈیز اس باوقار ٹورنامنٹ کی ٹرافی جیت چکے ہیں۔
مقابلے میں ٹاس جیت کر پہلے بلے بازی کرنے اتری آسٹریلیائی ٹیم نے مقررہ چھ اوورز میں چار وکٹوں کے نقصان پر 115 رن بنائے۔ ٹیم کی جانب سے میکس برائنٹ نے جارحانہ بلے بازی کرتے ہوئے 14 گیندوں پر چار چوکوں اور چار چھکوں کی مدد سے 44 رنوں کی اننگز کھیلی۔ ان کی اس اننگز نے آسٹریلیا کو مضبوط شروعات فراہم کی۔
اس کے علاوہ الیکس راس نے ناٹ آو¿ٹ 29 رن اور نک ہابسن نے 23 رنوں کا تعاون دیا۔ ان اننگز کی بدولت آسٹریلیا نے افغانستان کے سامنے 116 رنوں کا چیلنجنگ ہدف رکھا۔ افغانستان کی جانب سے کریم جنت اور ننگیالی خروٹے نے ایک ایک وکٹ حاصل کی۔
116 رنوں کے ہدف کا تعاقب کرنے اتری افغان ٹیم نے ابتدا ہی سے جارحانہ انداز اختیار کیا۔ عمران میر نے 14 گیندوں پر دو چوکوں اور چھ چھکوں کی مدد سے ناٹ آو¿ٹ 53 رن بنائے۔ وہیں فرمان اللہ صافی نے بھی تیز رفتار بلے بازی کی۔ انہوں نے سات گیندوں پر چار چھکوں کی مدد سے ناٹ آو¿ٹ 26 رن بنائے۔ کپتان گلبدین نائب نے بھی جیت میں اہم کردار ادا کیا اور چھ گیندوں پر دو چھکوں کی مدد سے 17 رن بنائے۔
افغانستان نے 5.1 اوور میں دو وکٹوں کے نقصان پر 119 رن بنا کر یہ مقابلہ چار وکٹوں سے جیت لیا۔ اس طرح ٹیم نے پانچ گیندیں باقی رہتے ہی ہدف حاصل کرکے پہلی بار ہانگ کانگ سکسز کی ٹرافی پر قبضہ جما لیا۔
افغانستان کرکٹ بورڈ نے اس کامیابی پر کھلاڑیوں، ٹیم انتظامیہ اور افغان کرکٹ شائقین کو مبارک باد دی ہے۔
’ہانگ کانگ سکسز‘ ایک بین الاقوامی ’سکس اے سائیڈ‘ (چھ کھلاڑیوں پر مشتمل) کرکٹ ٹورنامنٹ ہے، جو ہر سال ہانگ کانگ میں منعقد کیا جاتا ہے۔
ہندوستھان سماچار
ہندوستھان سماچار / عطاءاللہ
