ہانگ کانگ، 31 اکتوبر (ہ س)۔ ہانگ کانگ سکسز 2026 کے گروپ سی کے مقابلے میں ہفتہ کے روز متحدہ عرب امارات (یو اے ای) نے ہندوستان کو چھ وکٹ سے ہرا دیا۔ ہندوستان نے پہلے بلے بازی کرتے ہوئے چھ اوور میں 6 وکٹ پر 94 رن بنائے۔ جواب میں یو اے ای نے 4.2 اوور میں بغیر کوئی وکٹ کھوئے 97 رن بنا کر مقابلہ اپنے نام کر لیا۔ یو اے ای نے 10 گیندیں باقی رہتے جیت درج کی۔
ہندوستانی ٹیم کی شروعات انتہائی خراب رہی۔ نتیش رانا دو گیندوں پر چھ رن بنا کر آؤٹ ہوئے، جبکہ راہل تیوتیا ایک رن اور ششانک سنگھ ایک رن ہی بنا سکے۔ راہل ترپاٹھی نے سات گیندوں پر 24 رن کی تیز اننگز کھیلی، جس میں ایک چوکا اور تین چھکے شامل رہے۔ کپتان کرونال پانڈیا نے آٹھ گیندوں پر 15 رن بنائے۔ ٹی نٹراجن نے 14 گیندوں پر تین چوکے اور چار چھکوں کی مدد سے 38 رن بنا کر ٹیم کو باوقار اسکور تک پہنچایا۔ کلونت کھیجرولیا بغیر کھاتہ کھولے ناٹ آؤٹ رہے۔ ہندوستان نے اضافی کے طور پر نو رن دیے۔
یو اے ای کی جانب سے زاہد علی سب سے کامیاب گیندباز رہے۔ انہوں نے دو اوور میں 32 رن دے کر تین وکٹ لیے۔ محمد فاروق اور محمد فراز الدین کو ایک ایک وکٹ ملا۔
95 رن کے ہدف کا تعاقب کرنے اتری یو اے ای کی ٹیم نے ہندوستانی گیندبازوں کو کوئی موقع نہیں دیا۔ کپتان خالد شاہ اور انش ٹنڈن نے پہلے وکٹ کے لیے 26 گیندوں پر 97 رن کی اٹوٹ شراکت داری کر کے ٹیم کو جیت دلا دی۔ خالد شاہ نے 14 گیندوں پر ناٹ آؤٹ 52 رن بنائے۔ ان کی اننگز میں تین چوکے اور چھ چھکے شامل رہے۔ انش ٹنڈن نے 12 گیندوں پر ناٹ آؤٹ 39 رن بنائے، جس میں دو چوکے اور پانچ چھکے شامل تھے۔
ہندوستان کی جانب سے ٹی نٹراجن نے دو اوور میں 43 رن دیے، جبکہ ششانک سنگھ نے ایک اوور میں 17 رن خرچ کیے۔ نتیش رانا نے ایک اوور میں 24 رن دیے۔ ہندوستانی گیندبازوں کو کوئی وکٹ نہیں ملا۔ اس جیت کے ساتھ یو اے ای نے گروپ سی میں اپنا مقابلہ چھ وکٹ سے جیت لیا، جبکہ ہندوستان کی یہ مسلسل دوسری ہار رہی، اس سے پہلے پاکستان نے ہندوستان کو ہرایا تھا۔
ہندوستھان سماچار
---------------
ہندوستھان سماچار / انظر حسن
