نئی دہلی، 29 اکتوبر (ہ س): بھارتی صنعت و تجارت کی تنظیم فیڈریشن آف انڈین چیمبرز آف کامرس اینڈ انڈسٹری (فکی) نے کھیلوں کے کاروبار سے متعلق عالمی کانفرنس اور انڈیا اسپورٹس ایوارڈز کے 16ویں ایڈیشن ’ٹرف 2026‘ کے انعقاد کا اعلان کیا ہے۔ یہ پروگرام 20 نومبر کو نئی دہلی کے فیڈریشن ہاؤس میں منعقد ہوگا۔ اس بار فرانس کانفرنس کا شراکت دار ملک ہوگا۔ کانفرنس کا موضوع ’’ہندوستان کی کھیل معیشت کو فروغ دینا: شراکت داری، جدت اور عالمی قیادت‘‘ رکھا گیا ہے۔

فکی کی جانب سے جاری پریس ریلیز کے مطابق، کانفرنس میں فرانس کا ایک کھیلوں سے متعلق وفد شرکت کرے گا۔ اس میں بزنس فرانس، چوز پیرس ریجن، اٹوٹ فرانس، آئی این ایس ای پی، الکور ایکوئپمنٹ اور گروپ اے بی ای او کے نمائندے شامل ہوں گے۔

فرانسیسی وفد اپنی شرکت کا آغاز ہندوستانی متعلقہ فریقوں کے ساتھ دعوت کی بنیاد پر منعقد ہونے والے اسپیڈ نیٹ ورکنگ سیشن سے کرے گا۔ اس کے بعد ہندوستان-فرانس کھیل شراکت داری، پیرس اولمپکس 2024 سے حاصل ہونے والے تجربات، ہندوستان کے اولمپک عزائم اور کھیلوں کی ٹیکنالوجی جیسے موضوعات پر مختلف اجلاسوں میں تبادلہ خیال کیا جائے گا۔

کانفرنس کے افتتاحی اجلاس میں کھیلوں سے متعلق دو تحقیقی رپورٹس جاری کی جائیں گی۔ ان میں فکی-وی سی آئی کی رپورٹ اور فکی-پی ڈبلیو سی کی رپورٹ ’کرکٹ 2.0: فرنٹ فٹ پر کھیلنا‘ شامل ہیں۔

فکی کی کھیل کمیٹی کے چیئرمین اور جی ایم آر گروپ کے اسٹریٹجک مشیر پی کے ایس وی ساگر نے کہا کہ پیرس اولمپکس 2024 کے انعقاد میں فرانس کے تجربات ہندوستان کے کھیلوں سے متعلق عزائم کے لیے اہم سبق فراہم کرتے ہیں۔ ٹرف 2026 میں فرانسیسی وفد اور ہندوستانی متعلقہ فریق اعلیٰ کارکردگی والے کھیلوں، بنیادی ڈھانچے، ٹیکنالوجی اور کھیلوں کے مقابلوں کے شعبوں میں شراکت داری کے امکانات پر غور کریں گے۔

انہوں نے کہا کہ کھیلوں سے متعلق تحقیقی رپورٹ جاری کرتے ہوئے بھی خوشی ہو رہی ہے۔ امید ہے کہ یہ رپورٹ کھیلوں کی صنعت کے لیے ایک مفید رہنما ثابت ہوگی۔

فکی کی کھیل کمیٹی کے شریک چیئرمین اور اڈانی اسپورٹس لائن کے چیف بزنس آفیسر سنجے اڈیسرہ نے کہا کہ ہندوستانی کھیلوں کی دنیا اب منصوبوں اور ارادوں سے آگے بڑھ کر ان پر عمل درآمد کے مرحلے میں پہنچ رہی ہے۔ اس تبدیلی کو تیز کرنے میں درست شراکت داری اہم کردار ادا کرے گی۔ ان کے مطابق، ٹرف 2026 ہندوستانی اور فرانسیسی متعلقہ فریقوں کو خیالات کے تبادلے اور طویل مدتی تعاون کو فروغ دینے کا پلیٹ فارم فراہم کرے گا۔

ٹرف ملک کے اہم کھیل کاروباری پلیٹ فارمز میں شامل ہو چکا ہے۔ یہ کانفرنس پالیسی سازوں، کھلاڑیوں، سرمایہ کاروں، برانڈز اور اختراع سے وابستہ افراد کو ایک ساتھ لاتی ہے۔

کانفرنس کا اختتام شام کو انڈیا اسپورٹس ایوارڈز کی تقریب کے ساتھ ہوگا، جس میں کھیلوں کے کاروبار اور قیادت کے شعبوں میں نمایاں خدمات انجام دینے والوں کو اعزاز سے نوازا جائے گا۔ اس کے بعد ایک خصوصی نیٹ ورکنگ عشائیے کا بھی اہتمام کیا جائے گا۔

ہندوستھان سماچار

---------------

ہندوستھان سماچار / عبدالسلام صدیقی