نئی دہلی، 29 اکتوبر (ہ س)۔ اسٹیل پروسیسنگ کے شعبے کی کمپنی بامبے کوٹیڈ اینڈ اسپیشل اسٹیلز لمیٹڈ کا 183.06 کروڑ روپے کا آئی پی او آج سبسکرپشن کے لیے کھل گیا۔ سرمایہ کار اس کے لیے 2 نومبر تک بولیاں لگا سکتے ہیں۔ آئی پی او کھلنے کے ابتدائی دو گھنٹوں کے اندر ہی اسے مکمل سبسکرپشن مل گیا تھا۔ پہلے دن کے اختتام تک اس اجرا کو 2.81 گنا سبسکرپشن حاصل ہو چکا تھا۔
آئی پی او بند ہونے کے بعد 3 نومبر کو حصص کی الاٹمنٹ ہوگی، جبکہ 4 نومبر کو کامیاب سرمایہ کاروں کے ڈی میٹ کھاتوں میں حصص منتقل کر دیے جائیں گے۔ اسی دن حصص الاٹ نہ ہونے والے سرمایہ کاروں کو رقم واپس کرنے کا عمل بھی شروع ہو جائے گا۔ کمپنی کے حصص 5 نومبر کو نیشنل اسٹاک ایکسچینج (این ایس ای) اور بامبے اسٹاک ایکسچینج (بی ایس ای) میں درج ہو سکتے ہیں۔
اس آئی پی او کے لیے فی حصص قیمت کی حد 78 سے 82 روپے مقرر کی گئی ہے، جبکہ ایک لاٹ میں 182 حصص شامل ہیں۔ خوردہ سرمایہ کار کم از کم ایک لاٹ، یعنی 182 حصص کے لیے بولی لگا سکتے ہیں، جس کے لیے 14,924 روپے کی سرمایہ کاری درکار ہوگی۔ خوردہ سرمایہ کار زیادہ سے زیادہ 13 لاٹ، یعنی 2,366 حصص کے لیے 1,94,012 روپے تک کی بولی لگا سکتے ہیں۔
اس آئی پی او کے تحت 10 روپے کی فی حصص اسمی قدر کے مجموعی طور پر 2.23 کروڑ نئے حصص جاری کیے جا رہے ہیں۔ اس میں موجودہ حصص کی فروخت کی کوئی پیشکش شامل نہیں ہے۔
آئی پی او میں اہل ادارہ جاتی خریداروں (کیو آئی بی) کے لیے زیادہ سے زیادہ 50 فیصد حصہ مختص کیا گیا ہے۔ خوردہ سرمایہ کاروں کے لیے زیادہ سے زیادہ 35 فیصد اور غیر ادارہ جاتی سرمایہ کاروں (این آئی آئی) کے لیے کم از کم 15 فیصد حصہ محفوظ رکھا گیا ہے۔ اس ایشو کے لیے اسمارٹ ہورائزن کیپیٹل ایڈوائزرز پرائیویٹ لمیٹڈ کو بک رننگ لیڈ منیجر اور کی فن ٹیکنالوجیز لمیٹڈ کو رجسٹرار مقرر کیا گیا ہے۔
نئے حصص کی فروخت سے حاصل ہونے والی رقم میں سے 125 کروڑ روپے کمپنی کے بعض موجودہ قرضوں کو مکمل یا جزوی طور پر ادا کرنے کے لیے استعمال کیے جائیں گے۔ مزید 15.77 کروڑ روپے سیمنز فنانشل سروسز پرائیویٹ لمیٹڈ کے ساتھ موجودہ لیز انتظام کے تحت سرمایہ جاتی آلات حاصل کرنے کی لاگت پوری کرنے پر خرچ ہوں گے۔ باقی رقم عمومی کارپوریٹ مقاصد کے لیے استعمال کی جائے گی۔
سیبی میں جمع کرائے گئے کمپنی کے ریڈ ہیرنگ پراسپیکٹس (آر ایچ پی) کے مطابق، گزشتہ مالی برسوں کے دوران اس کی مالی حالت میں بہتری آئی ہے۔ مالی سال 24-2023 میں کمپنی کو 21.14 کروڑ روپے کا خالص منافع ہوا تھا، جو 25-2024 میں بڑھ کر 28.67 کروڑ روپے ہو گیا۔ مالی سال 26-2025 میں منافع میں سات فیصد اضافہ ہوا اور یہ 30.54 کروڑ روپے تک پہنچ گیا۔ موجودہ مالی سال 27-2026 کی پہلی سہ ماہی، یعنی 30 جون تک، کمپنی 15.08 کروڑ روپے کا خالص منافع حاصل کر چکی تھی۔
اس دوران کمپنی کی آمدنی میں بھی مسلسل اضافہ درج کیا گیا۔ مالی سال24-2023 میں کمپنی کی مجموعی آمدنی 765.41 کروڑ روپے تھی، جو 25-2024 میں بڑھ کر 1,058.65 کروڑ روپے ہو گئی۔ مالی سال 26-2025 میں اس میں 20 فیصد اضافہ ہوا اور یہ 1,269.83 کروڑ روپے تک پہنچ گئی۔ موجودہ مالی سال 27-2026 کی پہلی سہ ماہی، یعنی 30 جون تک، کمپنی کو 397.55 کروڑ روپے کی مجموعی آمدنی حاصل ہو چکی تھی۔
ہندوستھان سماچار
ہندوستھان سماچار / محمد شہزاد
