ڈھاکہ، 28 اکتوبر (ہ س)۔ بنگلہ دیش کے مایہ ناز وکٹ کیپر بلے باز مشفق الرحیم انگلی میں چوٹ لگنے کے باعث ویسٹ انڈیز کے خلاف پہلے ٹیسٹ میچ سے باہر ہو گئے ہیں۔ تاہم، ٹیم کو امید ہے کہ وہ 5 نومبر سے سلہٹ میں شروع ہونے والے دوسرے ٹیسٹ میچ تک فٹ ہو جائیں گے۔

مشفق الرحیم کو منگل کے روز بنگلہ دیش کرکٹ بورڈ کی اکیڈمی میں پریکٹس کے دوران شہادت کی انگلی میں چوٹ لگی۔ نیٹ پریکٹس کے دوران ایک نیٹ بولر کی گیند ان کی انگلی پر جا لگی، جس کے بعد درد کے باعث انہیں پریکٹس سیشن چھوڑنا پڑا۔ یہ چوٹ ڈھاکہ کے شیرِ بنگلہ نیشنل کرکٹ اسٹیڈیم میں سیریز کے پہلے ٹیسٹ میچ سے محض ایک دن قبل لگی۔

ابتدائی جانچ میں چوٹ زیادہ سنگین معلوم نہیں ہوئی تھی، لیکن اگلی صبح بھی انہیں تکلیف محسوس ہوئی۔ خاص طور پر وکٹ کیپنگ کے دستانے پہننے کے دوران انہیں درد ہو رہا تھا۔ ایکسرے میں ہڈی میں کسی قسم کے فریکچر کا پتہ نہیں چلا، تاہم طبی ٹیم نے پہلے ٹیسٹ میں انہیں کھلانے کا خطرہ مول نہ لینے کا فیصلہ کیا۔

بنگلہ دیشی ٹیم کے فزیوتھراپسٹ بایزید الاسلام خان نے بتایا کہ 38 سالہ مشفق الرحیم کی انگلی میں چوٹ لگنے سے سوجن اور اندرونی زخم آیا ہے۔ انہوں نے کہا، ’’مشفق الرحیم کو کل پریکٹس کے دوران شہادت کی انگلی میں چوٹ لگی تھی۔ اس کے بعد انہیں نگرانی میں رکھا گیا۔ لیکن آج صبح تک ان کی حالت میں خاطر خواہ بہتری نہیں آئی۔ یہ اندرونی چوٹ ہے۔ ہمیں امید ہے کہ وہ اگلے تین دن میں صحت یاب ہو جائیں گے۔ وہ اگلے ٹیسٹ میچ کے لیے دستیاب رہیں گے۔‘‘

مشفق الرحیم کی غیر موجودگی میں توحید ہردوئے کو پہلے ٹیسٹ کے لیے بنگلہ دیش کی حتمی الیون میں شامل کیا گیا ہے۔ ہردوئے کو طویل فارمیٹ میں کھیلنے کا محدود تجربہ حاصل ہے۔ انہوں نے اسی سال ہرارے میں زمبابوے کے خلاف ٹیسٹ کرکٹ میں اپنا ڈیبیو کیا تھا۔

مشفق الرحیم بنگلہ دیش کی ٹیسٹ بلے بازی کے اہم کھلاڑیوں میں شمار ہوتے ہیں۔ گزشتہ سال وہ بنگلہ دیش کی جانب سے 100 ٹیسٹ میچ کھیلنے والے پہلے کرکٹر بنے تھے۔ اس سنگِ میل کو عبور کرنے کے بعد کھیلے گئے چھ ٹیسٹ میچوں میں ان کی بلے بازی اوسط 40 سے زیادہ رہی ہے۔

ان کا گزشتہ میچ رواں ماہ کے آغاز میں ابوظہبی میں افغانستان کے خلاف تھا۔ اس میچ کی پہلی اننگز میں وہ اپنا کھاتہ بھی نہیں کھول سکے تھے، تاہم دوسری اننگز میں انہوں نے 81 رنز بنائے تھے۔

مشفق الرحیم کا کیریئر عموماً چوٹوں سے بڑی حد تک محفوظ رہا ہے۔ تاہم، ذاتی وجوہات کی بنا پر وہ سری لنکا کے خلاف اپنے ملک میں کھیلے گئے ایک ٹیسٹ میچ میں شرکت نہیں کر سکے تھے۔ اس سے قبل وہ نومبر 2024 میں بنگلہ دیش کے دورۂ ویسٹ انڈیز کے دوران چوٹ کے باعث ٹیم سے باہر ہوئے تھے۔

اس دوران ڈھاکہ میں بنگلہ دیش کے کپتان نجم الحسن شانتو نے ٹاس جیت کر پہلے بلے بازی کرنے کا فیصلہ کیا۔ اس طرح میزبان ٹیم نے اپنے تجربہ کار کھلاڑیوں میں سے ایک مشفق الرحیم کے بغیر سیریز کا آغاز کیا۔

دو ٹیسٹ میچوں پر مشتمل یہ سیریز 2025تا2027 کے آئی سی سی ورلڈ ٹیسٹ چیمپئن شپ سائیکل کے تناظر میں بھی بنگلہ دیش کے لیے اہم ہے۔ بنگلہ دیش کو اپنی مہم میں ابھی چھ ٹیسٹ میچ کھیلنے ہیں۔ پہلی مرتبہ فائنل میں پہنچنے کی امیدیں برقرار رکھنے کے لیے اسے کم از کم چار میچ جیتنے اور ایک میچ ڈرا کرنے کی ضرورت ہے۔

ہندوستھان سماچار

---------------

ہندوستھان سماچار / عبدالسلام صدیقی