شیئر بازار میں جیو پلیٹ فارمز
کا شاندار آغاز، منافع میں آئی پی او سرمایہ کار
نئی
دہلی، 28 اکتوبر (ہ س)۔ ڈیجیٹل کنیکٹیویٹی، ڈیجیٹل
سروسز اور ٹیکنالوجی سلوشنز فراہم کرنے والی ملک کی سرکردہ کمپنی جیو پلیٹ فارمز
لمیٹڈ کے شیئروں نے آج شیئر بازار میں شاندار آغاز کر کے اپنے آئی پی او سرمایہ
کاروں کو خوش کر دیا۔ آئی پی او کے تحت کمپنی کے شیئر
1,119 روپے کی قیمت پر جاری کیے گئے تھے۔ آج بی ایس ای اور این ایس ای
دونوں اہم ایکسچینجز پر اس کی لسٹنگ 21.4 فیصد کے بمپر پریمیم کے ساتھ 1,358 روپے کی سطح پر ہوئی۔ اس دھماکے دار آغاز کے ساتھ ہی
جیو پلیٹ فارمز، ریلائنس انڈسٹریز کے بعد ملک کی دوسری سب سے قیمتی لسٹڈ کمپنی بن
گئی ہے۔
لسٹنگ
کے بعد سرمایہ کاروں کی زبردست خریداری کی حمایت سے یہ شیئر کچھ ہی دیر میں اور
اچھل کر 1,375 روپے کی بالائی سطح تک پہنچ گیا۔ بازار میں مسلسل جاری خرید و
فروخت کے درمیان صبح 11.15 بجے تک کا کاروبار ہونے کے بعد یہ
شیئر 1,358 روپے کی سطح پر مضبوطی کے ساتھ
برقرار تھا۔ اس طرح اب تک کے کاروبار میں
کمپنی کے آئی پی او سرمایہ کاروں کو فی شیئر 239 روپے یعنی 21.36 فیصد کا براہِ راست اور زبردست
فائدہ ہو چکا ہے۔
اس
کمپنی کا 30,187.65 کروڑ روپے کا بڑا آئی پی او 21 سے
23 اکتوبر کے درمیان سبسکرپشن کے لیے کھلا تھا۔ اس آئی پی او کو سرمایہ کاروں
کی جانب سے زبردست رسپانس ملا تھا، جس کی وجہ سے یہ مجموعی طور پر 16.36 گنا سبسکرائب ہوا تھا۔ ان میں کوالیفائیڈ انسٹی ٹیوشنل
بائرز (کیو آئی بی) کے لیے ریزرو پورشن 70.52 گنا (اینکر کے بغیر) سبسکرائب ہوا
تھا۔ اسی طرح نان انسٹی ٹیوشنل
انویسٹرز (این آئی آئی) کے لیے ریزرو پورشن میں 13.72 گنا سبسکرپشن آیا تھا، جس میں 10
لاکھ سے اوپر والے ایچ این آئی کا حصہ 15.63 گنا اور 10 لاکھ سے نیچے والے ایچ
این آئی کا حصہ 9.90 گنا بھرا تھا۔ اس کے علاوہ ریٹیل انویسٹرز کے
لیے ریزرو پورشن میں 2.76 گنا، شیئر ہولڈرز کیٹیگری میں 7.25 گنا اور ملازمین کے لیے ریزرو
پورشن میں 2.58 گنا سبسکرپشن درج کیا گیا تھا۔
اس
آئی پی او کے تحت 10 روپے فیس ویلیو والے کل 27 کروڑ شیئر جاری کیے گئے ہیں۔ یہ پورا آئی پی او 100 فیصد نئے
ایشو پر مبنی تھا۔ یعنی اس میں آفر فار سیل ونڈو
کے ذریعے کوئی پروموٹر ہولڈنگ نہیں فروخت کی گئی ہے۔ آئی پی او کے نئے ایشو سے جمع
کی گئی رقم میں سے 27,500 کروڑ روپے کا استعمال کمپنی کی
بنیادی مٹیریل سبسڈیری ریلائنس جیو انفوکوم لمیٹڈ کی جانب سے لیے گئے بعض واجب
الادا قرضوں کی مکمل یا جزوی طور پر پیشگی ادائیگی (پری پیمنٹ) میں کیا جائے گا۔ اس کے بعد بچی ہوئی بقیہ رقم
عام کارپوریٹ مقاصد اور ایشو کے اخراجات کی بھرپائی کے لیے استعمال کی جائے گی۔
جیو
پلیٹ فارمز لمیٹڈ کی مالی حالت کی بات کریں تو کیپٹل مارکیٹ ریگولیٹر سیبی کے پاس
جمع کرائے گئے دستاویزات میں دستیاب اعداد و شمار کے مطابق کمپنی کی مالی صحت میں
گزشتہ تین مالی سالوں کے دوران شاندار بہتری آئی ہے۔ مالی سال 24-2023 میں کمپنی کو
21,434 کروڑ روپے کا خالص منافع (پرافٹ
آفٹر ٹیکس) ہوا تھا، جو اگلے مالی سال 25-2024 میں بڑھ کر 26,120.30 کروڑ روپے کی سطح پر پہنچ گیا۔ گزشتہ مالی سال 26-2025 میں
کمپنی کا خالص منافع اچھل کر 30,052.70 کروڑ روپے کی سطح پر پہنچ گیا۔ اس کے علاوہ موجودہ مالی سال
27-2026 کی پہلی سہ ماہی یعنی 30 جون 2026 تک کمپنی کو 7,764.10 کروڑ روپے کا خالص منافع ہو چکا
تھا۔
اس
دوران کمپنی کی آمدنی (ریونیو) میں بھی مسلسل اضافہ درج کیا گیا۔ مالی سال 24-2023 میں کمپنی کو
1,10,175.40 کروڑ روپے کی کل آمدنی حاصل ہوئی
تھی، جو مالی سال 25-2024 میں بڑھ کر 1,29,333 کروڑ روپے کی سطح پر پہنچ گئی۔ وہیں، گزشتہ مالی سال 26-2025
میں کمپنی کی کل آمدنی میں مزید اضافہ ہوا، جس سے یہ بڑھ کر 1,49,759.10 کروڑ روپے کی سطح پر پہنچ گئی۔ موجودہ مالی سال 27-2026 کی
پہلی سہ ماہی یعنی 30 جون 2026 تک کمپنی کو 40,197.90 کروڑ روپے کی کل آمدنی حاصل ہو چکی
تھی۔
ہندوستھان سماچار
---------------
ہندوستھان سماچار / انظر حسن
