آئی او اے نے آئی ڈبلیو ایف ورلڈ چیمپئن شپ 2029 کی میزبانی احمد آباد کو ملنے پر خوشی کا اظہار کیا۔ہندوستان پہلی مرتبہ اس عالمی ویٹ لفٹنگ مقابلے کی میزبانی کرے گا

نئی دہلی، 27 اکتوبر (ہ س)۔ انڈین اولمپک ایسوسی ایشن (آئی او اے) نے 2029 میں ہونے والی انٹرنیشنل ویٹ لفٹنگ فیڈریشن (آئی ڈبلیو ایف) ورلڈ چیمپئن شپ کی میزبانی گجرات کے شہر احمد آباد کو سونپے جانے کے فیصلے کا خیرمقدم کیا ہے۔ یہ پہلی مرتبہ ہوگا جب ویٹ لفٹنگ کی اس عالمی چیمپئن شپ کا انعقاد ہندوستان میں کیا جائے گا۔

آئی ڈبلیو ایف نے 25 اکتوبر کو چین کے شہر ننگبو میں منعقدہ اپنی ایگزیکٹیو بورڈ میٹنگ کے بعد احمد آباد کو میزبانی سونپنے کی تصدیق کی۔ یہ اعلان ہندوستان کے بین الاقوامی کھیلوں کے کیلنڈر میں ایک اور اہم کامیابی ہے۔ گجرات میں ویٹ لفٹنگ کے لیے یہ سال خاص اہمیت کا حامل رہا ہے، کیونکہ اس سے قبل 2026 میں گاندھی نگر نے ایشین ویٹ لفٹنگ چیمپئن شپ کی میزبانی کی تھی۔

احمد آباد 2030 میں ہونے والے دولت مشترکہ کھیلوں کی میزبانی بھی کرنے والا ہے۔ ایسے میں آئی ڈبلیو ایف ورلڈ چیمپئن شپ ہندوستان کو دنیا کے بہترین کھلاڑیوں اور شائقین کا استقبال کرنے کا ایک اور موقع فراہم کرے گی۔ اس کے ساتھ ہی پہلی مرتبہ ویٹ لفٹنگ کے اہم ترین مقابلوں میں سے ایک ہندوستانی شائقین کے سامنے منعقد ہوگا۔

انڈین اولمپک ایسوسی ایشن کی صدر ڈاکٹر پی ٹی اوشا نے کہا کہ آئی ڈبلیو ایف ورلڈ چیمپئن شپ کا احمد آباد میں انعقاد ہندوستانی کھیلوں کے لیے فخر کا لمحہ اور دنیا کا استقبال کرنے کا ایک اور موقع ہے۔ انہوں نے کہا کہ ہندوستانی ویٹ لفٹنگ نے ہمیں کئی شاندار چیمپئن دیے ہیں، جن میں اولمپک تمغہ یافتہ اور عالمی چیمپئن میرابائی چانو بھی شامل ہیں۔ ان کی کامیابیوں نے ملک بھر میں بہت سے لوگوں کو ترغیب دی ہے۔

پی ٹی اوشا نے کہا کہ دنیا کے بہترین ویٹ لفٹرز کو ہندوستان لانے سے نئی نسل کو اپنے ہی ملک میں ان کھلاڑیوں کو مقابلہ کرتے ہوئے دیکھنے کا موقع ملے گا۔ انہیں امید ہے کہ اس سے مزید نوجوان ہندوستانی اس کھیل کو اپنانے اور اعلیٰ ترین سطح پر مقابلہ کرنے کا خواب دیکھنے کے لیے متاثر ہوں گے۔

انڈین ویٹ لفٹنگ فیڈریشن کے صدر سہدیو یادو نے کہا، ”ہندوستان میں پہلی مرتبہ آئی ڈبلیو ایف ورلڈ چیمپئن شپ کی میزبانی ہندوستانی ویٹ لفٹنگ کے لیے ایک اہم سنگ میل ہے۔ اس چیمپئن شپ میں ہندوستان کا ریکارڈ شاندار رہا ہے اور ملک نے اب تک 18 تمغے جیتے ہیں، جن میں تین عالمی خطاب بھی شامل ہیں۔“

انہوں نے کہا کہ 2029 کا یہ انعقاد اس وراثت کو آگے بڑھانے، ہندوستان میں اس کھیل کو مضبوط بنانے اور اپنے کھلاڑیوں کو گھریلو شائقین کے سامنے اعلیٰ ترین سطح پر مقابلہ کرنے کا تجربہ فراہم کرنے کا موقع دے گا۔ انہوں نے کہا کہ فیڈریشن احمد آباد میں بین الاقوامی ویٹ لفٹنگ برادری کا استقبال کرنے کے لیے پرجوش ہے۔

ہندوستھان سماچار

ہندوستھان سماچار / محمد شہزاد