نئی دہلی، 27 اکتوبر (ہ س)۔ جواہرات اور زیورات کے شعبے میں سرگرم کمپنی ایم کے سنز فائن جیولز لمیٹڈ کا 275.40 کروڑ روپے مالیت کا ابتدائی عوامی ایشو (آئی پی او) کل سبسکرپشن کے لیے کھولا جائے گا۔ کمپنی ممبئی اور احمد آباد میں اپنے شورومز کے نیٹ ورک کے ذریعے سونے، ہیروں اور امریکن ڈائمنڈ کے زیورات کی خردہ فروخت کرتی ہے۔ اس کے علاوہ کمپنی مختلف اقسام کی انگوٹھیاں، ہار، چوڑیاں، جھمکے، بریسلیٹ، منگل سوتر اور دلہنوں کے لیے خصوصی و حسبِ منشا زیورات بھی تیار کرتی ہے۔ سرمایہ کار اس آئی پی او میں 30 اکتوبر تک بولی لگا سکیں گے۔
آئی پی او بند ہونے کے بعد 2 نومبر کو حصص کی الاٹمنٹ کی جائے گی۔ اسی روز الاٹ کیے گئے حصص کامیاب سرمایہ کاروں کے ڈی میٹ کھاتوں میں منتقل کر دیے جائیں گے۔ جن سرمایہ کاروں کو حصص الاٹ نہیں ہوں گے، ان کے لیے رقم کی واپسی کا عمل بھی اسی دن شروع ہو جائے گا۔ کمپنی کے حصص 4 نومبر کو نیشنل اسٹاک ایکسچینج (این ایس ای) اور بامبے اسٹاک ایکسچینج (بی ایس ای) میں درج ہونے کی توقع ہے۔
اس آئی پی او کے لیے فی حصص قیمت کی حد 153 روپے سے 162 روپے مقرر کی گئی ہے، جب کہ ایک لاٹ میں 91 حصص شامل ہوں گے۔ خردہ سرمایہ کار کم از کم ایک لاٹ، یعنی 91 حصص کے لیے بولی لگا سکتے ہیں، جس کے لیے انہیں 14,742 روپے کی سرمایہ کاری کرنا ہوگی۔ خردہ سرمایہ کار زیادہ سے زیادہ 13 لاٹ، یعنی 1,183 حصص کے لیے بولی لگا سکتے ہیں، جس کی مالیت 1,91,646 روپے ہوگی۔
اس آئی پی او کے تحت 10 روپے فی حصص کی اسمی قدر کے مجموعی طور پر 1.70 کروڑ حصص جاری کیے جا رہے ہیں۔ ان میں تقریباً 220.32 کروڑ روپے مالیت کے 1.36 کروڑ نئے حصص شامل ہیں، جب کہ پروموٹر کی جانب سے 55.08 کروڑ روپے مالیت کے 34 لاکھ حصص آفر فار سیل (او ایف ایس) کے ذریعے فروخت کیے جائیں گے۔ او ایف ایس کے ذریعے حاصل ہونے والی پوری رقم پروموٹر رام چندر مرلی دھر رایمالانی کو ملے گی۔
اس آئی پی او میں اہل ادارہ جاتی خریداروں (کیو آئی بی) کے لیے زیادہ سے زیادہ 50 فیصد حصہ مختص کیا گیا ہے۔ خردہ سرمایہ کاروں کے لیے کم از کم 35 فیصد، جب کہ غیر ادارہ جاتی سرمایہ کاروں (این آئی آئی) کے لیے کم از کم 15 فیصد حصہ محفوظ رکھا گیا ہے۔ اس پورے ایشو کے لیے آریامن فنانشیل سروسز لمیٹڈ کو بک رننگ لیڈ منیجر مقرر کیا گیا ہے، جب کہ بگ شیئر سروسز پرائیویٹ لمیٹڈ رجسٹرار کی ذمہ داریاں انجام دے گی۔
نئے حصص کے اجراء سے حاصل ہونے والی رقم میں سے 152.84 کروڑ روپے کمپنی مہاراشٹر میں نیا شوروم قائم کرنے اور گجرات میں موجودہ شورومز کی توسیع سے متعلق اخراجات پورے کرنے کے لیے استعمال کرے گی۔ اس کے علاوہ 30 کروڑ روپے کمپنی کے بعض واجب الادا قرضوں کا بوجھ کم کرنے پر خرچ کیے جائیں گے۔ باقی رقم عمومی کاروباری مقاصد کے لیے استعمال کی جائے گی۔
ایم کے سنز فائن جیولز لمیٹڈ کی مالی صورتِ حال کے حوالے سے کمپنی کی جانب سے سیکیورٹیز اینڈ ایکسچینج بورڈ آف انڈیا (سیبی) کے پاس جمع کرائے گئے ریڈ ہیرنگ پراسپیکٹس میں درج معلومات کے مطابق، گزشتہ مالی برسوں کے دوران کمپنی کی مالی کارکردگی میں نمایاں بہتری آئی ہے۔
مالی سال 2023تا2024 میں کمپنی کو 8.17 کروڑ روپے کا خالص منافع (ٹیکس کے بعد منافع) حاصل ہوا تھا، جو مالی سال 2024تا2025 میں بڑھ کر 23.26 کروڑ روپے ہو گیا۔ مالی سال 2025تا2026 میں اس میں 123 فیصد کا زبردست اضافہ ہوا اور خالص منافع 51.80 کروڑ روپے تک پہنچ گیا۔ موجودہ مالی سال 2026تا2027 کی پہلی سہ ماہی، یعنی 30 جون 2026 تک، کمپنی 15.02 کروڑ روپے کا خالص منافع حاصل کر چکی تھی۔
ہندوستھان سماچار
---------------
ہندوستھان سماچار / عبدالسلام صدیقی
