نئی دہلی، 27 اکتوبر (ہ س)۔ سول تعمیرات کے شعبے میں سرگرم کمپنی اجوا پروجیکٹس لمیٹڈ کا 38.05 کروڑ روپے مالیت کا ابتدائی عوامی ایشو (آئی پی او) کل سبسکرپشن کے لیے کھولا جائے گا۔ سرمایہ کار اس آئی پی او میں 30 اکتوبر تک بولی لگا سکیں گے۔

آئی پی او بند ہونے کے بعد 2 نومبر کو حصص کی الاٹمنٹ کی جائے گی، جب کہ 3 نومبر کو الاٹ کیے گئے حصص کامیاب سرمایہ کاروں کے ڈی میٹ کھاتوں میں منتقل کر دیے جائیں گے۔ اسی روز ان سرمایہ کاروں کو رقم واپس کرنے کا عمل بھی شروع ہو جائے گا جنہیں حصص الاٹ نہیں ہوں گے۔ کمپنی کے حصص 4 نومبر کو بامبے اسٹاک ایکسچینج (بی ایس ای) کے ایس ایم ای پلیٹ فارم پر درج ہونے کی توقع ہے۔

یہ ایک مقررہ قیمت والا ایشو (فکسڈ پرائس ایشو) ہے، جس میں فی حصص قیمت 203 روپے مقرر کی گئی ہے، جب کہ ایک لاٹ میں 600 حصص شامل ہیں۔ خردہ سرمایہ کار کم از کم دو لاٹ، یعنی 1,200 حصص کے لیے درخواست دے سکتے ہیں، جس کے لیے انہیں 2,43,600 روپے کی سرمایہ کاری کرنا ہوگی۔ اس کے علاوہ غیر ادارہ جاتی سرمایہ کاروں، یعنی زیادہ مالیت کے انفرادی سرمایہ کاروں (ایچ این آئی) کے لیے کم از کم تین لاٹ، یعنی 1,800 حصص کی بولی لگانے کی گنجائش ہے، جس کے لیے 3,65,400 روپے درکار ہوں گے۔

اس آئی پی او کے تحت 10 روپے فی حصص ویلیو کے مجموعی طور پر 18,74,400 حصص جاری کیے جا رہے ہیں۔ ان میں 30.45 کروڑ روپے مالیت کے 15 لاکھ نئے حصص شامل ہیں، جب کہ پروموٹرز کی جانب سے 7.60 کروڑ روپے مالیت کے 3,74,400 حصص آفر فار سیل (او ایف ایس) کے ذریعے فروخت کیے جائیں گے۔ او ایف ایس کے ذریعے حاصل ہونے والی پوری رقم حصص فروخت کرنے والے پروموٹرز کو ملے گی۔

اس آئی پی او میں مارکیٹ میکر کے زمرے کے لیے 94,800 حصص مختص کرنے کے بعد باقی خالص پیش کش میں سے 50.03 فیصد حصہ غیر ادارہ جاتی سرمایہ کاروں (این آئی آئی) کے لیے محفوظ رکھا گیا ہے، جب کہ خردہ سرمایہ کاروں کے لیے 49.97 فیصد حصہ مختص کیا گیا ہے۔ اس پورے ایشو کے لیے وِلتھ مائن نیٹ ورکس لمیٹڈ کو بک رننگ لیڈ منیجر مقرر کیا گیا ہے، جب کہ کیفن ٹیکنالوجیز لمیٹڈ رجسٹرار کی ذمہ داریاں انجام دے گی۔ اس کے علاوہ پربھات فنانشیل سروسز لمیٹڈ کمپنی کے مارکیٹ میکر کے طور پر کام کرے گی۔

نئے حصص کی فروخت سے حاصل ہونے والی رقم میں سے 8.10 کروڑ روپے کمپنی پلانٹ، مشینری، نقل و حمل کی گاڑیاں اور دیگر اثاثے خریدنے سمیت سرمایہ جاتی اخراجات کی ضروریات پوری کرنے کے لیے استعمال کرے گی۔ مزید برآں، 9.35 کروڑ روپے کمپنی کے بعض واجب الادا قرضوں کی ادائیگی اور قبل از وقت قرض چکانے پر خرچ کیے جائیں گے۔ اسی طرح چار کروڑ روپے کاروبار کے روزمرہ اخراجات اور گردشی سرمائے (ورکنگ کیپیٹل) کی ضروریات پوری کرنے کے لیے مختص کیے گئے ہیں۔ باقی رقم عمومی کارپوریٹ ضروریات پوری کرنے اور آئی پی او کے اخراجات کی تلافی کے لیے استعمال کی جائے گی۔

اجوا پروجیکٹس لمیٹڈ کی جانب سے جمع کرائے گئے دستاویزات میں درج معلومات کے مطابق، گزشتہ مالی برسوں کے دوران کمپنی کی مالی کارکردگی میں نمایاں بہتری آئی ہے۔

مالی سال 2023تا2024 میں کمپنی کو 2.95 کروڑ روپے کا خالص منافع (ٹیکس کے بعد منافع) حاصل ہوا تھا، جو مالی سال 2024تا2025 میں بڑھ کر 3.28 کروڑ روپے ہو گیا۔ مالی سال 2025تا2026 میں اس میں 65 فیصد کا نمایاں اضافہ ہوا اور خالص منافع 5.42 کروڑ روپے تک پہنچ گیا۔ موجودہ مالی سال 2026تا2027 کی پہلی سہ ماہی، یعنی 30 جون 2026 تک، کمپنی 1.56 کروڑ روپے کا خالص منافع حاصل کر چکی تھی۔

ہندوستھان سماچار

---------------

ہندوستھان سماچار / عبدالسلام صدیقی