نئی دہلی، 27 اکتوبر (ہ س): انوپ باگچی نے ملک کے سب سے بڑے نجی شعبے کے قرض دہندہ ایچ ڈی ایف سی بینک کے منیجنگ ڈائریکٹر اور چیف ایگزیکٹیو آفیسر (سی ای او) کا عہدہ سنبھال لیا ہے۔

ایچ ڈی ایف سی بینک نے منگل کو اسٹاک ایکسچینج کو بتایا کہ ان کے پیش رو سی ای او ششی دھر جگدیشن نے اپنی مدتِ کار مکمل ہونے کے بعد پیر کو عہدہ چھوڑ دیا۔ بینک نے بتایا کہ انوپ باگچی نے منیجنگ ڈائریکٹر اور سی ای او کی ذمہ داریاں سنبھال لی ہیں۔

آئی سی آئی سی آئی گروپ میں طویل عرصے تک کام کرنے والے باگچی، ایچ ڈی ایف سی بینک کی تین دہائیوں سے زیادہ طویل تاریخ میں اس عہدے پر فائز ہونے والے پہلے بیرونی شخص ہیں۔ اس سے قبل وہ آئی سی آئی سی آئی پرڈینشیل لائف انشورنس کے منیجنگ ڈائریکٹر اور سی ای او تھے۔

انوپ باگچی ایسے وقت میں ایچ ڈی ایف سی بینک سے وابستہ ہوئے ہیں، جب بینک کو کئی چیلنجز کا سامنا ہے۔ ان میں بنیادی آمدنی میں اضافے اور منافع کے مارجن سے متعلق مسائل بھی شامل ہیں، جن کے باعث سرمایہ کار محتاط ہو گئے ہیں۔

بینک کی آمدنی سے متعلق منعقدہ ایک میٹنگ میں مختصر تبصرہ کرتے ہوئے باگچی نے کہا کہ ہاؤسنگ فنانس کے شعبے کی بڑی کمپنی ایچ ڈی ایف سی کے ساتھ 2023 میں ہونے والے انضمام سے متعلق کچھ کام ابھی مکمل ہونا باقی ہے۔ انہوں نے کہا کہ وہ بینک کو بہتر طور پر سمجھنے کے لیے تمام متعلقہ فریقوں سے ملاقات کریں گے۔

ہندوستھان سماچار

---------------

ہندوستھان سماچار / عبدالواحد