سائی سدرشن کے 91 اور واشنگٹن سندر کے ناٹ آؤٹ 51 رن سے انڈیا اے کو 284 رن کی مجموعی برتری حاصل

لنکن، 26 اکتوبر (ہ س)۔ دیودت پڈیکل کی شاندار 199 رن کی اننگز کی بدولت انڈیا اے نے نیوزی لینڈ اے کے خلاف پہلے غیر سرکاری ٹیسٹ میچ کے تیسرے دن اپنی گرفت مضبوط کر لی۔ پڈیکل محض ایک رن سے ڈبل سنچری مکمل کرنے سے محروم رہ گئے۔ ان کی شاندار بلے بازی کی بدولت انڈیا اے نے دوسری اننگز میں 8 وکٹوں کے نقصان پر 488 رن بنا لیے ہیں اور اس کی مجموعی برتری 284 رن ہو گئی ہے۔

دن کا کھیل ختم ہونے تک واشنگٹن سندر 51 رن بنا کر ناٹ آؤٹ تھے۔ انڈیا اے نے پہلی اننگز میں 113 رن بنائے تھے، جس کے جواب میں نیوزی لینڈ اے نے 317 رن بنا کر 204 رن کی برتری حاصل کر لی تھی۔ تاہم، انڈیا اے نے دوسری اننگز میں زبردست واپسی کرتے ہوئے میزبان ٹیم کے سامنے ایک مشکل ہدف رکھنے کی پوزیشن حاصل کر لی ہے۔

پڈیکل اور سائی سدرشن کے درمیان شاندار شراکت داری

تیسرے دن دیودت پڈیکل 56 اور سائی سدرشن 39 رن سے آگے کھیلنے اترے۔ دونوں بلے بازوں نے محتاط انداز میں بلے بازی کرنے کے ساتھ تیزی سے رن بھی بنائے۔ سدرشن نے اپنی نصف سنچری مکمل کی، جبکہ پڈیکل نے جارحانہ انداز اپناتے ہوئے رن بٹورے۔ انہوں نے جیڈن لینوکس کی گیند پر چھکا لگا کر فرسٹ کلاس کرکٹ میں اپنی 12ویں سنچری مکمل کی۔

دونوں بلے بازوں نے دوسرے وکٹ کے لیے 200 سے زیادہ رن کی شراکت داری کی اور انڈیا اے کو پہلی اننگز کے خسارے سے نکال کر میچ میں مضبوط پوزیشن میں پہنچا دیا۔ تاہم، نیوزی لینڈ اے نے شارٹ گیندوں کا استعمال کرتے ہوئے واپسی کی کوشش کی۔ سائی سدرشن 91 رن بنا کر اسکوائر لیگ کے پیچھے کھڑے فیلڈر کو کیچ دے بیٹھے۔

لنچ کے بعد کپتان دھرو جوریل بھی صرف 2 رن بنا کر آؤٹ ہو گئے۔ اس کے باوجود پڈیکل نے ایک کنارہ سنبھالے رکھا اور یش راٹھوڑ کے ساتھ مل کر تیزی سے رن بنائے۔

ڈبل سنچری مکمل کرنے سے محروم رہے پڈیکل

پڈیکل نے جارحانہ بلے بازی جاری رکھتے ہوئے 150 رن کا ہندسہ عبور کر لیا۔ دوسری جانب، یش راٹھوڑ نے کرسچین کلارک کے ایک اوور میں دو چوکے اور ایک چھکا لگا کر اپنی نصف سنچری مکمل کی۔ انہوں نے 54 گیندوں پر 50 رن بنائے۔

تاہم، پڈیکل کی اننگز کا اختتام ایک متنازع فیصلے کے ساتھ ہوا۔ وہ 199 رن کے انفرادی اسکور پر لیگ سائیڈ میں وکٹ کے پیچھے کیچ آؤٹ قرار دیے گئے۔ انہوں نے امپائر کی جانب اشارہ کرتے ہوئے بتایا کہ گیند اور بلے کے درمیان کوئی رابطہ نہیں ہوا تھا۔ اس فیصلے کے ساتھ ہی ان کی ڈبل سنچری مکمل کرنے کی امید ٹوٹ گئی۔

پڈیکل نے اپنی شاندار اننگز کی بدولت انڈیا اے کو ایسی مضبوط پوزیشن میں پہنچا دیا ہے، جہاں سے ٹیم میچ جیتنے کی مضبوط دعوے دار بن گئی ہے۔

نچلے درجے کے بلے بازوں کا بھی اہم تعاون

چائے کے وقفے کے بعد یش راٹھوڑ 66 رن بنا کر آؤٹ ہو گئے۔ اس کے بعد نچلے درجے کے بلے بازوں نے بھی اہم رن بنائے۔ انشول کمبوج نے چار چوکے لگائے، لیکن وہ 22 رن بنا کر پویلین لوٹ گئے۔

واشنگٹن سندر نے جارحانہ بلے بازی جاری رکھی اور عاقب نبی کے ساتھ 69 رن کی شراکت داری کی۔ عاقب نبی نے تین چوکوں اور دو چھکوں کی مدد سے 38 رن بنائے۔ سندر نے دن کا کھیل ختم ہونے تک اپنی نصف سنچری مکمل کر لی۔ وہ 51 رن بنا کر ناٹ آؤٹ رہے۔

روشنی کم ہونے کے باعث مقررہ اضافی وقت کے نو منٹ گزرنے کے بعد کھیل روکنا پڑا۔ اب انڈیا اے کے سامنے یہ فیصلہ کرنے کا چیلنج ہوگا کہ وہ رات میں ہی اپنی اننگز ڈکلیئر کرے یا آخری دن نیوزی لینڈ اے کو آؤٹ کرنے کے لیے کافی وقت دینے کی غرض سے بلے بازی جاری رکھے۔

مختصر اسکور

انڈیا اے، پہلی اننگز: 113 رن۔

انڈیا اے، دوسری اننگز: 8 وکٹوں پر 488 رن۔

نمایاں بلے باز: دیودت پڈیکل 199، سائی سدرشن 91، یش راٹھوڑ 66، واشنگٹن سندر ناٹ آؤٹ 51 رن۔

جیک گبسن: 58 رن دے کر 2 وکٹیں۔

نیوزی لینڈ اے، پہلی اننگز: 317 رن۔

انڈیا اے کی مجموعی برتری: 284 رن۔

ہندوستھان سماچار

---------------

ہندوستان سماچار / عبدالسلام صدیقی