نئی دہلی، 19 اکتوبر (ہ س)۔ ہندوستانی خواتین فٹ بال کے اعلیٰ گھریلو مقابلے انڈین ویمنز لیگ (آئی ڈبلیو ایل) کے 27-2026 سیزن کا آغاز 13 نومبر سے ہوگا۔ اس سیزن میں آٹھ ٹیمیں خطاب کے لیے مقابلہ کریں گی۔ تمام میچ کولکاتا، جمشیدپور اور بنگلورو میں کھیلے جائیں گے۔

آئندہ سیزن میں گزشتہ سال کی چھ ٹیمیں، ایسٹ بنگال ایف سی، سیتو ایف سی، کِک اسٹارٹ ایف سی، نیتا فٹ بال اکیڈمی، گوکلم کیرالہ ایف سی اور گڑھوال یونائیٹڈ ایف سی حصہ لیں گی۔ ان کے علاوہ آئی ڈبلیو ایل-2 کے 26-2025 سیزن میں پہلی اور دوسری پوزیشن حاصل کرنے والی ہاپس ایف سی اور جوبا سنگھا ایف سی کو بھی اعلیٰ لیگ میں جگہ ملی ہے۔

موجودہ چیمپئن ایسٹ بنگال ایف سی اس بار بھی خطاب اپنے پاس برقرار رکھنے کے ارادے سے میدان میں اترے گی۔ ٹیم نے 26-2025 سیزن میں شاندار کارکردگی کا مظاہرہ کرتے ہوئے 13 مقابلوں میں کامیابی حاصل کی تھی، جبکہ اسے صرف ایک میچ میں شکست کا سامنا کرنا پڑا تھا۔

گزشتہ سیزن میں انفرادی کارکردگی کے لحاظ سے بھی کئی کھلاڑیوں نے متاثر کیا تھا۔ ایسٹ بنگال کی فازیلا ایکواپٹ 20 گول کے ساتھ لیگ کی سب سے زیادہ گول کرنے والی کھلاڑی رہی تھیں۔ وہیں نیتا فٹ بال اکیڈمی کی پیاری کشا اور سیتو ایف سی کی لنڈا کوم نے بھی اپنے جارحانہ کھیل سے اپنی چھاپ چھوڑی تھی۔

آئی ڈبلیو ایل کے نئے سیزن کا اعلان ایسے وقت میں کیا گیا ہے، جب آل انڈیا فٹ بال فیڈریشن (اے آئی ایف ایف) اور کیپری اسپورٹس لیگ کے تجارتی ترقی اور مارکیٹنگ کے حقوق کے حوالے سے 15 سالہ شراکت داری کے تحت مل کر کام کر رہے ہیں۔ اس شراکت داری میں آئی ڈبلیو ایل اور آئی ڈبلیو ایل-2، دونوں شامل ہیں۔

کیپری اسپورٹس میں کانٹیکٹ اسپورٹس کے سربراہ اپورو گپتا نے کہا کہ 27-2026 کا سیزن کمپنی کے لیے انڈین ویمنز لیگ کے ساتھ ایک نئی شروعات کا اہم مرحلہ ہے۔ انہوں نے کہا کہ لیگ اور ملک بھر سے آنے والی باصلاحیت کھلاڑیوں میں بے پناہ امکانات موجود ہیں۔ کمپنی کا مقصد خواتین فٹ بال کھلاڑیوں کے لیے ایک مضبوط پلیٹ فارم تیار کرنا، لیگ کی رسائی بڑھانا اور ایسا ماحول فراہم کرنا ہے، جس میں کلب اور کھلاڑی ترقی کر سکیں۔

اے آئی ایف ایف کے نائب جنرل سکریٹری ایم ستیہ نارائن نے کہا کہ انڈین ویمنز لیگ ملک میں خواتین فٹ بال کی ترقی کی ایک اہم بنیاد ہے۔ آٹھ ٹیموں کے درمیان ہونے والا مقابلہ کھلاڑیوں کو قومی سطح پر اپنی صلاحیتوں کا مظاہرہ کرنے کا موقع فراہم کرے گا۔

انہوں نے کہا کہ آئی ڈبلیو ایل-2 بھی ملک کے گھریلو فٹ بال نظام میں کلبوں اور کھلاڑیوں کو آگے بڑھنے کا ایک اہم راستہ فراہم کرتی ہے۔ فیڈریشن ملک بھر میں خواتین فٹ بال کھلاڑیوں کے لیے مزید مواقع پیدا کرنے کے لیے پُرعزم ہے۔

ہندوستھان سماچار

---------------

ہندوستان سماچار / عبدالواحد