نئی دہلی، 18 اکتوبر (ہ س)۔

اکتوبر کے مہینے میں غیر ملکی پورٹ فولیو سرمایہ کار (ایف پی آئی) مسلسل فروخت کنندگان کا کردار ادا کر رہے ہیں۔ اس ماہ اب تک وہ بھارتی شیئر بازار سے 52,100 کروڑ روپے کی سرمایہ کاری نکال چکے ہیں۔ بتایا جا رہا ہے کہ خام تیل کی بلند قیمتوں، امریکہ میں سرکاری بانڈز پر بڑھتی ہوئی منافع کی شرح اور ڈالر کی مضبوطی کے باعث غیر ملکی سرمایہ کار بھارتی بازار سے اپنا پیسہ نکال رہے ہیں۔

مارکیٹ کے ماہرین کے مطابق، امریکہ میں مہنگائی کی شرح مسلسل بلند رہنے سے شرح سود میں اضافے کا خدشہ بھی بڑھ گیا ہے۔ خیال کیا جا رہا ہے کہ ان حالات کے باعث غیر ملکی سرمایہ کار بھارتی شیئر بازار سے پیسہ نکال کر امریکہ اور دیگر پرکشش بازاروں کا رخ کر رہے ہیں۔ سینٹرل ڈپازٹری سروسز لمیٹڈ (سی ڈی ایس ایل) کے اعداد و شمار کے مطابق، اکتوبر میں تازہ فروخت کے بعد سال 2026 میں اب تک غیر ملکی پورٹ فولیو سرمایہ کار بھارتی شیئر بازار سے مجموعی طور پر 3.12 لاکھ کروڑ روپے نکال چکے ہیں۔

ستمبر میں بھی غیر ملکی پورٹ فولیو سرمایہ کار بھارتی شیئر بازار میں مسلسل فروخت کرتے رہے تھے۔ اس دوران انہوں نے ملکی شیئرز سے 35,861 کروڑ روپے نکال لیے تھے۔ تاہم، اس سے پہلے جولائی اور اگست میں غیر ملکی سرمایہ کاروں نے فروخت کے مقابلے میں خریداری پر زیادہ توجہ دی تھی۔ جولائی میں ایف پی آئی نے بھارتی شیئر بازار میں 20,200 کروڑ روپے کی خالص سرمایہ کاری کی تھی، جبکہ اگست میں انہوں نے 29,631 کروڑ روپے کے شیئرز خریدے تھے۔ لیکن ستمبر سے غیر ملکی سرمایہ کاروں کا رجحان ایک بار پھر بدل گیا اور وہ فروخت کرنے لگے۔ ستمبر میں شروع ہونے والی فروخت کی رفتار اکتوبر میں مزید تیز ہو گئی۔

اگر سال 2026 میں غیر ملکی پورٹ فولیو سرمایہ کاروں کی خرید و فروخت کے اعداد و شمار پر نظر ڈالیں تو اب تک بھارتی شیئر بازار سے ان کی خالص سرمایہ کاری کا انخلا 3.12 لاکھ کروڑ روپے تک پہنچ چکا ہے۔ یہ رقم سال 2025 کے دوران غیر ملکی سرمایہ کاروں کی جانب سے نکالی گئی مجموعی 1.66 لاکھ کروڑ روپے کی رقم سے بھی کہیں زیادہ ہے۔ اس سے واضح ہوتا ہے کہ رواں سال بھارتی شیئر بازار میں غیر ملکی سرمایہ کاری کا بہاو¿ مسلسل دباو¿ کا شکار رہا ہے۔ جولائی اور اگست میں خریداری کے باوجود غیر ملکی سرمایہ کاروں کی مجموعی فروخت کا حجم کافی زیادہ ہے۔

ہندوستھان سماچار

ہندوستان سماچار / عطاءاللہ