ناگویا، 18 اکتوبر (ہ س)۔

جاپان کے شہر آئچی-ناگویا میں اتوار کو پانچویں ایشیائی پیرا کھیل 2026 کا رنگا رنگ اور جذباتی افتتاحی تقریب کے ساتھ آغاز ہوا۔ ناگویا کے پالومہ میزوہو اسٹیڈیم میں منعقدہ تقریب میں فن، ثقافت، جدید ٹیکنالوجی اور انسانی عزم کا منفرد امتزاج دیکھنے کو ملا۔ پیرا لمپک گولڈ میڈل یافتہ پرومود بھگت اور ایتھلیٹ سمرن شرما نے ہندوستانی دستے کے پرچم بردار کی حیثیت سے ترنگے کے ساتھ مارچ کیا۔ ان کھیلوں میں پہلی مرتبہ ایشیا کی تمام 45 قومی پیرا لمپک کمیٹیوں کے کھلاڑی حصہ لے رہے ہیں۔

سات روز تک جاری رہنے والے ان کھیلوں کا اختتام 24 اکتوبر کو ہوگا۔ مقابلوں میں 18 کھیلوں کے مختلف مقابلے منعقد کیے جائیں گے۔ منتظمین کے مطابق، ان کھیلوں میں تقریباً 4 ہزار کھلاڑیوں اور دیگر شرکائ کی شرکت متوقع ہے۔ تمام 45 ممالک کی شرکت ایشیا میں پیرا کھیلوں کے بڑھتے دائرے، اتحاد اور شمولیت کے جذبے کی عکاسی کرتی ہے۔

افتتاحی تقریب کی مرکزی تھیم ’امیجن ون ہارٹ‘ رہی، جس کا مقصد کھیلوں کے ذریعے دنیا کو متحد کرنے، انسانی جذبات کو جوڑنے اور سماجی رکاوٹوں کو دور کرنے کا پیغام دینا تھا۔ ثقافتی پروگراموں میں جاپان کے روایتی فنون اور جدید پیشکشوں کا خوب صورت امتزاج دیکھنے کو ملا۔تقریب کا فنکارانہ حصہ ’وابی‘ کے تصور پر مرکوز تھا، جس کا مفہوم ہے کہ ہم سب خوب صورت اور منفرد انسان ہیں۔ جاپانی جمالیاتی فلسفے ’وابی سابی‘ سے متاثر اس پیشکش میں یہ پیغام دیا گیا کہ ہر انسان کا جسم، زندگی کا سفر اور شخصیت اپنی جگہ منفرد ہے۔ معذوری کے باوجود اپنی صلاحیتوں کو پہچاننے اور چیلنجز کا سامنا کرنے کے جذبے کو رقص، موسیقی، روشنی اور جذباتی پیشکشوں کے ذریعے پیش کیا گیا۔

افتتاحی تقریب میں میزبان صوبے آئچی کے ثقافتی ورثے کو بھی نمایاں جگہ دی گئی۔ جاپان کی روایتی لوک موسیقی اور تہواروں سے وابستہ رقص نے تقریب کو مقامی رنگ عطا کیا۔ سیکڑوں فنکاروں، موسیقاروں اور رقاصوں نے اجتماعی پیشکشوں کے ذریعے جاپانی ثقافت کی جھلک دکھائی۔تقریب کی فنکارانہ ہدایت اور رقص کی ترتیب کی ذمہ داری جاپان کے معاصر رقص کے فنکار کائیجی موریاما نے سنبھالی۔ بصارت سے محروم فنکار ریو سیکیبا کی پیشکش بھی تقریب کی خاص توجہ رہی۔ ان کی پیشکش کے ذریعے احساسات، فنکارانہ اظہار اور انسانی عزم کی طاقت کو اجاگر کیا گیا۔

تقریب کو سب کے لیے قابل رسائی بنانے کے لیے جدید ٹیکنالوجی کا استعمال بھی کیا گیا۔ اسٹیڈیم میں موجود ناظرین کے موبائل فون پر حقیقی وقت میں سب ٹائٹلز اور آڈیو وضاحت فراہم کرنے کا انتظام کیا گیا، تاکہ سننے یا دیکھنے میں دشواری کا سامنا کرنے والے افراد بھی تقریب سے لطف اندوز ہوسکیں۔

ہندوستانی دستے کے لیے تقریب کا سب سے خاص لمحہ اس وقت آیا، جب پیرا بیڈمنٹن کے پیرا لمپک گولڈ میڈل یافتہ کھلاڑی پرومود بھگت اور پیرا ایتھلیٹکس کی دوڑ کی کھلاڑی سمرن شرما نے ترنگا اٹھا کر ہندوستانی دستے کی قیادت کی۔ دونوں کھلاڑیوں نے بین الاقوامی اسٹیج پر ہندوستان کی نمائندگی کی۔

ہندوستانی دستے میں 168 کھلاڑی شامل ہیں، جن سے مختلف کھیلوں میں تمغے جیتنے کی امید ہے۔ ابتدائی طور پر ٹیبل ٹینس کھلاڑی بھاوینا پٹیل کو پرومود بھگت کے ساتھ پرچم بردار مقرر کیا گیا تھا، لیکن 19 اکتوبر کو ہونے والے ان کے اہم کوارٹر فائنل مقابلے کے پیش نظر تبدیلی کی گئی۔ مقابلے سے پہلے انہیں مناسب آرام دینے کے مقصد سے سمرن شرما کو پرچم بردار کی ذمہ داری سونپی گئی۔

افتتاحی تقریب کے دوران میزبان جاپان کا قومی پرچم لہرایا گیا۔ جاپان کے وہیل چیئر رگبی کھلاڑی کاتسویا ہاشیموتو نے مرکزی اسٹیڈیم میں کھیلوں کی مشعل روشن کرکے افتتاحی تقریب کو یادگار بنایا۔ ہاشیموتو نے میزبان ملک کے پرچم بردار کی حیثیت سے بھی مارچ کیا۔ایشیائی پیرا لمپک کمیٹی کے صدر ماجد رشید نے اس انعقاد کو براعظم میں پیرا کھیلوں کی تحریک کے لیے ایک تاریخی موقع قرار دیا۔ انہوں نے کہا کہ تمام 45 ممالک کی شرکت کھیلوں کی بڑھتی رسائی، اتحاد اور مضبوطی کا ثبوت ہے۔ ان کے مطابق، پیرا کھیل کھلاڑیوں کو اپنی صلاحیت، عزم اور جدوجہد کا مظاہرہ کرنے کا موقع دینے کے ساتھ مختلف ممالک کو بھی ایک لڑی میں پروتے ہیں۔

کچھ کھیلوں کے مقابلے افتتاحی تقریب سے پہلے ہی شروع ہوگئے تھے۔ جمعہ کو وہیل چیئر باسکٹ بال کے ابتدائی مقابلوں میں جاپان کی مردوں اور خواتین کی ٹیموں نے کامیابی حاصل کی۔ ہفتے کے روز جاپان کی مردوں کی گول بال ٹیم نے قطر، جبکہ خواتین کی ٹیم نے تھائی لینڈ کو شکست دی۔آئچی-ناگویا ایشیائی پیرا کھیل 2026 میں کھیلوں کی عمدہ کارکردگی کے ساتھ شمولیت، مساوی مواقع اور انسانی عزم کو مرکزی اہمیت دی گئی ہے۔ تمام 45 ممالک کی شرکت اور ہندوستانی دستے کی قیادت کرتے ہوئے پرومود بھگت اور سمرن شرما کی موجودگی نے افتتاحی تقریب کو خاص بنا دیا۔

ہندوستھان سماچار

ہندوستان سماچار / Mohammad Khan