نئی دہلی، 16 اکتوبر (ہ س)۔ نجی شعبے کے فیڈرل بینک لمیٹڈ نے جمعہ کو مالی سال 27-2026 کی دوسری سہ ماہی (جولائی تا ستمبر) کے نتائج کا اعلان کر دیا ہے۔ بینک کے خالص منافع میں اس سہ ماہی کے دوران 45.10 فیصد کا اضافہ درج کیا گیا، جس کے ساتھ یہ بڑھ کر 1386.09 کروڑ روپے کی ریکارڈ سطح پر پہنچ گیا۔
فیڈرل بینک کے منافع میں سالانہ بنیاد پر نمایاں اضافہ ہوا ہے۔ بینک کا خالص منافع 45.10 فیصد بڑھ کر 1386 کروڑ روپے ہو گیا، جب کہ گزشتہ مالی سال کی اسی سہ ماہی میں یہ 955 کروڑ روپے تھا۔ اسی طرح بینک کی خالص سودی آمدنی (این آئی آئی) سالانہ بنیاد پر 26.4 فیصد اضافے کے ساتھ 3153.4 کروڑ روپے رہی، جب کہ گزشتہ مالی سال میں یہ 2495.2 کروڑ روپے تھی۔ بینک کا خالص سودی مارجن 26 بیسس پوائنٹس بڑھ کر 3.32 فیصد ہو گیا، جب کہ ڈپازٹ کی لاگت 39 بیسس پوائنٹس کم ہو کر 5.18 فیصد رہ گئی۔
بینک نے بتایا کہ اس کے اثاثوں کا معیار گزشتہ ایک دہائی کی بہترین سطح پر پہنچ گیا ہے۔ اس دوران بینک کے مجموعی غیر فعال اثاثوں (گراس این پی اے) کا تناسب کم ہو کر 1.32 فیصد اور خالص غیر فعال اثاثوں (نیٹ این پی اے) کا تناسب 0.17 فیصد رہ گیا۔ یہ گزشتہ 10 برسوں کی کم ترین سطح ہے۔ بینک کے مطابق، سالانہ بنیاد پر ان دونوں اشاریوں میں بالترتیب 51 اور 31 بیسس پوائنٹس کی بہتری درج کی گئی ہے۔
کیرالہ میں واقع اس نجی بینک کے مجموعی اور خالص غیر فعال اثاثوں کا تناسب ایک دہائی کی کم ترین سطح پر آنے کے بعد نیشنل اسٹاک ایکسچینج (این ایس ای) میں درج اس کے حصص میں بھی 2.10 فیصد کا اضافہ ہوا اور ان کی قیمت 342.05 روپے تک پہنچ گئی۔
ہندوستھان سماچار
ہندوستان سماچار / محمد شہزاد
