نئی دہلی، 14 اکتوبر (ہ س)۔
کبڈی چمپئنز لیگ کے دوسرے سیزن کے لیے کھلاڑیوں کی نیلامی 17 اکتوبر کو ہوگی۔ اس نیلامی میں 300 سے زائد کھلاڑیوں کے شامل ہونے کی امید ہے۔ لیگ کی تمام 10 فرنچائزز کو اپنی ٹیمیں تیار کرنے کے لیے مجموعی طور پر پانچ کروڑ روپے کا بجٹ دیا جائے گا۔ مرکزی سلیکشن ٹرائل کے لیے 6 ہزار سے زائد کھلاڑیوں نے رجسٹریشن کرایا تھا۔آئندہ سیزن کے لیے سونی پت اور روہتک میں مرکزی سلیکشن ٹرائل منعقد کیے گئے تھے۔ ان ٹرائلز کے ذریعے کبڈی کھلاڑیوں کو لیگ میں جگہ بنانے کا موقع ملا۔ اب نیلامی کے دوران فرنچائزز اپنی ضرورت اور حکمت عملی کے مطابق کھلاڑیوں پر بولی لگائیں گی۔
نیلامی میں ایشیائی کھیلوں کے طلائی تمغہ جیتنے والے کھلاڑیوں اور ہندوستانی قومی ٹیم کے کھلاڑیوں سمیت کئی بڑے ناموں کے شامل ہونے کی توقع ہے۔ ایشیائی کھیلوں میں ہندوستانی ٹیم کی کپتانی کر چکے سنیل ملک کے علاوہ ایان لوچب، انکت جگلان اور جے دیپ داہیا پر بھی سب کی نظریں رہیں گی۔ان کے علاوہ میتو شرما، نیرج نروال، یوگیش داہیا، وجے ملک، سریجیت نروال اور نتن دھانکڑ جیسے کھلاڑیوں کے بھی نیلامی میں شامل ہونے کا امکان ہے۔ بین الاقوامی سطح پر تجربہ رکھنے والے کھلاڑیوں کی موجودگی سے نیلامی میں مقابلہ مزید دلچسپ ہونے کی امید ہے۔
دوسرے سیزن کے لیے پانچ کروڑ روپے کا کھلاڑیوں کا بجٹ تمام 10 فرنچائزز میں تقسیم کیا جائے گا۔ ہر ٹیم کو اپنی ٹیم تیار کرنے کے لیے 50 لاکھ روپے ملیں گے۔لیگ نے دوسرے سیزن سے پہلے دو نئی فرنچائزز، کوروکشیتر نائٹس اور جھجر جیگوارز کو شامل کیا ہے۔ اس کے ساتھ ہی لیگ میں ٹیموں کی تعداد بڑھ کر 10 ہو گئی ہے۔ نئی ٹیموں کی شمولیت سے کھلاڑیوں کے لیے مواقع بڑھنے اور ٹیموں کے درمیان مقابلہ مزید سخت ہونے کی امید ہے۔ہریانہ امیچر کبڈی فیڈریشن کے صدر کلدیپ دلال نے نیلامی سے قبل کبڈی چیمپئنز لیگ کے لیے نیک خواہشات کا اظہار کیا۔ انہوں نے منتظمین، حصہ لینے والی فرنچائزز اور کھلاڑیوں کی کامیابی کی دعا کرتے ہوئے امید ظاہر کی کہ آئندہ سیزن کبڈی کے باصلاحیت کھلاڑیوں کو مزید مواقع فراہم کرے گا اور اس کھیل کی ترقی میں اہم کردار ادا کرے گا۔انہوں نے کہا کہ 17 اکتوبر کو ہونے والی نیلامی لیگ کے دوسرے سیزن کے لیے ٹیموں کو حتمی شکل دینے کی سمت میں ایک اہم مرحلہ ہوگی۔ 300 سے زائد کھلاڑیوں کی شمولیت کی توقع کے درمیان یہ نیلامی تمام فرنچائزز کی ٹیموں کی تشکیل میں اہم کردار ادا کرے گی۔
ہندوستھان سماچار
ہندوستان سماچار / Mohammad Khan
