نئی دہلی، 13 اکتوبر (ہ س)۔ نیشنل لینڈ مونیٹائزیشن کارپوریشن (این ایل ایم سی) نے منگل کو وشاکھاپٹنم اسٹیل پلانٹ چلانے والی کمپنی راشٹریہ اسپات نگم لمیٹڈ (آر آئی این ایل) کے 150 قیمتی پلاٹوں کی پہلے مرحلے میں کامیاب ای نیلامی کی۔ اس نیلامی سے حکومت کو 366.33 کروڑ روپے حاصل ہوئے۔وزارت خزانہ کی جانب سے جاری بیان کے مطابق، این ایل ایم سی نے آر آئی این ایل کے پلاٹوں کی پہلی آن لائن نیلامی ڈیجیٹل طریقے سے منعقد کی، جس کے پہلے ہی دن 150 پلاٹ کامیابی کے ساتھ فروخت ہوئے اور ان کے لیے مجموعی طور پر 366.33 کروڑ روپے کی بولیاں موصول ہوئیں۔ یہ عمل وزارت خزانہ کے محکمہ برائے سرکاری اداروں کے تحت این ایل ایم سی نے انجام دیا۔
وزارت کے مطابق، پہلے مرحلے میں پیش کیے گئے پلاٹوں میں سے 150 فروخت ہوئے۔ ان پلاٹوں کی مجموعی محفوظ قیمت 312.48 کروڑ روپے تھی، جب کہ کامیاب بولیوں کے ذریعے 366.33 کروڑ روپے حاصل ہوئے۔ اس طرح محفوظ قیمت کے مقابلے میں اوسطاً 17.23 فیصد زیادہ قیمت کی بولی لگی، جو بازار میں خریداروں کی دلچسپی اور اس پیشکش کو ملنے والے ردعمل کی عکاسی کرتی ہے۔
وزارت خزانہ نے کہا کہ نیلامی میں بہتر قیمت حاصل ہوئی اور فی مربع گز سب سے زیادہ بولی 1.80 لاکھ روپے سے تجاوز کرگئی۔ یہ وشاکھاپٹنم کے اہم مقامات پر واقع پلاٹوں کی مضبوط مانگ کو ظاہر کرتا ہے۔ اس کے ساتھ ہی نیلامی کے شفاف اور مسابقتی طریقہ? کار کے ذریعے سرکاری اثاثوں سے مالی فائدہ حاصل کرنے کی اہمیت بھی اجاگر ہوتی ہے۔وزارت کے مطابق، این ایل ایم سی یہ نیلامی راشٹریہ اسپات نگم لمیٹڈ کے تعاون سے منعقد کر رہا ہے، جب کہ کوئکر انڈیا پرائیویٹ لمیٹڈ اس معاملے میں لین دین کے مشیر کی ذمہ داری ادا کر رہی ہے۔ آن لائن بولی کا عمل ریل ٹیل کے ای ٹینڈر پلیٹ فارم کے ذریعے انجام دیا جا رہا ہے۔
پہلے مرحلے میں ملنے والے حوصلہ افزا ردعمل کے بعد ای نیلامی کے دوسرے اور آخری مرحلے میں باقی 216 پلاٹ شامل کیے جائیں گے۔ یہ نیلامی 30 اکتوبر 2026 کو صبح 11 بجے سے شام 5 بجے تک ہوگی۔
نیلامی میں حصہ لینے کے خواہش مند بولی دہندگان کو 27 اکتوبر 2026 تک اپنا رجسٹریشن مکمل کرنا ہوگا۔ دستیاب پلاٹوں، ان کی محفوظ قیمتوں، اہلیت کی شرائط اور شرکت سے متعلق ضروری معلومات سرکاری ای نیلامی پورٹل https://eauction.enivida.com/ پر دیکھی جا سکتی ہیں۔
نیشنل لینڈ مونیٹائزیشن کارپوریشن وزارت خزانہ کے محکمہ برائے سرکاری اداروں کے تحت کام کرنے والی ایک سرکاری کمپنی ہے۔ اس کا مقصد مرکزی سرکاری شعبے کے اداروں اور دیگر سرکاری ایجنسیوں کی اضافی زمینوں اور عمارتوں جیسے اثاثوں سے مالی فائدہ حاصل کرنے کے عمل کو آسان بنانا ہے۔یہ کارپوریشن اثاثوں کی مالک تنظیموں کے ساتھ مل کر شفاف اور بازار پر مبنی طریقہ کار کے ذریعے اضافی اثاثوں کی شناخت، تیاری اور ان سے مالی فائدہ حاصل کرنے کے عمل کو منظم کرتی ہے۔
ہندوستھان سماچار
ہندوستان سماچار / Mohammad Khan
