نئی دہلی، 8 جنوری (ہ س): مردوں کے شاٹ پٹ میں دو بار کے ایشیائی انڈور چمپئن تجندر پال سنگھ تور 12ویں ایشین انڈور ایتھلیٹکس چمپئن شپ میں 17 رکنی ہندوستانی ٹیم کی قیادت کریں گے، یہ براعظمی ایونٹ تیانجن، چین میں 6 سے 8 فروری تک منعقد ہوگا۔

ہندوستان کی ایتھلیٹکس فیڈریشن نے جمعرات کو ہندوستانی دستے کا اعلان کیا۔ ٹیم 3 فروری کو چین روانہ ہوگی۔ رائزنگ شاٹ پٹر سمردیپ سنگھ گل کو بھی اسکواڈ میں شامل کیا گیا ہے۔

تجندرپال تور نے اس سے قبل تہران، ایران میں 11ویں ایشین انڈور چیمپئن شپ میں 19.72 میٹر کی تھرو کے ساتھ طلائی تمغہ جیتا تھا۔ پنجاب سے تعلق رکھنے والے 31 سالہ تجربہ کار کے پاس 21.77 میٹر کا قومی آؤٹ ڈور ریکارڈ ہے، جو اس نے 2023 میں بھونیشور میں قائم کیا تھا۔ دو بار کے ایشین گیمز کے چیمپئن، تور نے قازقستان کے نور سلطان میں ہونے والی 10ویں ایشین انڈور چیمپئن شپ میں بھی طلائی تمغہ جیتا تھا۔

ابھرتے ہوئے لانگ جمپر شاہنواز خان اور تجربہ کار ٹرپل جمپر پروین چھتراول بھی چیمپئن شپ میں اپنے 2026 کے سیزن کا آغاز کریں گے۔ تیجسون شنکر (ہپٹاتھلون) اور منی کانتا ہوبلیدھر (60 میٹر) بھی مردوں کے زمرے میں نمایاں نام ہیں۔

خواتین کے زمرے میں، ملک کی ٹاپ سپرنٹر نتیا گاندھے اور ابھینیا راجراجن 60 میٹر کی دوڑ میں حصہ لیں گی۔ مومیتا مونڈل 60 میٹر رکاوٹوں کے ساتھ ساتھ لمبی چھلانگ میں بھی حصہ لیں گی۔

ہندوستان نے 2024 میں ایران میں ہونے والی آخری ایشین انڈور ایتھلیٹکس چیمپئن شپ میں تین طلائی اور ایک چاندی سمیت چار تمغے جیتے تھے۔ تجندرپال تور نے مردوں کے شاٹ پٹ میں، جیوتی یاراجی اور ہرملن بینس نے خواتین کی رکاوٹ میں، جبکہ انکیتا نے خواتین کے 3000 میٹر میں چاندی کا تمغہ جیتا تھا۔

ہندوستانی قومی ایتھلیٹکس ٹیم

مرد: منی کانتا ہوبلیدھر (60 میٹر)، تیجس شرسے (60 میٹر رکاوٹ)، جے آدرش رام (اونچی چھلانگ)، سی وی انوراگ، شاہنواز خان (لمبی چھلانگ)، پروین چتھراول (ٹرپل جمپ)، سمردیپ سنگھ گل، تجندرپال سنگھ تور (شاٹ پٹ)، تیجسوین شنکر (شاٹ پٹ)

خواتین: نتیا گاندھے، ابھینیا راجراجن (60 میٹر)، مومیتا مونڈل، پرگیان پرشانتی ساہو (60 میٹر رکاوٹ)، پوجا (اونچی چھلانگ)، اینسی سوجن، مومیتا مونڈل (لمبی چھلانگ)، یوگیتا (شاٹ پٹ)، کے اے انامیکا (پینٹاتھلون)

---------------

ہندوستان سماچار / عبدالسلام صدیقی